KIRWOOGIK 11
11
Koterteeri `Jephta Ammonik
1Ki nyiganeet ne kiim ak ko po lugeet Jephta Gileadindet. Ki sich `Gilead Jephta ago kamennyi ko ki chepkugoniot. 2Ki sich `osotyotap Gilead weeriik, ak kingo kagoeegitu weeriichooto, koon Jephta kwo komanda, koleenji ineendet, “Mesiche kiy eng' kootap abba, amu ii weeriitap kwondo age.” 3Komwei anyun Jephta eng' ole mi tupchosyekyik, ak kwo komeny emetap Tob. Eng' peetuusyek che matya ko ki iyumjigei Jephta piik che njaamik, ak ki isubot kobendat kobooto ineendet.
4Kingo pata peetuusyek alak, koyai lugeet lagogap Ammon ak Israel. 5Kingo yai lugeet lagogap Ammon ak Israel, koba poisyegap Gilead komut Jephta eng' emetap Tob. 6Ki leenji `icheek Jephta, “Nyoo egu kiptaiyandennyo, si kobiit kebarge ak lagogap Ammon.” 7Ago ki leenji `Jephta poisyegap Gilead, “Tos ki ma owecha, ak oona eng' kootap abba? Amu nee anyun si obwanjo ye otinye nyalilda?” 8Ki leenji `poisyegap Gilead Jephta, “Kagiweekyinge kogeny amu nooto, si kobiit keebe tugul kobooten, kebarge ak lagogap Ammon, si iegu pounindennyo ne ibou piik tugul che menyei Gilead.” 9Ki leenji `Jephta poisyegap Gilead, “Ngot omuta kaa kogeny kebarge ak lagogap Ammon, ak ngot kogoon Kamuktaindet ne Toroor katerteerisyet agobo icheek eng' tainnyu, aegu pounindeng'wong'?” 10Ak ki leenji poisyegap Gilead Jephta, “Egu Kamuktaindet ne Toroor paoryat eng' kwenunnyo, kiyae iman ko uu ng'olyoondeng'ung'.” 11Ki wo Jephta anyun kobooto poisyegap Gilead, ak ki yai `piik ineendet koek pounindet ak kiptaiyat ne pou icheek. Ki mwa Jephta ng'aleekyik tugul eng' taitap Kamuktaindet ne Toroor eng' Mispa.
12Ki iyookto `Jephta piik koba kaplaitoryatap lagogap Ammon, koleenji, “Iting'ena nee, kot inyoonjo iyai lugeet ak emennyu?” 13Ki wolji laitoryatap lagogap Ammon piik che kiga iyookto Jephta, koleenji, “Amu ki ip Israel emennyu, ye kitogosu kobunu Misiri, kobooch Arnon agoi Jabbok, kot koit Jordan, ara weekwa anyun emotinwechooto eng' kaalyeet.”
14Ak ki iyookto `Jephta piik kogeny koba kaplaitoryatap lagogap Ammon: 15ak ki pa komwa pichooto kole, Kamwa Jephta kole: “Ma ip Israel emetap Moab, anan ko emetap lagogap Ammon. 16Ye kitogosu Israel eng' Misiri, kobwa kobun surkwen agoi Araraita ne Piriir ak ki pwa agoi Kadesh, 17#Kai 20.14-21 koyookto anyun `Israel piik koba kaplaitoryatap Edom koleenji, ‘Kaigai chamwo abun emeng'ung', ago ma cham laitoryatap Edom.’ Ak ki iyookto piik ko uu nooto koba kaplaitoryatap Moab, ago ma cham; ak ki meny Israel Kadesh. 18#Kai 21.4 Yeityo kobun surkwen, koyiem icheek emetap Edom ak emetap Moab. Ki pun icheek kong'asiis ne po emetap Moab ak koteech Arnon pitoniin. Ago ma siir icheek kiwotetap Moab, amu aineetap Arnon ko ki kiwotetap Moab. 19#Kai 21.21-24 Ki iyookto Israel piik koba kap Sihon laitoryatap Amorik, ne ki pou Hesbon. Ki leenji `Israel ineendet: Kaigai, ichamwech kebun emeng'ung', keebe oldanyo. 20Ago ma iyan Laitoryat Sihon kobun Israel kiwotennyi. Ki iyum Sihon piikyik tugul ak koteech Jahas, ak kobargei ak Israel. 21Ki inde Kamuktaindet ne Toroor, Kamuktaindetap Israel, Sihon ak piikyik tugul eutap Israel, ak ki par icheek. Konam anyun Israel emet tugul ne po Amorik kobunji, icheeget che ki menyei emonooto. 