ISAIAH 36

Kaboogunetap Sennacherib

(2Lai 18:13-37; 2A.Pet 32:1-19)

1Ak eng' kenyiitap taman ak ang'wan ne po Laitoryat Hezekiah, kobookyi Sennacherib laitoryatap Assyria, nganasook tugul che ng'ootaatiin che po Judah, ak konam. 2Ak ki iyook `laitoryatap Assyria Rabsake eng' Lakish konyo Jerusalem kaplaitoryat Hezekiah, kobooto lugeet ne oo, ak kitonone ole neegitee kererchetap tamboiyot ne po meto eng' ooreet ne oo ne po kooretap mwetindet. 3Yeityo konyo ole mi ineendet Eliakim weeriitap Hilkiah, ne ki riibindetap tuguugap koot, kobooto Sebna siriindet, ak Joah weeriitap Asaph siriindetap tuguuk che piitu.

4Ak ki leenji `Rabsake pichooto, Oleenji Hezekiah, Mwaei laitoryat ne oo, laitoryatap Assyria, kole, nee kamang'unani omang'u? 5Amwae ale, ng'aleek puch kirwoogutiguk ak kimnateng'ung' ne po lugeet: ng'oo anyun ne imang'u kot ingelelja? 6#Ezk 29.6-7 Keero, imang'u kirokto ne po tegandani kigeiri, nooto ko Misiri; ne ngot kotiegei chii, kotoorei eunnyi: uu nooto Pharaoh laitoryatap Misiri eng' tugul che imang'u ineendet. 7Ago ngot ileenjo, Kimang'u Kamuktaindet ne Toroor, Kamuktaindennyo: ko tos ma ineendet ne chechiik komoswek che torooreen ak kapkorosusyek che ki koisto Hezekiah, ak koleenji Judah ak Jerusalem, Osae eng' taitap kaptisisyoni? 8Ara anyun, asoomin ale, igoochi kiit ne po kayasyoet kiptaiyandennyu laitoryatap Assyria, si agoonin paraisisyek eliphuusyek aeng', ngot imuuchi eng' komostang'ung', inde piik che laanyei. 9Imuktoi ano anyun igirinde kiptaiyat agenge eng' otwogik che mengeechen che po kiptaiyandennyu, ak imang'u Misiri amu kariisyek ak piik che ketei paraisisyek? 10Ak tos katogosu kebarge ak emoni ang'em, ama mi kobooto Kamuktaindet ne Toroor? Kimwaiwo Kamuktaindet ne Toroor, koleenjo, Togoste obargei ak emoni ak ing'em.

11Komwachi anyun `Eliakim ak `Sebna ak Joah Rabsake koleenji, asoomin ale, ng'alaalji otwogiguk eng' kutitap Syria; amu kigase: mat ing'alaalwech eng' kutitap Yahudik, kogasei piik che mi irimeet parak. 12Ago ki le Rabsake, Tos kaiyokwo kiptaiyandennyu anyo ye mi kiptaiyandeng'ung' ak oldang'ung', amwa ng'aleechu? Tos ma iyookwo awo ole mi piik che mi irimeet parak, si kobiit koam kobootok ng'atateekwak ak koee peekwak?

13Kotonon anyun Rabsake, ak kobol eng' kutit ne oo eng' ng'aleegap Yahudik kole, ogas okweek ng'aleegap laitoryat ne oo, laitoryatap Assyria. 14Kole laitoryat, Among' koberberak Hezekiah; amu ma imuuchi kosarwok. 15Amocham kong'atak Hezekiah omang'u Kamuktaindet ne Toroor kole, sarwech iman Kamuktaindet ne Toroor; ma kigoochin nganasani eutap laitoryatap Assyria. 16Amogas ng'aleegap Hezekiah: amu mwaei laitoryatap Assyria kole, Yai kaalyeet kobooto, ak omong'u obwanjo; ak ingoam chii age tugul eng' okweek sabibukyik, ak ingoam chii age tugul logoegap mogoonikyik, ak koee chii age tugul peegap keriingennyi: 17agoi anyo amutak obe emet ne kergei ak neng'wong', emet ne mi peek ak divaik, emet ne mi amitwogik ak mbareenigap sabibuk. 18Oriipkei si ma igaigaak Hezekiah, koleenjok, Sarwech Kamuktaindet ne Toroor. Tos kigosar age eng' kamuktaigap pororyosyek, emennyi eng' eutap laitoryatap Assyria? 19Mi ano kamuktaigap Hamath ak che po Arpad? Mi ano kamuktaigap Separbaim? Tos ki sar icheek `Samaria eng' eunnyu? 20Ng'oo eng' kamuktaik tugul che po emotinwechu che ki kosar emennywa eng' eunnyu, kot kosar `Kamuktaindet ne Toroor Jerusalem eng' eunnyu?

21Ago ki siisyo, ma wolji agot ng'olyoo, amu kimwaei ng'atuutyetap laitoryat kole, “Amat owolji kiy.” 22Ki nyo anyun Eliakim weeriitap Hilkiah ne ki ne ki pou koot, ak Sebna siriindet, ak Joah weeriitap Asaph siriindetap tuguuk che piitu, kobwa ole mi Hezekiah ko kagogereer ngoroikwak, kobwa komwachi ng'aleegap Rabsake.

Currently Selected:

ISAIAH 36: KAPR

Highlight

Copy

Compare