ISAIAH 65

Kirwooget ak saruunet

1 # Rom 10.20 Teeba piik che ki ma koteeba; kigonyoorwo icheek che ki ma cheeng'a: ki aleenji pororyet ne ki ma kemwaitae kainennyu, Ogeera, ogeera. 2#Rom 10.21 Ki aitoochi eunekyuk peet komugul piik che ingeleldos, che pendote ooreet ne ma karaaran, che pendote kabwaatutikwak; 3piik che tacha kimni kotugul, koeng'sei eng' mbareenik, ak kobeelei nyamdutik eng' matubaruuk parak; 4che teebote kereeriisyek, ak komenyei komoswek che po ung'oot; che amei panyeegap toorook, ak mi tereenikwak suutegap tuguuk che kiwechei. 5Che mwaei kole, tonon inyegei, ameriikyo, amu aa tiliil asiirin: chuuto ko iyeto eng' serunnyu, maat ne lalei peetuut komugul. 6Ogeero, siraat eng' tainnyu: masise, ago ayaaktoi, ee ayaakyini andochini tegetikwak, 7tengekwogikwok, kobooto tengekwogigap kwanisyekwok, mwaei Kamuktaindet ne Toroor, che ki kobeel nyamdutik eng' tuloonook, ak kochuba eng' tuloonook che mengeechen: ageerchini anyun poisyonikwak che po tai, andochini tegetikwak. 8Mwaei Kamuktaindet ne Toroor kole, ko uu ye kinyoorchin divaik che leelach logoek che irurugotin eng' temeet, ak kole age, Ameng'em, amu mi kaberuret tuguuchooto: ayae anyun ko uu nooto agobo otwogikyuk, si ma ng'em icheek tugul. 9Ak amutu ne ki kiii eng' Jakobo, ak amutu eng' Judah nyabanindetap tuloonookyuk, ak kobunji yooto chechuuk che ki kilewen, ak komenyei yooto otwogikyuk. 10#Jos 7.24-26 Ak koek Saron piutap akwotisyegap keechiirek, ak koek atebweetap Akor ole ruiye akwotisyek, amu piikyuk che ki kocheeng'a. 11Ago okweek che ometoi Kamuktaindet ne Toroor, che outye tulweennyu ne tiliil, che ochobe meset agobo Kelunet, ak che onyiityini Kagesunet divaik che ki kiburuch: 12aityinok anyun rotwetap chok, ak ong'uruukyini tugul parisyet: amu kinga kuurse, koma kowolu; kinga ng'alaal, koma ogas; ago ki oyai yaityet eng' tainnyu, ak ki olewen ne ma paibaitune. 13Mwaei anyun Kiptaiyat Kamuktaindet ne Toroor kole, ogeero, tuun amisyei otwogikyuk, ago amok rubeet: ogeero, tuun eeisei otwogikyuk, ago amok melel: ogeero, tuun paibaitu otwogikyuk, ago olilandosi: 14ogeero, tyendos otwogikyuk amu poiboiyetap mugulelwekwak, ago orirtosi eng' arageneetap muguleldo, oteitosi amu ng'wanindap muguleldo. 15Ak omete kaineng'wong' koek chubisyet eng' chechuuk che ki alewen, ak kobarin Kiptaiyat Kamuktaindet ne Toroor; ak koguur otwogikyik eng' kainet age: 16si koek ne iberuuregei eng' ng'wony ne iberuuregei eng' Kamuktaindet ne po iman, ak koek ne iyastos eng' ng'wony ne iyastos eng' Kamuktaindet ne po iman; amu kigeutye nyalilwogik che po tai, amu kigeuny si ma ageere.

Kipsengwet ne leel ak ng'wony ne leel

17 # Isa 66.22; 2Pet 3.13; Ng'a 21.1 Ogeero, atau ayae kipsengwet che leelach ak ng'wonyut ne leel: ama kibwaati tuguuk che po tai, ama kochutei metit. 18Ago ogaaskei ak oboiboitu agoi agobo kiit ne atau ayae: amu atau ayae Jerusalem koek ne kiboiboitune, ak koek piikyik poiboiyet. 19#Ng'a 21.4 Ak abaibaitune Jerusalem, abaibaitune piikyuk: ama kegasei ne riirei eng' nganasanooto, anan tuugeet ne po riirek. 20Ma piitu eng' olooto kogeny lakweet ne po peetuusyek che ng'ering' anan poiyot ne ma ilil: amu meei lakweet ko po kenyiisyek pogol, ak kechubei kiptengekyot ne po kenyiisyek pogol. 21Ak koteech kooriik, ak komeny; ak komiin sabibuk eng' mbareenik, ak koam logoekwak. 22Ma teeksei icheek, si konyo komeny age; ama minsei icheek, si konyo koam age: amu igeitu peetuusyegap keetit peetuusyegap piikyuk, ak koboiboitune chechuuk che ki alewen, poisyonigap eunekwak. 23Ma poisyei puch, ama ichin nyalil, amu icheeget ko iyoteetap che iberuurotin che po Kamuktaindet ne Toroor, kobooto lagokwak. 24Ak ye tomo koguurso, awolu; ak ye ta kong'alaali, agas. 25#Isa 11.6-9 Ageti suiyot ak aarwetap keechiir, ak koam ng'etundo susweek ko uu teta: ak koek ng'ung'unyek amitwogigap ereneet. Ma itoi kiy chii anan kong'emis eng' tulweennyu tugul ne tiliil, mwaei Kamuktaindet ne Toroor.

Currently Selected:

ISAIAH 65: KAPR

Highlight

Copy

Compare