ISAIAH 60

Toroornatetap Zion

1Ng'eet, iluu; amu kagoit lapkeiyeng'ung', ak kagochorchin toroornatetap Kamuktaindet ne Toroor. 2Amu, keero, tuchei mesundeito ng'wony, ak kotuch mesundeito ne oo pororyosyek: ago chorchinin Kamuktaindet ne Toroor, ak kotook toroornatennyi eng' inyee. 3Ak kobwonji pororyosyek lapkeiyeng'ung', ak kobwonji laitorinik kaluunetap choruneng'ung'. 4Ing'eet met ak igeer komoswek tugul: iyumigei icheek tugul, ak kobwonjin: punu weeriiguk ole loo, ak keganabu tiibiiguk. 5Igeer anyun ak kikwenyin, ak kobotan muguleldang'ung' ak ki paraa; amu pwonjinin chaang'indap nyanjosyek, pwonjinin mogornatosyegap pororyosyek. 6Tuchin chaang'indap tambeesik, kobooto moegap tambeesik che po Midian ak Ephah; punu tugul Sheba: ibu thahabu ak tuguuk che nyamdut, ak komwaita kalasunoigap Kamuktaindet ne Toroor. 7Kiyumjinin akwotisyek tugul che po keechiiregap Kedar, koboisyeun mengichigap Nebaiot: pwoonei amu taachaksei eng' kaptisisyennyu, ak atoroori kootap toroornatennyu. 8Ng'oo chu rwaei ko uu pooldet, ak kotirirendos cheptugenik eng' tirisyokwak? 9Igeno iman ngeguusyek, ak sip kogeno melisyek che po Tarsis, si kobiit komut weeriiguk eng' ole loo, koibu fedhaisyekwak ak thahabusyekwak, agobo kainetap Kamuktaindet ne Toroor Kamuktaindeng'ung', ak agobo Ineendet ne Tiliil ne po Israel, amu ki kotoroorin. 10Ak koteech toek irimoiguk, ak koboisyeun laitorinikwak: amu ki abirin eng' nereegekyuk, ago ki ariirenen amu chamennyu. 11#Ng'a 21.25-26 Kiyatei kogeny ormariichoguk kotugul; ma kigerei peet anan kemoi; si koibun piik mogornatosyegap pororyosyek, kobooto laitorinikwak che kimutu. 12Amu lusei pororyet ak pounateet ne ma poisyeun; ee, king'emei pororyosyechooto kobetyo. 13Nyonjinin toroornatetap Lebanon, kobooto piribirinik, taragonik che sabuleen, ak taragonik che teer; si koyai konyool oldanyu ne tiliil, ak achop ole tebee keelyekyuk kogararanit. 14#Ng'a 3.9 Ak kobwonjin weeriigap icheeget che ki inyaliilin kong'uruugonu; ak kogutung'so eng' keldebesaigap keelyeguk icheek tugul che kisasin; ak koguurenen, Nganaseetap Kamuktaindet ne Toroor, Zion ne po Ineendet ne Tiliil ne po Israel. 15Ak ko uu ye kiga kebagaakten, ak kewechin, kot ko ki ma kota komi chii ne kibunei kwenung'ung', ayain anyun iegu telunateet ne po koigeny, poiboiyetap ibinwek che chaang'. 16Ichuchuni kogeny cheegap pororyosyek, ak irerye kinaigap laitorinik: si kobiit inai ile anee Kamuktaindet ne Toroor, ko aa yetindeng'ung', ak ko katyagindeng'ung', Ineendet Ne po Kamuktaet ne po Jakobo. 17Aibu thahabu ageere sugunonik, ak aibu fedha ageere kariik, ak ageere sugunonik keetiik, ak ageere kariik koik: ak ayai kogeny kiptainiguk koek kaalyeet, ak ayai kayagiguk koek imanda. 18Ma kegasei kogeny koroomnateet eng' emeng'ung', anan kobiit kubernateet ak ng'emisyet eng' kiwotosyeguk; ago tuun iguure irimoiguk Yetunet, ak iguure ormariichoguk Kalasunet. 19#Ng'a 21.23; 22.5 Ma koegu asiista lapkeiyeng'ung' peet: ama kogoonin lapkeiyet kaluunetap arawet: ago egu Kamuktaindet ne Toroor lapkeiyeng'ung' ne po koigeny; ak koek Kamuktaindeng'ung' toroornateng'ung'. 20Ma kororoktoi asiistang'ung', ama komeei araweng'ung': amu egu Kamuktaindet ne Toroor lapkeiyeng'ung' ne po koigeny, ak kogeskei peetuusyegap riireguk. 21Ak koek che po imanda kogeny piiguk tugul, ak koek emet porotennywa koigeny; temeet ne ki amin, poisyetap eunekyuk, si kobiit kegonyita. 22Egu ne ming'in eliphuut, ak koek ne ming'in pororyet ne kiim: achokyini nooto anee Kamuktaindet ne Toroor eng' peetuunnyi.

Currently Selected:

ISAIAH 60: KAPR

Highlight

Copy

Compare