Bangec kisiu 16
16
Kora, Datan nga Awiram
1Lewi medaha Kehatac medac Yitsarac medaha kpara Kora nga Eliaw medachora Datan nga Awiram amma Recuwen fingecsaheunac Pelet medaha On, ngic imoc yeneng ngicngac herengina miacma Moseac yoac kpekecgec. 2Amma Isracelac ngichabu enarafocngina kpacnginagoc ngichabuac meisingyunuyunuya yenearunac ngic 250 modacyunugec. 3Modacyunugec yeni kpedzucnema Mose nga Aharon yerearu kemma yofi edeyurugec, “Neni ngereac fakangiraac modzonina tide! Ngichabu hafoangoc yeni kpetiac, yeni sasawango kpetiac kecdae anu Kebungo botucnginau kecde. Ngeri ine nocac ngeranggac negenec engena anu Kebuac kpebungfora yeneac negenec mamea ande?”
4Ifi degec Mose ye imoc negemma kicmesuya bangecfu hetutuckema feec. 5Fema yacma Kora nga habufora sasawa yofi edeyunuec, “Wereckenu Kebungo ngic damocngo yeac areng ande nga merang yeac kpetiacngic ande amma ngic merac meisinggeu yengena hoannu naric kenude, imoc dekperaginemmeude. Yeng ngic meisinggeu yeng naric yeac hoannu hama kefude. 6Imocac amma Kora ge nga habufocga ngeni wereckenu hosuc gerecac tera mema nambisia.
7Namma imohai gerec figec dzeu hosuc homuna gombunga fingerudeac wiac imocac witiau faidacma Kebuac kicfu faibisia. Faigec Kebungo ngic meisinggeudemoc ye ngic kpetiac anude. Lewingic ngeni ngenanggac negenggec homac ende.” 8Mose ye ifi dema Kora yofi edeec, “Lewingic, ngeni kedzac faigec. 9Isracelac Anutungo Isracelac ngichabuunac ngeni segerengunuma yengena marimefic ua kporucwomonnu fede, imoc ngichabu yeneac kicfu namma megecdeac heitaingunuec. Nga ngeni imocac negenggec wiac mamea yombong ande, imoc mi ngereede. 10Nga ge amma Lewingic dacmunafocga ngeni meisingngunuma heitaingunuu yeac hoannu yombong ua mekecdae. Anu ngeni yaguc womonggareng ua ifingoc megecdeac angemmede imoc naric mi ande! 11Imocac amma ge nga habufocga sasawa ngeni kpeturanggema Kebuac yoac kpema Aharon ubakpekpeyoac homac demidae, faka imoc dindingac mi ande!”
Datan nga Awiram
12Ifi dema Elicaw medachora Datan nga Awiram yearu haecdeac yoac fau kenu edeyurugec yeri yofi deoc, “Neri mi eredede, wadipe. 13Ge bangec namu nga hanifosoc wake wakea imohacnac hesicnunuma bangec kisi yomohai homenideac menunuma hanec. Nga imoc negenna wiac mamea anu geng enaratatac mema enaranina yombong annadeac denec. 14Amma ge bangec namu nga hanifosoc doku isoc hakecde imohai mi fainununec. Amma bangec semeng ua nga waing uagoc imohai mi hesicnununa kening. Nga ge kicnina mepisickenadeac denec me? Imocac neni mi erenide.”
15Ifi degec Mose ye yoac imoc negemma herea buyombonggeu Kebuyofi edeec, “Ge sesenginaac negenna mi ngereebeso. Ni yenearunac donggi mocgu mong mi meai amma ebic mong mi meficgeyemmeai.”