22Ki nam kiwoteet tugul ne po Amorik kobunji, kobooch aineetap Arnon agoi aineetap Jabbok, ak kobooch surkwen agoi Jordan. 23Ki oon anyun Kamuktaindet ne Toroor, Kamuktaindetap Israel Amorik koba eng' taitap piikyik Israel. Imuuchi anyun inyee inam kobunjiin? 24Tos meibe kobunjiin ne kigoonin Kemos kamuktaindeng'ung'? Nooto anyun, age tugul ne oonei Kamuktaindet ne Toroor, Kamuktaindennyo eng' tainnyo, kename chooto kobunjech. 25#Kai 22.1-6 Tos ii kaigai inyee eng' kiy age tugul isiir Balak weeriitap Sipor, laitoryatap Moab? Tos kiboryo ak Israel? Tos ki yachi `inee icheek lugeet? 26Ye kita komenyei Israel Hesbon ak nganasookyik, Aroer ak nganasookyik ak eng' nganasook tugul che mi tabandap Aineetap Arnon eng' kenyiisyek pogol somok, kolya si moip eng' peetuusyechooto? 27Tom ayaun anee tengek, ago keyai ne ya iyaiywo lugeet. Ingoek Kamuktaindet ne Toroor kirwoogindet, ne koonu kirwooget rani eng' kwenutap piigap Israel ak lagogap Ammon.” 28Ago ma kas laitoryatap lagogap Ammon ng'aleek che ki iyookyi Jephta ineendet.
29Ki nyoonji anyun `Kabuuusetap Kamuktaindet ne Toroor Jephta, ak kilandae Gilead ak Manasseh, kilandae Mispa ne po Gilead, ak kong'etee Mispa ne po Gilead kwo kolanda kot koit ole mi lagogap Ammon. 30Ak ki yai Jephta kaarortaet koarorchi Kamuktaindet ne Toroor kole, “Ngot inde iman eunekyuk lagogap Ammon, 31ko kiy age tugul ne torookwo eng' kurgennyu, ye tuun aweeksei eng' kaalyeet, abunu ole mi lagogap Ammon, kobunjin kiyooto Kamuktaindet ne Toroor, si agoito koek kagoochinet ne kibeelei.”
32Ki landa anyun Jephta kwo ole mi lagogap Ammon, kobargei ak icheek; ak ki inde `Kamuktaindet ne Toroor icheek eunekyik. 33Ak ki par icheek, kong'etee Aroer kot koit Minit, nganasook tiptem, kot koit Abel-keramim, ki par eng' pareet ne oo kot. Ki kiterteer anyun lagogap Ammon eng' taitap piigap Israel.
34Ye ki nyo koweeksei Jephta koonnyi eng' Mispa, ogeero, ki mong' cheptonyi kotorook ineendet kotinyei sugutisyek che mengeechen kotyenonu. Ki lakweennyi nooto ne ineegei, amu ki ma kotinyei weeriit anan chepto age. 35#Kai 30.2 Kingo keer ineendet, kobet ngoroikyik ak kole, “Pwo! Cheptonyu! Kegoono anyeratit, ak ii age eng' che inyalila amu koang'aang'ji Kamuktaindet ne Toroor kutinnyu, ama aweechigei let.”
36Koleenji `lakwanooto ineendet, “Abba, koing'aang'ji kuting'ung' Kamuktaindet ne Toroor, ara yaiywo ko uu kiit ne kobun kuting'ung', amu kogoyaaktaun Kamuktaindet ne Toroor mugetuut eng' puuniguk, eng' lagogap Ammon.” 37Kotestai koleenji kwandanyi, “Ingeyaiywo ng'olyoondoni: chamwo atebi aneege arawek aeng', si kobiit awo anee ak choronokyuk tuloonook parak ak ariirchi pergeinatennyu.” 38Ak ki wol kole, “Ui.” Ak ki leenji kwo arawek aeng'. Ki wo anyun, ineendet ak choronokyik, ak koriirchi pergeinatennyi eng' tuloonook. 39Kingo keskei arawek aeng'u, koweektagei ole mi kwandanyi, ak ki yachi ineendet ko uu kaarortaennyi ne kiga koaror. Ak ki tomo kotuiyo ak muren. Ara ki ek niito piteet eng' Israel, 40keele, pendi tiibiigap Israel kenyiit age tugul koyaei kabwaatet agobo cheptap Jephta Gileadindet eng' peetuusyek ang'wan eng' kenyiit age tugul.
Currently Selected:
KIRWOOGIK 11: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
