ISAIAH 62

Kainet ne leel ne po Zion

1Masise agobo Zion, amamuunyi agobo Jerusalem, agoi komanda imandanyi ko uu kaluunet, ak komanda yetunennyi ko uu tait ne lalei. 2Ak kogeer pororyosyek imandang'ung', ak kogeer laitorinik tugul toroornateng'ung': ak keguurenen kainet ne leel, ne tuun kuurenen Kamuktaindet ne Toroor. 3Iegu kogeny naaryeetap korooronindo eng' eutap Kamuktaindet ne Toroor, ak iegu naaryeetap laitornatet eng' eutap Kamuktaindeng'ung'. 4Ma keguurenen kogeny Ne Ki kimeto; ama keguure emeng'ung' kogeny Karaita: ago kiguurenen Hepsi-ba, ak keguure emeng'ung' Beula: amu paibaitunenen Kamuktaindet ne Toroor, ak kitun emeng'ung'. 5Amu ko uu ye ituni mureno pergeiyat, uu nooto tuun itunin weeriiguk: ak ko uu ye paibaitu sandet eng' murereet, ko uu nooto, tuun poiboitu Kamuktaindeng'ung' eng' inyee. 6Kande riibiik irimoiguk, ee Jerusalem; ma koi siisyo peet anan kemoi; amomuunyi okweek piik che obwaatyini Kamuktaindet ne Toroor, 7amogoochini ineendet komuuny, agoi kogimit Jerusalem ak koyai koek kalasunet eng' ng'wony. 8Ki koyosyo Kamuktaindet ne Toroor eng' eunnyi ne po tai, ak eng' eutap kimnateennyi, kole, iman, ma agoitoi peeguk koek amitwogigap puuniguk; ama koee toek divaiguk, che ki iyai: 9ago amei icheek che ki konori, ak kolas Kamuktaindet ne Toroor; ak koee icheek che kiyumi, eng' seremusyegap oldanyu ne tiliil. 10Omande, omandae ormariichok; ochop ooreetap piik; ochop, ochop ooreet ne oo; oiste koik; onamji parak songolyet agobo piik. 11#Isa 40.10; Ng'a 22.12 Ogeero, kagomwaita Kamuktaindet ne Toroor agoi tabandap ng'wony, kole, oleenji cheptap Zion, Keero, nyoonei yetuneng'ung'; keero, mi melektanyi kobooto ineendet ak mi yaaktaennyi tainnyi. 12Ak koguure icheek, Piik che tiliileen, Che ki kotyach Kamuktaindet ne Toroor: ak keguurenen, Ne Ki kicheeng', Nganaseet ne ma kimeto.

Currently Selected:

ISAIAH 62: KAPR

Highlight

Copy

Compare