JEREMIAH 17

Tengektap Judah

1Ki kisire lelutiktap Judah kalamitap karnet kobooto ng'atibindap koita ne ui; ki kimolji mugulelwekwak ak eng' kimnateet ne po kuinoigap kapkorosusyekwak; 2kota kobwaati lagokwak, kapkorosusyekwak, ak Aserik che mi ole mi keetiik che tuonen eng' tuloonook parak, 3ak eng' tulweennyu ne mi kewanin. Achandoi keip tuguuguk che po kamanuut ak konoraiguk tugul, ak komosweguk che torooreen, amu tengekto eng' kiwotosyeguk tugul. 4Ak ibagaaktoi aginye poroteng'ung' ne ki agoonin; ak agoonin ioot puuniguk eng' emet ne mengen: amu ki olaal maat eng' nereegekyuk, ne lalei koigeny.

Mwautik che teer teer

5Mwaei Kamuktaindet ne Toroor kole:

Chuboot chii ne imang'u kipkosabei,

ak kotiegei kipkosabei,

ineendet ne istoegei muguleldanyi Kamuktaindet ne Toroor.

6Amu igeitu sondiit eng' surkwen,

ama keerei ye piitu myeeindo;

ago menyei komoswek che yamyotiin eng' surkwen,

emetap muunyuk ole ma menyei chii.

7Iberuurot chiito ne imang'u Kamuktaindet ne Toroor,

ak ko ne kamang'unennyi Kamuktaindet ne Toroor.

8 # T.Kal 1.3 Amu igeitu ineendet keetit ne ki kiminji ole neegitee peek,

ak kowaktoi tigitikyik eng' ole neegitee aineet,

amaiyweisyei ye piitu kiptoret,

ago tuonitu sogekyik;

ama arageni eng' kenyiitap kemeut,

ama metoi kooi logoek.

9Kaberberin muguleldo kosiir tuguuk tugul,

ak ko ya miising': ng'oo ne imuuchi konai?

10 # T.Kal 62.12; Ng'a 2.23 Anee Kamuktaindet ne Toroor kasiagindetap muguleldo,

atyeme kabwaatutik,

si agoochi chii age tugul ko uu ortinwekyik,

ak logoegap poisyonikyik.

11Ko uu taiywet ne igeenyi aarek che ma chechiik,

uu nooto ne nyooru mogornatosyek ama eng' iman;

petos kota kosabei ineendet,

ak koek ineendet eng' kagesunennyi chiito ne perber.

12Uu kapkorosunnyo ng'echereetap toroornatet,

ne ki kinde ole toroor kobooch taunet.

13Ee Kamuktaindet ne Toroor,

inyee ne ii kamang'unetap Israel,

kiyaei kolililan icheek tugul che metoin;

kisirchin ng'wony icheek che istoenagei,

amu ki kometa Kamuktaindet ne Toroor, kondametutap peek che saptos.

14Isooba, ee Kamuktaindet ne Toroor si asap;

sarwo, si anyoor saruunet;

amu ii kalasunennyu.

15Keero, mwaiwo icheek koleenjino,

“Mi ano ng'olyootap Kamuktaindet ne Toroor? Ingonyo nguno!”

16Ma achakte anee kot abagaakte asubin aek mestowot;

ama amach peetuutap riirek.

Ingen inyee kiit ne ki mang'une kutinnyu;

kimi taing'ung'.

17Amat imua;

ii ole amwechini eng' peetuutap yaityet.

18Ingolilanso che usa,

ago megoono alilan;

ingoaragenso icheek,

ago megoono aaragen:

ipchi icheek peetuutap yaityet,

ak ing'eme icheek ng'emisyet konyil aeng'.

Ng'aleek agobo sabato

19Kimwaiwo Kamuktaindet ne Toroor kole: Ui, itonone ormariichetap piik, ole mang'une laitorinigap Judah, ak komandoe, ak eng' ormariichok tugul che po Jerusalem; 20ak ileenji icheek, Ogas ng'olyootap Kamuktaindet ne Toroor, okweek laitorinigap Judah, ak Judah komugul, ak piik tugul che menyei Jerusalem, che obendi oriit obune ormariichochuuto; 21#Neh 13.15-22 Mwaei Kamuktaindet ne Toroor kole: Oriipkei, amoip laut age tugul eng' peetuutap sabato, anan oibu kobun ormariichogap Jerusalem; 22#Kom 20.8-10; NKNg'a 5.12-14 anan oip lautik eng' kooriikwok eng' peetuutap sabato, amoyai poisyo age tugul: ago otabaan peetuutap sabato, ko uu ye ki ang'at kwanisyekwok; 23ago ma kas, anan koep iit, ago ki iuit kaatwekwak, si ma kas, ak kotaach kaneetisyet.

24Ak ngot oepcha iit eng' kagiiletapkei, mwaei Kamuktaindet ne Toroor, si moibu laut age tugul kobun ormariichogap nganasani eng' peetuutap sabato, ago otabaan peetuutap sabato, amoyai poisyo age tugul eng' peetuunooto; 25pwoonei anyun oriit laitorinik ak pounik che tebee ng'echereetap laitornatet ne po Daudi, kobunu ormariichogap nganasani, kolong'onu kariisyek ak paraisisyek, icheeget ak pounikwak, piigap Judah, ak piik che menyei Jerusalem: ak kemeny nganasani agoi. 26Ak kobwa kobunu nganasoogap Judah, ak komoswek che kiyiem Jerusalem, ak che punu emetap Benjamin, ak emet ne soi, ak che punu tuloonook, ak che punu murot tai, koibu kagoochinoik che kibeelei, ak tiseiywek, ak kagoochinoigap peek che ng'ootiin, ak tuguuk che nyamdut, ak koibu korosegap kongoi, kobwa kootap Kamuktaindet ne Toroor. 27Ago ngot ko mogasa iit otabaan peetuutap sabato, amoip laut age tugul ak obe oriit obun ormariichogap Jerusalem eng' peetuutap sabato; alaal anyun maat eng' ormariichokyik, si kobeel kooriigap laitoryat che po Jerusalem, ama kimisi.

Currently Selected:

JEREMIAH 17: KAPR

Highlight

Copy

Compare