JEREMIAH 20
20
Jeremiah ak Pasur
1Ki kas anyun Pasur weeriitap Imer tisiindet, ne ki pounindet ne oo eng' kootap Kamuktaindet ne Toroor, komaoteni Jeremiah agobo tuguuchuuto. 2Ki pir anyun Pasur maotyot Jeremiah, ak koratyi ineendet keetiik keelyekyik, eng' ormariichet ne po meto ne po Benjamin, ne ki mi kootap Kamuktaindet ne Toroor. 3Ak ki ityaach Pasur Jeremiah komong' eng' keetichooto eng' peetuut ne po aeng'. Ki leenji anyun Jeremiah ineendet, Ma kuure Kamuktaindet ne Toroor kaineng'ung' Pasur, ago kaguurenen Mogor-misabip. 4Amu mwaei Kamuktaindet ne Toroor kole, keero, ayain iegu kamuiset ne imuege, ak ne imue choronoguk tugul: ak kobar icheek puunikwak eng' rotwetap chok, ak igeer nooto: ak agoite Judah tugul koba eutap laitoryatap Babilon, ak koluul icheek koba Babilon, ak kobare rotwetap chok. 5Ak agoite kogeny mogornatosyek tugul che po nganasani, ak kelunaikyik tugul, ak tuguukyik tugul che po kamanuutyet, ee konoraik tugul che po laitorinigap Judah, koba eunegap puunikwak, che luulei tuguuchooto, ak konam, ak koip koba Babilon. 6Ak inyee Pasur, keluulok kobooto piik tugul che menyei koong'ung'; ak iit Babilon, ak imechi olooto, ak ketupchin olooto, inyee ak choronoguk tugul, che ki imaotenji lembech. 7Ee Kamuktaindet ne Toroor, ki iberbera, ak ki aberberage: ii kiim isiira, ak ki iterteerisye: kaaegu ne kirorechin peetuut komugul, churochura age tugul. 8Amu kotugul ye ang'alaali, awaache; awaache ale, Koroomnateet ak luuleet: amu kagiyai ng'olyootap Kamuktaindet ne Toroor koek chotisyet eng' anee, ak aegu ne kirorechin eng' peetuut komugul. 9Ak ngot amwa ale, Ma mwaei kiy agobo ineendet, anan ang'alaal eng' kainennyi, kobiit anyun eng' muguleldanyu ko uu maat ne lalei eng' kawekyuk, ak ang'et eng' muitaet, ak ma muuchi asiis. 10Amu koagas kateweerisyetap che chaang', kamuiset eng' komosta age tugul. Mwaei choronokyuk tugul che achame, che machei kotaama, kole, omwaite, si kemwaite ineendet; tamangap kigaigai, si kiterteer ineendet ak kiyaaktochinegei mugetuut. 11Ago mi Kamuktaindet ne Toroor kobooto ko uu ineendet ne kiim ak komuisei: kinachi anyun usiikyuk, ama iterteerisyei: ililandos kot, amu ma yai eng' ng'omnateet, ak ma koi kiutye teweernatennywa ne po koigeny. 12Ago, ee Kamuktaindet ne Toroor ne po lugoosyek, ne ityeme chii ne po iman, ne igeere kabwaatutik ak muguleldo, koono ageer ye iyaakyini mugetuut icheek; amu ki ang'ang'un ng'olyoondennyu. 13Otyenji Kamuktaindet ne Toroor, olasu Kamuktaindet ne Toroor amu kigosar saboondap ne ma tinyei kiy eng' eunegap yaigap yaityet. 14#Job 3.1-19 Ingochubok peetuut ne ki kisigena: amat kiberuur peetuut ne kisigena kamennyu. 15Ingochubok chiito ne ki ipchin logoiywek che myach kwandanyu, koleenjin, Kagesigun weeriit; ne ki ibaibai ineendet kot. 16Ak ingoigei chiichooto nganasook che ki kogabui Kamuktaindet ne Toroor, ama sik: ak ingogas riirek karon, ak waagaat peet kween; 17amu ma para ami moo; si koek kamennyu kererinnyu, ak koeet moennyi kotugul. 18Amu nee anyun si among' eng' moo, si ageer pirtoetapkei ak arageneet, kot kogeskei peetuusyekyuk eng' kalilanet?
Currently Selected:
JEREMIAH 20: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
