ISAIAH 37

Koteebse `Hezekiah Isaiah

(2Lai 19:1-7)

1Ak kingo kas Laitoryat Hezekiah, kogereer ngoroikyik, ak kotugegei kuniok, ak kwo kootap Kamuktaindet ne Toroor. 2Ak koyookto Eliakim ne ki pou koot, ak Sebna siriindet, ak poisyegap tisiik, kotugotegei kuniok, koba ole mi Isaiah maotyot, weeriitap Amos. 3Ak ki leenji ineendet, Kamwa Hezekiah kole, peetuuni ko peetuutap nyalilda, ak kereetap kong', ak chubisyet: amu kait kesich lagok, ama mi kimnateet ne kesige. 4Abeere imuuchi kogas Kamuktaindet ne Toroor Kamuktaindeng'ung' ng'aleegap Rabsake, ne kagoyok laitoryatap Assyria kiptaiyandennyi, konyo kochot kamuktaindet ne sabei, ak koger kong' ng'aleek che kagas Kamuktaindet ne Toroor Kamuktaindeng'ung': ara anyun saa agobo piik che ng'etunotiin.

5Kobwa anyun otwogigap Laitoryat Hezekiah ole mi Isaiah. 6Ak ki leenji Isaiah icheek, Omwachini kiptaiyandeng'wong' ko uu ni, oleenjini, Kamwa Kamuktaindet ne Toroor kole, meiywei ng'aleek che kegas, che kachubena otwogigap laitoryatap Assyria. 7Keero, ayaei ineendet ko kas ng'aleegap piik, ak koweek kwo emennyi; ak agoite kebar eng' rotwetap chok eng' emennyi.

Kogoonu kogeny ng'aleegap kabookyinet piigap Assyria

(2Lai 19:8-19)

8Koweek anyun Rabsake, ak koitita kobaregei laitoryatap Assyria ak Libna: amu kiga kas kole kikwa eng' Lakish. 9Ak ki kas kemwaei agobo Tiraka laitoryatap Kush, keele, Kogonyo obargei. Ak kingo kas koyookto piik koba kap Hezekiah, koleenji, 10omwachini Hezekiah, laitoryatap Judah, oleenjini, Amengoberberin Kamuktaindeng'ung' ne imang'u, koleenjin, Ma kigoitoi Jerusalem kwo eutap laitoryatap Assyria. 11Keero, ki igas kiit ne ki yachi laitorinigap Assyria emotinwek tugul, eng' ng'emet ne king'em icheek kogees: kesaruun inyee? 12Tos ki sar icheek kamuktaigap pororyosyek, che ki par kwanisyekyuk, Gosan, ak Haran, ak Resep, ak lagogap Eden che ki mi Telasar? 13Mi ano laitoryatap Hamath, ak laitoryatap Arpad, ak laitoryatap nganaseetap Separbaim, ne po Hena, ak Iba?

14Ak ki nam Hezekiah parweet eng' eutap piik che kiga kiyok, ak kosoman: ak kitogosta Hezekiah kwo kootap Kamuktaindet ne Toroor, ak koiito parwaanooto eng' taitap Kamuktaindet ne Toroor. 15Ak ki sa Hezekiah Kamuktaindet ne Toroor kole, 16#Kom 25.22 Ee Kamuktaindet ne Toroor ne po lugoosyek, Kamuktaindetap Israel, ne tebee kerubisyek, ii Kamuktaindet, inyee inyegei, ne po laitornatosyek tugul che po ng'wony; ki iyai kipsengwet ak ng'wony. 17Ep iit, ee Kamuktaindet ne Toroor, ak igeer; ak kas ng'aleek tugul che po Sennacherib, che kagoyok kochote Kamuktaindet ne sabei. 18Iman, Kamuktaindet ne Toroor, ki kobar laitorinigap Assyria, emotinwek tugul, ak emennywa, 19ak ki kowiirchi ma kanamonikwak: amu ki ma ko kamuktaik, ago kiboisyetap eunegap piik, keetit ak koik; king'em anyun icheek tuguuchooto amu nooto. 20Ara anyun, ee Kamuktaindet ne Toroor, Kamuktaindennyo, sarwech eng' eunnyi, si konai laitornatosyek tugul che po ng'wony kole ii Kamuktaindet ne Toroor, inyee inyegei.

