ISAIAH 10
10
1Pwo eng' icheek che ng'atei ng'atuutik che ma po iman,
ak eng' icheek che sirei kamaaset,
2kobeet ne nyalili eng' kirwooget,
ak korebe imanit kibananogap piikyuk,
si kobiit koek mosoogik parunenikwak,
ak si kobiit koluul che ma tinyei sigiik!
3Oyae nee anyun eng' peetuut ne ityinok pireeng'wong',
ak eng' ng'emisyet ne punu ole loo?
Omwechini ng'oo kotoretook?
Ak ondoi ano toroornateng'wong'?
4Ing'uruukyin icheek kimonjororinik,
ak kobutyi ole ki kibarchi piik.
Nganda uu nooto, koma istogei nereegekyik,
ago ta ko chuulaat eunnyi kora.
Menoteetap Assyria ak pirennyi
5 # Isa 14.24-27; Nah 1.1-3.19; Zep 2.13-15 Pwo eng' Assyria, kirokto ne po nereegekyuk,
kirokto ne po ineendet ne mi nereegekyuk eunnyi!
6Ayooktoi kobargei ak pororyet ne ya,
ak agoochini kobargei ak piik che anereekyini,
si koluul ak koip parunenik,
ak ketyech icheek ko uu ye kityechi ng'atateek eng' ooreet.
7Ago ma ibwaati ko uu nooto,
ama mi muguleldanyi ko uu nooto;
ago machei muguleldanyi kong'emis,
ak kowong' pororyosyek che chaang'.
8Amu ki mwa kole,
“Tos, ma laitorinik pounikyuk tugul?
9Tos, ma uu Kalno Karkemish?
Tos, ma uu Hamath Arpad?
Tos, ma uu Samaria Damasko?
10Ko uu ye kagonyoor eunnyu laitornatosyegap kanamonik,
che siirei itoonwekwak che ki kiwai che po Jerusalem ak che po Samaria;
11tos mayachini Jerusalem ak kanamonikyik
ko uu ye ki ayachi Samaria ak kanamonikyik?”
12Nooto anyun ye tuun kagoyai Kiptaiyat poisyennyi komugul eng' tulweetap Zion ak eng' Jerusalem, abir anyun logoegap menoteetap muguleldo ne po laitoryatap Assyria, ak toroornatetap kachaunennyi pogei. 13Amu ki komwa kole,
“Ki ayai niito eng' kimnateetap eunnyu,
ak eng' utaatyennyu, amu aguitosi;
ki aiste kiwotosyegap pororyosyek,
ak ki arebee konoraikwak,
ak ki aming'in icheek che tebee ng'echerogap laitornatet, ko uu chiito ne nyigan.
14Ko uu keswetap toriityon ne nyooru chii,
ko ki konyoor eunnyu mogornatosyegap pororyosyek;
ak ko uu ye iyumi chii mayaik che kigelakta,
ki ayum ko uu nooto ng'wony komugul;
ak ma piit ne kibirabirto kebepchet,
anan ne kitwek, anan ne ki ite.”
15“Tos ichaugei aiywet eng' ineendet ne ebisye?
Tos ieetegei musumeneet eng' ineendet ne tilisye?
Ko uu nda itumdumi kirokto ne namei,
anan nda namjin parak kirokto ineendet ne ma keetit!”
16Igoochin anyun Kiptaiyat Kamuktaindet ne Toroor ne po lugoosyek,
piikyik che neryootiin kosagityo,
ak tuun piitu liplibenet ne uu ne po maat ne lalei,
ne kigeere toroornatennyi.
17Ak koek maat lapkeiyetap Israel,
ak koek nenyi Ne Tiliil liplibenetap maat,
ak kobeel kowong'
katookyik che rutei piich ak che toorei piich peetuunak.
18Ak kobeel ineendet toroornatetap osnennyi, ak ne po mbareennyi ne rurei,
kobooto saboondo ak poorto,
ak koek ko uu ye tanui ineendet ne ibooti songolyet.
19Ng'ering'itu keetiik che ng'etu che po osnennyi,
kot komuuch koiit lakwa.
20Eng' peetuunooto koma kotiegei kogeny che ki ng'et eng' Israel, ak icheek che kichililyo eng' kootap Jakobo, ineendet ne kibirei icheek; ago tiegei Kamuktaindet ne Toroor iman, Ineendet ne Tiliil ne po Israel. 21Weekyingei Kamuktaindet ne po kamuktaet, icheek che ki ng'et, agot icheek che ki ng'et che po Jakobo. 22#Rom 9.27 Agot nganda uu piiguk che po Israel ng'aniek che po nyanjet, koweeksei piik che ng'etu kityo eng' icheek. Kigeng'at kagesunet eng' icheek, ne ng'elyektoi eng' imanda. 23Amu yaei Kiptaiyat, Kamuktaindet ne Toroor ne po lugoosyek, kagesunet ne kigeng'at, eng' kwenutap ng'wony tugul.
24Mwaei anyun Kiptaiyat, Kamuktaindet ne Toroor ne po lugoosyek, kole, “Ee piikyuk che menyei Zion, amoiywei Assyria; nganda pirin eng' kirokto, ak konamjin parak agobo inyee, ko uu piteetap Misiri. 25Amu ta komi kitigin miising', si kosulda nereegek, nereegekyuk eng' ng'emisyennywa. 26Ak kong'eetyi Kamuktaindet ne Toroor ne po lugoosyek ineendet pireet, ko uu parisyetap Midianik eng' rwandetap Oreb. Tuun pou kiroktonyi nyanjet, ak konamji parak ko uu piteetap Misiri. 27Ak eng' peetuunooto, koistoegei tigikyeng'ung' lautyennyi, ak koistoegei kaating'ung' choginnyi, ak keng'em chogit amu kaiilet.”
Kagotogosta ineendet kwo eng' Rimmon,
28kagoit Ayaat,
kagosiir Migron,
kagonoree tuguukyik Mikmas;
29kagoba kosiir ole kibunei,
kagoru Geba;
potani Ramah,
kamwei Gibea ne po Saulo.
30Waach miising', ee cheptap Galim!
Ep iit, ee Laisha!
Woljin ineendet, ee Anatoth!
31Kamwei Madmena,
iyumigei piik che menyei Gebim si komwei.
32Tonone Nob eng' peetuuni po rani,
ing'wereri tulweetap cheptap Zion,
tulweetap Jerusalem.
33Ogeero, tuun ebei Kiptaiyat, Kamuktaindet ne Toroor ne po lugoosyek,
mooriik eng' kamuiset;
kiluulei che kooen,
ak kinyeroti che ieetegei.
34Ak koluule ineendet kariik timiin ne oo,
ak koluul Lebanon ineendet ne kiim.
Currently Selected:
ISAIAH 10: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
