ISAIAH 59

Tengekto, ng'ang'et, ak katyaknatet

1Ogeero, ma nwach eutap Kamuktaindet ne Toroor, kot koma imuuch kosar; ama nyigiis itinnyi, kot koma imuuch kogas: 2ago ki kobesyenok tengekwogikwok Kamuktaindeng'wong', ak kigouny tengekwogikwok togeennyi, kot koma kochamei kogas. 3Amu murwonen eunekwok eng' korotiik, ak ko murwonen morikwok eng' tengekto; kogomwa kutusweekwok lembechek, ng'alaali ng'elyebwekwok yaityet. 4Ma mi agot agenge ne cheeng'ei imanda ne po kirwooget, ama mi ne ibei ng'aleek che po iman kapkirwook: imang'u icheek tangoita, ak komwaei lembechek; manachi yaityet, ak kooi tengekto. 5Igenyi koigap ereneet, ak kola kootap kibroroktet: meei ne amei koikwak, ak mang'une ereneet koita ne kagitui. 6Ma egu kooriigap kibroroginik ngoroik, ama tugegei poisyonikwak: poisyonikwak ko poisyonigap yaityet, ak komi eunekwak poisyetap koroomnateet. 7#Rom 3.15-17 Ruachin keelyekwak yaityet, ak kochoktoi kotumda korotiik che ma tinyei tengek: kabwaatutikwak ko kabwaatutigap tengekto; mi ortinwekwak kubernateet ak ng'emisyet. 8Ma ingen icheek ooreetap kaalyeet; ama mi kirwooget eng' ortinwekwak: ki koyachigei ortinwek che kunuuren; ma ingen kaalyeet age tugul ne punei olooto. 9Loo anyun kirwooget eng' acheek, ama nyoorwech imanda: kicheeng'e lapkeiyet, ago ogeero, mi mesundeito; kicheeng'e kakweng'et, ago kibendote mesundeito. 10Kisapsabisyoti kecheeng'e inaatut ko uu kipkoratinik, ee, kisapsabisyoti ko uu che ma tinyei koonyek: kibutyoti peet kween ko uu ye karatarat; ki uu che ki kobek ye kimi kwenutap che neryootiin. 11Kimorori tugul ko uu magalaluusyek, ak kitigendosi miising' ko uu cheptugenik: kicheeng'e kirwooget, ago ma mi; kicheeng'e yetunet, ago looenech. 12Amu ki kotesagis pistaosyekyok eng' taing'ung', ak paoryanjinech tengekwogikyok: amu mi kobootech pistaosyekyok, ak kingen tengekwogikyok: 13ki kieesye Kamuktaindet ne Toroor eng' pistoennyo, ak kigemaste ama kisup Kamuktaindennyo, keng'alaali ng'aleegap sastaet ak ngelelnateet, kichobe eng' mugulelwekyok ng'aleegap lembech, ak kemwae. 14Ak kikwa let kirwooget, ak tononi imanda eng' ole loo: amu kagobutyi imanda ooreet, ak ma imuuchi komong' lititindo. 15Ee, petoot imanda; ak ineendet ne pagaktoi yaityet koyaegei koek ne kiluulei. Ak ki keer Kamuktaindet ne Toroor niito, ak ma ibaibai ineendet amu ki ma komi kirwooget. 16#Isa 63.5 Ak ki keer kole ma mi chii age tugul, ak ki kwong' amu ki ma komi ne sachin age: ki ipchigei anyun yetunet eng' eunnyi; ak kiti imandanyi ineendet. 17#Eph 6.14,17; 1Thes 5.8 Ak ki ilaach imanda ko uu karnetap tegeet, ak chepkulet ne po yetunet eng' metinnyi; ak ki ilaach ngoroigap yaaktaetap mugetuut, ak ki ilaach kagiiletapkei ko uu sambut. 18Yaakyin icheek ko uu poisyonikwak, nereegek che ng'woneen eng' puunikyik, yaaktaet eng' puunikyik; yaakyin ngeguusyek ko uu ye nyoljin. 19Iywei anyun kainetap Kamuktaindet ne Toroor eng' cherongo, ak koywei toroornatennyi eng' ole charunee asiista: amu nyoonei ko uu aineet ne isururtoi, ne oonei kabuusetap Kamuktaindet ne Toroor. 20#Rom 11.26 Ak konyo katyagindet Zion, ak konyonji icheek che po Jakobo che metoi pistoet, mwaei Kamuktaindet ne Toroor. 21Ni anyun kayomisennyu ne kiyomisyinige ak icheek, mwaei Kamuktaindet ne Toroor: ma istoegei kuting'ung' Kabuusennyu ne miten ak ng'aleeguk che kiande kuting'ung', anan eng' kutitap iyoteng'ung', anan eng' kutusweegap mochogoroniguk, mwaei Kamuktaindet ne Toroor, kobooch nguno agoi koigeny.

Currently Selected:

ISAIAH 59: KAPR

Highlight

Copy

Compare