Koyokyin ng'olyoo `Isaiah laitoryat

(2Lai 19:20-37)

21Koyookto anyun Isaiah weeriitap Amos chiito kwo kap Hezekiah, koleenji, kamwa Kamuktaindet ne Toroor, Kamuktaindetap Israel, kole, Ko uu ye kaisaa agobo Sennacherib laitoryatap Assyria, 22ni ng'olyoot ne kagomwa Kamuktaindet ne Toroor agobo ineendet: Kasasin pergeiyat cheptap Zion, ak kororechin kochotin; kagolelech metinnyi cheptap Jerusalem eng' inyee. 23Ak ng'oo ne ki ichot ak ichup? Ak ng'oo ne ki ibolji ak injurur? Nooto ko Ineendet ne Tiliil ne po Israel. 24Koichot Kiptaiyat eng' otwogiguk, ak koile, Anyoone kot aitu paragutap tuloonook kobooto chaang'indap kariisyekyuk, kot aitu oriit eng' Lebanon; ak aluul taragonikyik che kooen, ak piribirinikyik che korooron: ak achute komosta Ne Toroor Miising', timdap mbareennyi ne rurei. 25Ki abal ak aee peek, ak ateeny ainoosyek tugul che po Misiri eng' keldebesaigap keelyekyuk. 26Tom igas ole ki ayaite ko uu nooto keny, ak ayai eng' peetuusyek che po keny? Ara kaasulde nguno, si kobiit ibut nganasook che ng'ootaatiin koek karurugutik che ki king'em. 27Ki ek anyun piik che ki menyei nganasochooto, che tinyei kimnateet ne ming'in, kimeiyo mugulelwekwak ak kokwong'yo; ki igei susweegap keeweet, ak koigei sogeek che ng'orng'or, ak koigei susweek che mi kooriik parak, ak ko uu mbareetap peek kotomo koeegitu. 28Ago angen kabuureng'ung', ak mandaeng'ung', ak nyonuneng'ung' ne inyone ko, ak nereegeguk che koroomen agobo anee. 29Amu nereegeguk che koroomen agobo anee, ak amu kogoit itiikyuk loseng'ung' pogei, andoi anyun kombet serung'ung', ak ande karnennyu kuting'ung', ak aweechin ibun ooreet ne kebunu.

30Ak egu ni kaboorunet ne kiboorun: oame eng' kenyini che piitos icheegei, ak oam eng' kenyiitap aeng' che syegune chooto; ak eng' kenyiitap somok, ogol, ak oges, ak omin keetiigap sabibuk, ak oam logoekwak. 31Ak piitos kogeny kobendi ng'wony tigitigap che ng'etu che chilildos che po kootap Judah, ak koiiyo logoek eng' parak. 32Amu mandoi eng' Jerusalem che kang'et, ak chilildos eng' tulweetap Zion: yaei niito kagiiletapkei ne po Kamuktaindet ne Toroor ne po lugoosyek.

33Mwaei anyun Kamuktaindet ne Toroor agobo laitoryatap Assyria, kole, ma itu ineendet nganasani, ama mwogei yooto eng' kipchabet, ama nyoonei tainnyi kotinyei long'eet, ama wasyin ng'ung'unyek. 34Weegegei ooreet ne kibunu, ama itu nganasani, mwaei Kamuktaindet ne Toroor. 35Amu ariibe nganasani, asaru, agobo anee, ak agobo Daudi otwogindennyu.

36Ak kimanda malaikaiyatap Kamuktaindet ne Toroor, ak kobar piik eliphuusyek pogol ak tamanwogik sisiit ak muut eng' nganaseetap piigap Assyria: ak kingo ng'eetyo piik karon, ogeero, kimuuswek tugul, che kogobek. 37Kwo anyun Sennacherib laitoryatap Assyria, koweek ak kwo komeny Nineveh. 38Ak ye kita kosaaei eng' kootap Nisrok kanamwennyi, kobar ineendet weeriikyik Adramelek ak Sareser eng' rotwetap chok: ak komwei koba emetap Ararat. Ak ki laitoran Esarhaddon weeriinnyi kogeer ineendet.

Currently Selected:

ISAIAH 37: KAPR

Highlight

Copy

Compare