JEREMIAH 16
16
Nyalilwogik che pwoonei
1Ki nyoonjo kogeny ng'olyootap Kamuktaindet ne Toroor, koleenjo, 2“Metunisyei, amesiche weeriik anan tiibiik eng' olito. 3Amu mwaei Kamuktaindet ne Toroor agobo weeriik ak tiibiik che kisikyin olito, agobo kametisyekwak che sichei icheek, ak agobo kwanisyekwak che ki sich icheek eng' emoni kole: 4‘Pegu icheek eng' meet ne ng'waan; ma kiriirchin, ama kitubei. Igeitu ng'atateek eng' ng'wony ak ki pare rotwetap chok ak rubeet; si koek muuswekwak amitwogigap toriitigap parak ak tyong'igap ng'wony.’ ”
5Amu mwaei Kamuktaindet ne Toroor kole amewe koot ne kiriirye, amewe itee, anan iriirchi icheek: amu ki aiste kalyennyu eng' pichu, mwaei Kamuktaindet ne Toroor, nooto ko chamyennyu ne tala ak rireenennyu ne po chamyet. 6Pekyin emoni che eecheen ak che mengeechen: ma kitubei, ama iteitos piik agobo icheek, anan kotilgei, ama icheru metowekwak; 7ama putuli piik magatiinik agobo icheek amu riirek, si kogaigai icheek amu piik che kabek; ama igoochin koe kigombetap kagaigaet agobo kwanisyekwak ak kametisyekwak.
8Amewe kootap igoorto, otebi ak icheek, oamisye ak oee. 9#Jer 7.34; 25.10; Ng'a 18.23 Amu mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Ogeero, agoochini kosiis eng' taing'wong', ak eng' peetuusyekwok, tuugeetap poiboiyet ak ne po kagasetapkei, ne po sandet ak ne po murereet, eng' olito. 10Ak ye tuun iboorchi pichu ng'aleechuuto tugul, ak koleenjin, Amu nee si komwa Kamuktaindet ne Toroor yaityoni oo agobo acheek? Anan nee yaityennyo? Anan nee tengektonyo ne kigeyachi Kamuktaindet ne Toroor, Kamuktaindennyo? 11Ileenji anyun icheek, Amu ki kometa kwanisyekwok, mwaei Kamuktaindet ne Toroor, ak kosubot kanamonik che teer, ak koot ak kolas, ak kometaa, ama riip ng'atuutikyuk; 12ak ki oyai yaityet kosiir kwanisyekwok; amu, ogeero, wendoti age tugul eng' okweek kosubi uuindap muguleldanyi ne ya, kot koma oepcha iit: 13atimdok anyun omande eng' emoni obe emet ne tomo onai, okweeget anan kwanisyekwok; ak oot kamuktaik che teer eng' olooto peet ak kemoi; amu ma rireenok.
Weegunetapkei ne po Israel
14Nooto anyun, ogeero, pwoonei peetuusyek, mwaei Kamuktaindet ne Toroor, ne ma kemwaei kogeny keele, Ko uu ye sabei Kamuktaindet ne Toroor, ne ki imut piigap Israel komang'une emetap Misiri; 15ago, kileen, Ko uu ye sabei Kamuktaindet ne Toroor, ne ki imut piigap Israel eng' emetap murot kaataam, ak eng' emotinwek tugul che kiga koonji icheek: ak amutu icheek kogeny kobwa emennywa ne ki agoochi kwanisyekwak.
Kergong'yet ne nyoonei
16Ogeero, ayooktoi keguur ramik che chaang' che po njireenik, mwaei Kamuktaindet ne Toroor, si kobiit koram icheek; ak ye ibata ayookte keguur kiplogotinik che chaang', si kobiit kocheeng'at icheek eng' tulweet age tugul, ak eng' tulweet age tugul ne ming'in, ak eng' kebenonik. 17Amu ageere emotinwekwak tugul: ma ung'ootiin eng' tainnyu, ama ung'aat tengektonywa si ma keer. 18Ak ayaaktochini korook yaityennywa ak tengektonywa konyil aeng'; amu ki kong'wanit icheek emennyu eng' muuswegap tuguukwak che samis, ak kigonyiit porotennyu tuguukwak che kiwechei. 19Ee Kamuktaindet ne Toroor, kimnateennyu, ak ko irimennyu, ak ole amwechini eng' peetuutap nyalildanyu, pwonjinin pororyosyek kobunu ole poochin ng'wony, ak komwa kole, ma nam kiy kwanisyekyok kobatee lembechek, tangoita ak tuguuk che ma tinyei kelunet. 20Tos yachingei chiito kanamonik, che ma kamuktaik?
21Nooto anyun, ogeero, agoochini konai, agoochini konai eunnyu ak kamugennyu, konyil niito agenge; ak konai icheek kole kainennyu ko Kamuktaindet ne Toroor.
Currently Selected:
JEREMIAH 16: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
