KIRWOOGIK 10
10
Koegu Tola laitoryat eng' Israel
1Kingo pata peetuusyegap Abimelek kong'eet Tola weeriitap Pua, weeriitap Dodo, chiitap Issakar, kosar Israel. Ki menyei ineendet Samir eng' emetap tuloonook ne po Ephraim. 2Ki irwookyi Israel kenyiisyek tiptem ak somok, kime anyun ineendet ak ki kitupchi Samir.
Koegu Jair laitoryat eng' Israel
3Kingo pata peetuusyegap Tola, kong'eet Jair, Gileadindet. Ki irwookyi Israel kenyiisyek tiptem ak aeng'. 4Ki tinyei weeriik sosom che ki laanyei moek sosom che po sigiroik, ak ki tinyei nganasook sosom che kiguure Habot-jair agoi ra, che mi emetap Gilead. 5Kime anyun Jair ak ki kitupchi Kamon.
Konyalili `Amonik Israel
6Ki yai piigap Israel yaityet kogeny eng' taitap Kamuktaindet ne Toroor. Ki oot `icheek Baalik ak Astarot, ak kanamonigap Syria ak che po Sidonik, kanamonigap Moab ak che po Amonik ak che po Philistiik. Ki meto `icheek Kamuktaindet ne Toroor ak mata koot ineendet. 7Ki nereech kot anyun Kamuktaindet ne Toroor agobo Israel ak ki aldochi `icheek eunegap Philistiik ak eunegap lagogap Ammon. 8Ki iim ak konyaliil piigap Israel kenyinooto. Ak ki inyaliil piigap Israel, chooto tugul che ki mi Jordan pitoniin eng' emetap Amorik, ne mi Gilead, eng' kenyiisyek taman ak sisiit. 9Kilandae Jordan lagogap Ammon koba kobargei ak Judah, Benjamin ak kootap Ephraim. Ki kinyaliil anyun Israel miising'.
10Ki riirchi `piigap Israel Kamuktaindet ne Toroor, koleenji, “Ki keyaun tengekto, amu kigemete Kamuktaindennyo ak kigeot Baalik.” 11Ak ki mwachi Kamuktaindet ne Toroor piigap Israel, koleenji, “Tos ki ma asarwok eng' Misiriik, Amorik, Amonik ak eng' Philistiik? 12Ye ki inyaliilak ak icheek Sidonik, Amelegik ak Maonik, ko ki oriircho ak asarwok eng' eunekwak. 13Ago ki ometa ak oot kanamonik. Nooto anyun, ma asarwok kogeny. 14Oba oriirchi kamuktaik che ki olewen! Ingosarwok icheek eng' peetuutap nyalildang'wong'.”
15Ki leenji `piigap Israel Kamuktaindet ne Toroor, “Kigeyai tengekto. Yaiywech kiit age tugul ne igeere ile nyolu, ago kisaain kityo keele isarwech peetuuni.” 16Ki isto anyun kanamonik che too eng' kwenunnywa ak koot Kamuktaindet ne Toroor. Ak ki iimak saboondanyi amu nyalildap Israel.
17Ki iyumgei anyun lagogap Ammon ak koba koteech Gilead. Ki iyumgei piigap Israel ak icheek ak koteech Mispa. 18Kimwachigei piik, pounigap Gilead, kole, “Ng'oo ne tau kobaregei ak lagogap Ammon? Egu ineendet ne oo eng' tugul che menyei Gilead.”
Currently Selected:
KIRWOOGIK 10: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
