KIRWOOGIK 12
12
Kobortos Ephraim ak Jephta
1Ki iyumgei piigap Ephraim ak koba kotokyigei murot kaataam. Ki mwachi `icheek Jephta koleenji, “Amu nee si ilande obargei ak lagogap Ammon, ama imwaiwech keebe tugul? Kibeeldoin koong'ung'.”
2Ak ki wolji `Jephta icheek koleenji, “Ki kitinye anee ak piikyuk pooryeet ne oo ak lagogap Ammon, ak ye ki aguurok koma osarwo eng' eunnywa. 3Ak ye ki ageer ale ma osarwo, ande saboondanyu ng'oiyondit, alande kebargei ak lagogap Ammon, ak ki inde `Kamuktaindet ne Toroor icheek eunnyu. Ara amu nee anyun si obwanjo rani, oboryena?”
4Yeityo koyum `Jephta piik tugul che po Gilead ak kobargei ak Ephraim. Ki par piigap Gilead Ephraim, amu ki le, “Okweek Gileadik ko ki omweune Ephraim, che omi kwenutap Ephraim, ak kwenutap Manasseh.” 5Ki nam Gileadik tabarwegap Jordan, koger Ephraimik. Ak ye mwa che kimweune Ephraim, kole, “Chamwo alanda,” koleenji ineendet piigap Gilead, “Ii Ephraimindet?” Ye le, “Achicha,” 6koteebe koleenjin, “Mwaa le ‘Shiboleth’; koleen, ‘Siboleth’; ” amu ki ma komuuchi komwa komyee. Kenamei anyun inee ak kebar sainooto eng' tabarwegap Jordan. Ki pek eng' peetuunooto Ephraimik eliphuusyek artamu ak aeng'. 7Ki irwookyi `Jephta Israel kenyiisyek lo. Yeityo kome Jephta Gileadindet, ak ki kitupchi nganaseet age ne po Gilead.
Kirwoogik Ibsan, Elon ak Abdon
8Kingo pata Jephta korwookyi Ibsan ne po Bethlehem Israel. 9Ki tinyei weeriik sosom ak tiibiik sosom che ki igoito kitunoot eng' komoswek alak, ak ki imutyi weeriikyik tiibiik sosom che po komoswek alak. Ak ki irwookyi Israel kenyiisyek tisap. 10Kime Ibsan ak ki kitupchi Bethlehem.
11Kingo pata ineendet, korwookyi Elon Sebulunindet Israel. Ki irwookyi Israel kenyiisyek taman. 12Kime Elon Sebulunindet agine ak ki kitupchi Aijalon eng' emetap Zebulun.
13Kingo pata Elon, korwookyi Abdon weeriitap Hilel Piratonindet Israel. 14Ki tinyei weeriik artam ak weeriik sosom che po weeriikyik che ki laanyei moek tamanwogik tisap che po sigiroik. Ki irwookyi Israel kenyiisyek sisiit. 15Kime Abdon weeriitap Hilel Piratonindet ak ki kitupchi Piraton eng' emetap Ephraim, eng' emetap tuloonook ne po Amelegik.
Currently Selected:
KIRWOOGIK 12: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
