ISAIAH 11
11
Laitornatet ne mi Kaalyeet
1 # Ng'a 5.5; 22.16 Mang'une `mornet ooreetap Jesse,
ak kooi logoek `mornanooto pitunee tigitikyik.
2Tebee ineendet `Kabuusetap Kamuktaindet ne Toroor,
muguleldap utaatyet ak kaguiyet,
muguleldap katigonet ak kimnateet,
muguleldap naet ak kaiyweisyet ne kiywei Kamuktaindet ne Toroor.
3Mi poiboiyennyi kaiyweisyet ne kiywei Kamuktaindet ne Toroor.
Amairwoochi ko uu ye keerei,
ama kerei kong' ko uu ye kasei;
4 # 2Thes 2.8 ago irwooksechin kibananook eng' imanda,
ak koger kong' che talaen che po ng'wony eng' imanda:
ak kobir ng'wonyuni eng' kirokto ne po kutinnyi,
ak kobare kiptengeginik kabusennyi.
5 # Eph 6.14 Ak egu imanda pireneet ne rategei,
ak koek kayaneet ne kiyani pireneet ne rategei.
6 # Isa 65.25 Ak kotebi suiyot kobooto aarwetap keechiir,
ak koruiyo cheplanget ak aarwetap ng'oroor,
ak koruiyo moita ak ng'etundo parnotyot ak ne akwai,
ak kokweri icheek `lakweet ne ming'in.
7Ak koaget teta ak magalaluut,
ruitos moekwak tugul;
ak koam ng'etundo susweek ko uu teta.
8Ak kourerene lakweet ne reryei keriingetap ndaret,
ak konde lakweet ne kageluge eunnyi kebeneetap ereneet.
9 # Hab 2.14 Ma itoi kiy chii anan kong'emis
eng' tulweennyu tugul ne tiliil;
amu nyiei ng'wony naetap Kamuktaindet ne Toroor
ko uu ye nyiei peek nyanjet.
Koweeksei Israel ak Judah eng' ole kiga kiluulji
10 # Rom 15.12 Cheeng'ei pororyosyek eng' peetuunooto tigityotap Jesse, ne tononi koegu songolyetap piik; ak egu toroornatet ole imuung'ee. 11Eng' peetuunooto koyogoito Kiptaiyat eunnyi kogeny ne po aeng', kosar piikyik che tuun ng'etu, eng' Assyria, eng' Misiri, eng' Patros, eng' Kush, eng' Elam, eng' Sinar, eng' Hamath, ak eng' emotinwek che mi ngeguusyek.
12Tuun lumdoi penderet agobo pororyosyek,
ak koyum che ki kitimda che po Israel,
ak koyum che kiyesta che po Judah
eng' luukwek ang'wan che po ng'wony.
13Ak koistogei ng'et kondap Ephraim kogeny,
ak keisto icheek che inyalili Judah;
ak ma amei ng'etkong' Ephraim agobo Judah,
amainyalili `Judah Ephraim.
14Ak kobookyi tigigoigap Philistiik eng' cherongo,
ak koluul icheek tuwai piigap kong'asiis.
Chuulei eunekwak kogirinda Edom ak Moab,
ak kogas iit icheek lagogap Ammon.
15 # Ng'a 16.12 Ak kong'em Kamuktaindet ne Toroor kowong' ng'elyeptap nyanjetap Misiri;
ak kotwaitwai eunnyi kotokyi aineet eng' usoonennyi ne peelsei,
ak kobir kobiitune ainoosyek tisabu,
ak kogoochi piik kolanda kolaagoti kweonik.
16Ak kobiit ooreet ne oo
ne po piikyik che tuun ng'etu eng' Assyria,
ko uu ye kimi agobo Israel
eng' peetuut ne kitogosu komang'une emetap Misiri.
Currently Selected:
ISAIAH 11: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
