ISAIAH 64
64
1Kata myee ibet kipsengwet, ak ichooruge,
si kobiit kobotanso tuloonook eng' taing'ung';
2ko uu ye peelei maat sigorik, ak ko uu ye iguuti maat peek:
si kibarta kaineng'ung' konaak eng' puuniguk,
si kobotanso pororyosyek eng' taing'ung'!
3Ye ki ngiyai tuguuk che po kamuiset che ki ma kicheeng',
ki ichooruge, kibotanso tuloonook eng' taing'ung'.
4 # 1Kor 2.9 Amu tomo kogas piik kobooch keny,
anan koguiyo eng' itiik, anan kogeer eng' konyekwak Kamuktaindet age ne ma inyee,
ne yaei poisyet agobo chiito ne igeni ineendet.
5Otuitosi ak ineendet ne paibai ak koyaei imanda,
icheeget che ibwaatin eng' ortinweguk:
keero, ki inereech, ak ki kiyai tengekto:
ki keyai chooto peetuusyek che chaang', ak tos kisarwech?
6Amu ki kiige tugul chii ne po simdo,
ak uu imandanyo tugul ngoryeet ne murwoon:
ak kirestosi acheek tugul ko uu sogoot;
ak onech yaitwogikyok ko uu ye onsei usoonet.
7Ama mi ne kuurei kaineng'ung',
ne igiilegei si kobiit konamin:
amu ki iung'enech togeng'ung',
ak ki igeswech amu tengekwogikyok.
8Nganda uu nooto, ee Kamuktaindet ne Toroor, inyee ko ii kwandanyo.
Ki meneet ak inyee ko ii mimiindennyo;
ki poisyonigap euneguk acheek tugul.
9Amat inereech miising', ee Kamuktaindet ne Toroor,
amat ibwaat tengekto agoi!
Keero, keer komyee, kisaain, ki piiguk acheek tugul.
10Ki koek ong'ateet nganasoguk che tiliileen,
koek Zion surkwen,
koek Jerusalem karaatya.
11Kigebeel koonnyo ne tiliil ne karaaran,
ole kilasunenen kwanisyekyok;
Ki kong'emogis tuguukyok tugul che korooron.
12Ee Kamuktaindet ne Toroor, tos ta iranyegei eng' tuguuchooto?
Tos isise, ak inyalilech miising'?
Currently Selected:
ISAIAH 64: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
