ISAIAH 63

Katerteerisyet

1Ng'oo ne punu Edom, ne tinyei ngoroik che ki kisal kobiriritu, eng' Bosra: ne tinyei ngoroik che po toroornatet, kowendi eng' ooindap kimnateennyi? Aneendet ne ang'alaali eng' imanda, ne atinye kamuget asar. 2Amu nee si kobiriritu ngoroiguk, ak uu ngoroiguk che po ne tyechei sabibuk? 3#Ng'a 14.20; 19.13,15 Ki atyech aneege sabibuk eng' ole kitue; ak ki ma komi chii kobooto eng' pichooto; ee, ki atyech eng' nereegekyuk, atyechatyech eng' nereegekyuk che laldos; ak koisegei ngoroikyuk korotiikwak che saptos, ak ki amurwon ngoroikyuk tugul. 4Amu kimi muguleldanyu peetuutap yaaktaetap mugetuut, ak kagoit kenyiitap chechuuk che kityaachi. 5#Isa 59.16 Ak ki ageerote, ama piit ne toretisyei; ak ki akwong' amu ma piit chii ne tiyei age: ki ibwa anyun eunnyu yetunet; ak kitiia nereegekyuk che ng'woneen. 6Ak ki atyech piik eng' nereegekyuk, ak ki agoochi kobogityo eng' nereegekyuk che ng'woneen, ak ki atumji ng'wony korotiikwak che saptos.

Kalasunet ak saaet

7Amwaitoi chamyet ne tala ne po Kamuktaindet ne Toroor, ak kalasunoigap Kamuktaindet ne Toroor, ko uu tugul che ki kogoonech Kamuktaindet ne Toroor; ak myeeindo ne oo eng' kootap Israel, ne Ki kogoochi icheek ko uu rireenosyekyik, ak ko uu chaang'indap chamyennyi ne tala. 8Amu ki mwa kole, piikyuk iman, lagok che ma yaei kaberberisyet: ki ek anyun yetindennywa. 9Ki kinyalil ineendet eng' nyalilwogikwak tugul, ak ki sar icheek malaikaiyandennyi ne ki mi tainnyi: ki ityaach eng' chamyennyi ak rireenennyi; ak kigesen ak koganap peetuusyek tugul che po keny. 10Ago ki ingelelso ak kogoochi arageneet Kabuusennyi ne Tiliil: ki kiwal anyun koek punyonnywa, ak kobargei ak icheek. 11Ki ibwaat anyun peetuusyek che po keny, Musa, ak piikyik, kole, Mi ano ineendet ne ki imut icheek kolong'une nyanjet kobooto mestoweek che po akweennyi? Mi ano ineendet ne ki inde Kabuusennyi ne Tiliil kwenunnywa, 12#Kom 14.21 ne ki chuul eunnyi ne po toroornatet koba kobooto eutap tai ne po Musa, ne kipchei peek eng' tainnywa, si koyachigei kainet ne po koigeny, 13ne ki indochi icheek kobun rireet, ko uu paraisiit eng' surkwen, si ma kinach? 14Ko uu ye choorchingei tuuga atebweet, kogoochi ko uu nooto `Kabuusetap Kamuktaindet ne Toroor icheek komuuny: ki indochi anyun piiguk, si kobiit iyachigei kainet ne toroor. 15Keer anyun ng'wony eng' kipsengwet, ak igeer eng' meng'ootetap tiliilindang'ung' ak ko po toroornateng'ung'. Mi ano kagiileng'ung' pogei ak poisyoniguk che po kamuktaet? Kaietena rireenetap muguleldang'ung' ak rireenosyeguk. 16Amu ii kwandanyo, agot ngo ma ingenech Abraham, ama naech Israel; ee, Kamuktaindet ne Toroor, inyee ko ii kwandanyo; kaineng'ung' ko katyagindennyo kobooch keny. 17Ee, Kamuktaindet ne Toroor, amu nee si igoonech kemaste eng' ortinweguk, ak iuuit mugulelwekyok si ma kiywein? Weege amu otwogiguk, pororyosyegap poroteng'ung'. 18Ki nyaban piiguk che tiliileen; ago ne matya kotyech puunikyok oldang'ung' ne tiliil. 19Kageige piik che kitom ibou; ko uu icheeget che ma kimwaitae kaineng'ung'.

Currently Selected:

ISAIAH 63: KAPR

Highlight

Copy

Compare