Kora ye modzotitiyoac edeyunuec
16Mose ye ifi dema Kora yofi edeec, “Ge nga habufocga sasawa ngeni wereckenu Kebuac kicfu Aharonggoc momoc nambisia. 17Anu ngeni mocgu mocgu sasawango hosuc heiheiac gerecterangina mema imohai hosuc homuna gombungaac wiac sasawa faima Kebuac kicfu mehabisia. Nga mocgu mocgu ngeneac gerecterangina, imoc kpeturanggema 250 ande, imoc ngeni nga Aharon ifi sasawa faibisia.” 18Ifi deu ngic tembuc tembuc sasawa yeni hosuc heiheiac terangina mema imohai gerec nga hosuc homuna gombungaac wiac sasawa faigec kemeu Kebugoc ewacemeemeac kporucamaac naguu Mose nga Aharon yerigoc nanggec. 19Nga Kora ye ngichabu hafoangoc yeni modzongina tiudeac yoac edeyunuma kpedzucyunuu yeni Kebugoc ewacemeemeac kporucamaac naguu nanggec. Nammagec Kebuac kibikperagingo ngichabu hafoangoc yeneac kicfu fingectegerec.
Anutu ye ngicsebigoc asunginaac kunengngina
20Anu Kebungo Mose nga Aharon yofi edeyuruec, 21“Ngeri ngichabu yomoc yeneac botucfunac meickema tembucngira nammaec ni bic yombong meicyunudacbade.”
22Ifi deu yeri kicmesungirango bangecfu hetutuckema yofi deoc, “O Anutu, gennoc ngicsebigoc sasawa yeneac asunginaac kunengngina. Imocac ngic mocgungo kopocsic meficgeu ngichabu hafoangoc yeneac herebu negennade, imoc mi ngereede.”
Hesihesinginaac turunga fingecyemmeec
23Ifi deec Kebungo Mose yofi edeec, 24“Ge ngichabu edeyununa yeni Kora, Datan nga Awiram yeneac kporucamaac hoannunac meickema kendacbisia.”
25Ifi edeu Mose ye yacma Datan nga Awiram yerearu kenu Isracel enarafocngina yeni ye modacgec. 26Ihai hama ngichabu yoac yofi edeyunuec, “Ngic yomoc yeni Kebuac eweheiheigoc kekec wama kecdae. Ngeni yeneac kporucamaunac meickema sawaya faima nambisia. Amma ngeni yeneac kopocsicngina sasawaac amma meicngunudacbauac yeneac wiac sasawa imoc mong mi kpeserebisia.” 27Ifi edeyunuu yeni Kora, Datan nga Awiram yeneac kporucamabangectosea imoc wama sawaya faima nanggec. Nanggec Datan nga Awiram yeri enenghocngira nga nambaracfocngira kuneng kapia yenigoc mama kporucamanginaac naguu nanggec.
28Nanggec Mosengo yofi deec, “Ua sasawa neanna ubanaac mi mekecduae, imoc Kebungo suenuu meanduae. Imocac faka yaguc fingerude, imocngo wiac imoc mekperagingemmeu henggecde. 29Nga ngicngac eng homeandimbe imoc negendae nga ngicngac yomoc yeni homec ifia homegecdeu memeting ngicngac tosea yenearu fingecande, imocsac fingecyemmeude isoc ngeni yofi negenggecde, Kebungo Mose mi sueec. 30Nga Kebungo ine faka furia meu bangecngo enara anggema yeni nga wiacngina sasawa gbokoyunudaru yeni gboringoc tacma homecamau kemegecdeu ngeni yofi negenggecde, ngic imoc yeni Kebu ngadehema kecgecac amma faka ifi fingecyemmede.”
31Anu Mose ye yoac sasawa imoc desidacmanu Datan nga Awiram arengfocngiragoc nanggec, bangec imoc tohoma anggeec. 32Anggema yeri nga arengfocngira amma Koraac wiacfora nga ngicngacfora amma wiacngina sasawa gbokoyunudarec. 33Yeni wiacgedangnginagoc gbori homecamau kemedacgec bangecngo semeyunuu kpebung yeneac botucfunac kpac anggec. 34Amma kemegec arongina negemma Isracelac ngicngacareng hafoangoc nanggec yeni yofi dema kengec amma woragec, “Bangecngo nenang ifingoc gbokonunubacac.”
