Bangec kisiu 15
15
Womonggareng uaac dederecgeyoac goa
1 Kebungo Mose yoac yofi edeec, 2“Ge Isracelngicngac yoac yofi edeyununa, ‘Ni amabangec kecgecdeac ngemmebade imohai ensikebesandae, 3naso imohai dedeseringina meserigecdeac negembesandae me ubangerecac sese faigecdeac negembesandae me nasotoanginaac sese mong faigecdeac negembesandaeac gerecfu sese me sesegerec hafoangoc oho ohoya faibesandae imocngo homuna gombunga fiu Kebungo imoc hemma negenu ngereeudeac rama me burumakahabunginaunac yeac sese mong houma faigecdeac negendae imohai yofi ambisia. 4Ngic sese imoc faiude, yeng ifingoc seseac yakaac negemma wit uha gombunga yombong efakpete 1/10 mema kerecdoku hinkpete ¼ imocgoc yerec yerecgea faibeso. 5Nga ramamedaha mocgu mocguacsoc seseac dokuac negemma waindoku hinkpete ¼ mema imoc gerecfu sese me sesegerec hafoangoc oho ohoya imocgoc faikecbesena.
Ramangiwaac seseac yaka nga doku
6Anu ramangiwa fainade imohai seseac yaka dema wit uha gombunga yombong efakpete 2/10 mema kerecdoku hinkpete ⅓ mema imocgoc yerecgema faikecbesena. 7Amma seseac dokuac negemma waindoku hinkpete ⅓ mehama faibesena. Imocngo homuna gombunga fiu Kebungo imoc hemma negenu ngereeudeac ifi angkecbesena.
Dedeseri fora fingerudeac sese
8Nga ge dedeseriga fora fingerudeac sese fainade dema burumakangiwa mocgu kifaya mocgu angana sesegerec hafoangoc ohonadeu me kebuaru ruaeac sese#15:8 Kebuaruruaeac sese imoc houma yenahafoc nekecgec. ngic yenigoc ngenahafoc negecdeac negemma fainade 9imohai burumakangiwagoc seseac yaka dema wit uha gombunga yombong efakpete 3/10 mema kerecdoku hinkpete ½ imocgoc yerecgema faima 10seseac dokuac negemma waindoku hinkpete ½ faikecbesena. Imoc gerecsesega anude nga imocngo homuna gombunga fiu Kebungo imoc hemma negenu ngereeudeac ifi ambesena. 11Ngeni burumakangiwa nga ramangiwa amma ramamedaha nga noningmedaha tembuc tembuc sasawa faigecde, imohai ifi angkecbisia. 12Ngeni yang kpetenginaacsoc tembuc tembuc sasawango sese imocacsoc mema faidacbisia.
Desi desiyoaac faka mocgungoc fengemmebeso
13Amma bangecnginau fingec fingera sasawa ngeni faka ifi amma sesegerecngina mehama hafoangoc ohogec homuna gombunga fiu Kebungo homuna imoc negemma henu ngereeudeac ifi ambisia. 14Nga fingecenggecdesoc kuricareng ngenigoc kecdae me goa naso wegenanec hama ngeneac botucnginau kecgecdeu yeni Kebungo homuna negenu ngereeudeac sesegerec hafoangoc ohogec homuna gombunga fibeso, imoc ngeneng mehama nengandae ifi isoc angkecbisia. 15Imoc kpebungnginau nga kuricngic ngenigoc kecandae botucnginau ngeneac singseria mocgungoc ambeso. Imoc fingecsahengina feengkefudesoc ngeni nga kuricngic yeneac ifingoc ambesande. Ngeni nga kuricngic yeni Kebuac kicfu siric mocgungoc angkecbisia. 16#Sese 24:22Ngeni nga kuricngic botucnginau kecgecde ngeneac singyoac nga desi desiyoacac faka siriha mocgungoc fengemmebesande.’ ”
Waracyakaac sese
17Anu Kebungo Mose yofi edeec, 18“Ge Isracelngicngac yoac yofi edeyununa, ‘Ni bangec wangecngunu kembade ngeni imohai kensikema 19bangec imocac semeng mema yaka nebesandae imohai ngeni imohacnac yaka mema neac sese faibisia. 20Ngeni icsogong uha warac warac dokugoc yerecgema ohobesandae imohai icsogong mong mema sese dema ni nembisia. Ngeni wit seuha meic meickeac sobengnginaunac yombong sese imoc ni nembisia. 21Nga ngeni fingecsahengina feengkefudesoc icsogong uha warac warac dokugoc yerecgegecde, imohacnac mong seseac dema ni nengkecbisia.
