JEREMIAH 15
15
Kirwooget eng' piigap Judah
1 # Kom 32.11-14; Kai 14.13-19; 1Sam 7.5-9 Yeityo koleenjo anyun Kamuktaindet ne Toroor, agot nganda kiga tononso Musa ak Samuel eng' tainnyu, ko matokyingei kabwaatutikyuk pichu. Iste eng' tainnyu, koba. 2#Ng'a 13.10 Ak ngo teebenen koleenjin, kibendi ano? Imwachi anyun ileenji,
mwaei Kamuktaindet ne Toroor kole,
Che po meet, kobendi meet,
che po rotwetap chok, kobendi rotwetap chok,
che po rubeet, kobendi rubeet,
ak che po luuleet, kobendi luuleet.
3Ang'atyini icheek tuguuk ang'wan, mwaei Kamuktaindet ne Toroor: rotwetap chok ne parisyei, sesenik che isongiririsyei, toriitigap parak ak tyong'igap ng'wony, si koamis ak kong'emis. 4#2Lai 21.1-16; 2A.Pet 33.1-9 Ak agoite icheek kewiirchi komosi ak komosi eng' pounatosyek tugul che po ng'wony, amu kiit ne ki yai Manasseh weeriitap Hezekiah ko laitoryatap Judah eng' Jerusalem.
5Amu ng'oo ne tos rireenen, ee Jerusalem?
Anan ng'oo ne riirchinin?
Anan ng'oo ne tos mosyok koteebenak chametapkei?
6Ki oeesya, mwaei Kamuktaindet ne Toroor,
ak ki ochuchuige.
Ara achuule anyun eunnyu atokyin,
asi ang'emin,
amu kaang'et eng' muitaet.
7Ki arur icheek eng' kiit ne kirurse,
eng' ormariichogap emet,
ki agoochi kobegune lagok ak ki ang'em piikyuk,
amu tomo koweek eng' ortinwekwak.
8Atese mosoogikwak eng' anee kosiir ng'aniegap nyanjosyek.
Amutyini icheek luulindet petkwen kobar kametap murenik.
Agoochini koche ineendet tiritindo ak kamuisosyek.
9Nyaluli ineendet ne kigosich lagok tisap, meei;
ak roroktoi asiistanyi kota ko peet; ililani ak kotoptoben.
Agoitoi che ng'etu eng' icheek kobar rotwetap chok eng' taitap puunikwak,
mwaei Kamuktaindet ne Toroor.
Koriirchin `Jeremiah Kamuktaindet ne Toroor
10Pwo eng' anee, ee kamennyu, amu kisicha aek chii ne po pooryeet,
ne ibeligei ak ng'wony komugul!
Tom abesende si anyoor keljinet ne siirei,
ak kotomo kobesendaiwo piik,
si konyoor keljinet ne siirei;
ago chubo age tugul eng' icheek.
11Ki mwa Kamuktaindet ne Toroor kole, agimiitin iman agobo kiit ne myee. Eng' iman agoochini puunyoot kogaigain eng' peetuutap yaityet ak eng' peetuutap usiisyet. 12Tos imuuchi chii koiri karnet, karnet ak sugunwet ne punu murot kaataam?
13Agoitoi tuguuguk ak konoraiguk keluul koma eng' alyet, amu tengekwogiguk tugul eng' kiwotosyeguk tugul. 14Agoonok obe ak puunikwok emet ne mongen. Amu kagolal maat ne lalenen eng' nereegekyuk. 15Ak ki amwa ale, Ee Kamuktaindet ne Toroor, ingen inyee:
“Ibwaata, ak irutocha.
Iyooktoiwo mugetuut eng' usiikyuk,
ameistoena muitaeng'ung'.
Nai ile ki anyooru chotisyet amu inyee.
16Kingo piit ng'aleeguk, aam,
ak ki ek ng'aleeguk eng' anee poiboiyet ak kagasetapkei ne po muguleldanyu.
Amu kimwaitoena kaineng'ung', ee Kamuktaindet ne po Toroornatet ne po lugoosyek.
17Ma ki tebi ak tuiyetap icheek che urerendos,
anan abaibaitu;
ki atebi aneege amu eung'ung';
amu ki inyiita nereegek.
18Amu nee si kobunji agoi ng'wanindanyu,
ama inyaaksei moennyu ne ma kimuuchi kinya?
Tos iegu eng' anee iman kereruut ne iberberisyei,
ko uu peek che teng'dos?”
19Ara mwaei anyun Kamuktaindet ne Toroor kole,
ngot iweekyogei, amutun kogeny,
si kobiit itonon eng' tainnyu,
ak ngot inemu kiit ne myee komong' eng' kiit ne ya,
iigeitu kutinnyu.
Iweekyiningei icheek,
ago meweekyinigei icheek.
20Ayain eng' pichu iegu irimeet ne ng'ootaat ne po sugunwet;
obargei ak icheek ago ma iterteerin,
amu ami kobooten si asaruun ak atyachin,
mwaei Kamuktaindet ne Toroor.
21Asaruun eng' eutap kiptengeginik,
ak atyachin eng' eutap che imuisei.
Currently Selected:
JEREMIAH 15: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