353Anu Kebuarunac gerecngo hama ngic 250 hosuc homuna gombunga mehagec imoc yonohodarec.
Gerecac tera kpetiac
36Ifi fingeru Kebungo Mose yoac yofi edeec, 37“Gerecac teragedanga nga gerec dzedzea imoc kpetiac andeac ge womonggareng Aharon medaha Elecadzar edena ye gerecac tera mema sing herea kemma gerec dzedzea imoc ukuu singsararang kpebeso. 38Meickema kopocsicmemengic homegec, yeneac gerectera imoc Kebuac kicfu mehama faigec kpetiac anggecac amma imoc hamango heimodongaiu aieng sacsac dabac dabac anu arata witiau yerecgema gborockeu febeso. Feu imocngo Isracel yeneac mangina ambeso.”
39Ifi deu womonggareng Elecadzar ye yoac imoc modacma ngic gerecngo yonohoec imoc yeneng gerectera aieng sacsacngo memea faigec, imoc sasawa meu uangicfora imoc hamango heigec dabac dabac anu aratau gborockegec. 40Anu Isracelngicngac yeni faka imoc hemma yofi negensima kecgecdeac ifi anggec, kuricngic mong me ngic mong ye Aharonggac fingecsaheunac mi anudeu ye hosuc homungkereng mehama Kebuac kicfu mi ohobeso. Ngic mongngo Kora nga yeac habu isoc ambacac, ifi anggec. Anu Elecadzar ye Kebungo Mose edeec ifi isoc yombong andarec.
Aharongngo ngaba meic meicke ua meec
41Anu ama wereckenu Isracelkpebung hafoangoc yeni Mose nga Aharon yereac modzotitiyoac homac dema yofi edeyurugec, “Ngerennoc Kebuac ngicngacfora yunuhomedaoc.”
42Ifi dema kpebung hafoangoc yeni Mose nga Aharon yereac kicfu kpedzucnema nanggec imohai meremma kicngina figec Kebugoc ewacemeemeac kporucamaubigeng kenec. Kenu henggec hoengngo imoc sememanu Kebuac kibikperagingo kicnginau fingectegerec. 43Fingectegeru Mose nga Aharon yeri Kebugoc ewacemeemeac kporucamaac naguu kenoc. 44Kenec Kebungo Mose yoac yofi edeec, 45“Ngeri kpebung yomoc yeneac botucnginaunac meickeec! Ni bic yombong yunuhomeba kpac anggecde.” Ifi deu yeri kicmesungirango bangecfu hetutuckema feoc.
46Fema Mosengo Aharon yofi edeec, “Kebuac kicmesuunac herebu fingecma hamanu hafei homectoayagoc bic hanahedac. Imocac ge kemma gerecteraga mema imohai arata witiaunac gerec nga hosuc homungkereng faima bic yombong kemma kpebung yenearu ngaba meic meicke ua mena!” 47Ifi deu Aharon ye Mosengo deec ifi isoc amma nedzima kpebung yeneac botucfu kemma henu hafei homectoayagoc bic hanaheec. Ifi hemma hosuc homungkereng gerecfu faima ngicngac yenearu ngaba meic meicke ua meec. 48Ye homegec nga gbori kecgec, yeneac botucfu nammanu hafeitoa kpac anec. 49Anu hafei homectoayagocngo meyunuu homegec imoc 14 700. Nga Koraac wiacfora homegec, yenearu ifingoc torokpema homegec. 50Nga hafei homectoayagoc imoc kpac anu Aharon ye dzigenema Kebugoc ewacemeemeac kporucamaac naguu Mosearu kenec.
Currently Selected:
Bangec kisiu 16: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