Kopocsic segema meficgegecdeu yofi mebisia
22-23 Kebungo dederecgeyoac Mose edeu yeng imoc edengunuec, imoc sasawa modacbisia. Ye hanahema dederecgeyoac ngemmeec kecma fingecsahengina feengkefudesoc modacgecdeac edengunuec imoc modacdacbisia. Anu Kebungo Mose dederecgeyoac modacgecdeac edeecmoc, ngeni segema imoc mi modacdacgecdeu ebic imocac yoac yofi fede. 24Ngeni dederecgeyoac imoc mi kpebisia negemma segema kopocsic meficgegecdeu nga kpebung ngeneng imoc mi negenggec dema kpebung hafoangoc ngeni burumakangiwa mocgu kifaya mocgu angana mema faima sesegerec hafoangoc ohogec homuna gombunga fiu Kebungo imoc hemma negenu ngereeude. Nga seseac yaka nga seseac doku imoc singa modacma faibisia amma noningngiwa mocgu imoc kopocsic meic meickeac sese dema momoc faibisia. 25Ngeni kopocsic imoc mi meficgebeso negemma segema sesegerecngina hafoangoc ohogec nga kopocsic meic meickeac sesengina Kebuac kicfu mehagecac amma womonggarengngo kopocsic meickeudeac ua imoc meu Isracelkpebung hafoangoc ngeneac kopocsicngina imoc meic meickea anude. 26Imohai Isracelkpebung hafoangoc ngeni amma kuricareng botucnginau kecdae ngeneac kopocsicngina imoc wawaya anude. Imoc yofiac, yeni wiac mi ambeso negemma segema kopocsic meficgegecac imocngo Isracelngicngac areng hafoangoc yeneac kopocsic anec.
Ngic mocgungo sing segema kopocsic meficgeude
27 #
Sese 4:27-31
Nga ngic mocgungo kopocsic mi meficgebeso negemma segema kopocsic meficgeudeu yeng kopocsic meic meickeaac sese dema noningngagera mong kifaya mocgu angana, imoc faibeso. 28Fau ngic ye Kebuac kicfu kopocsic mi meficgebeso negemma segema kopocsic meficgeec womonggarengngo ngic yeac ngaba meic meickeac ua mebeso. Ye ifi amma ngaba meickeu ngic ye kopocsiha kpac anude. 29Nga kopocsic mi ambeso negemma segema kopocsic meficgegecdeac singyoac imoc Isracelngicngac bangecnginau fingec fingera nga ifingoc ngicngac kuric botucnginau kecdae, ngeneac singyoac mocgungoc yombong fengemmebeso.
Goa kopocsic arenggema megecde
30Nga mongngo memanganeyunuudeac faka arenggema imoc meude, ye Kebu emmima kopocsic meficgeude. Ngic ifia Isracel ngenang bangecfu fingecgec me kuric hama kecdae, ngic imoc ngicngacareng botucnginaunac meicyunudacbeso. 31Ye Kebuac yoac ngadehema dederecgeyoara kpeecac amma ye botucnginaunac meickebeso. Ye godzufaka ayemmeecac turunga imocac ebiha yeac witiau feude.’ ”
32Anu Isracelngicngac yeni bangeckisiu kecmagec tacnegennasoac wenac monnu ngic mong gerec kpedzucnema kecmanu meficgegec. 33Meficgema Mose nga Aharon amma ngichabu hafoangoc yenearu mekenggec. 34Kemma ngic ifia dafi ammibesonga imocac desi desiyoac mong mi feecac witickema faigec tarec. 35Tacmanu Kebungo Mose yoac yofi dema edeec, “Ngic imoc ye homecfu faibeso. Ngichabu hafoangoc yeneng kporucamabangecac ngadeau kemma hocngo hebucgebisia.” 36Ifi deu ngichabu hafoangoc yeni ngic imoc kporucamabangec ngadeau wangecma kemema Kebungo Mose dederecge ammiec, imoc modacma hocngo hebucgegec.
Anutungina kecbadeac wangecngunu hayai
37Anu Kebungo Mose yofi edeec, 38#Dser 22:12“Ge Isracelngicngac yoac yofi edeyununa, ‘Ngeni witic kibia dorong mema mekutunggema wiac mong dangeng isoc dzegema imocgoc witic mong kibia dorong faima wambangina tegiau kpebigec kpatainggema nangkecbeso. Imoc fingecsahengina feengkefudesoc ifi faikecbisia. 39Nanu wamba dangenga kpatac kpatainggea imoc mekecma henggecdesoc Kebungo dederecgeyoac sasawa modacgecdeac edengunuec imoc negensima tofohodacbisia. Ifi anggec faitobang fingecngemmeu serofaka ambauac ubanginaac sing sicsauc mi tibisia nga kicnginango wiac henggec hensongo manganau mi mangunubeso. 40Ifi amma dederecgeyoacna sasawa negensima tofohodacma Anutunginaac kicfu kpetiac kecbisia. 41Ni Kebu Anutungina, nennoc Anutungina kecbadeac dema Aigitabangecfunac wangecngunu hayai. Ni Kebu Anutungina.’ ”
Currently Selected:
Bangec kisiu 15: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
