Bangec kisiu 17
17
Aharon yasuya
1 Kebungo Mose yoac yofi edeec, 2“Ge Isracelngicngac yoac yofi edeyununa, ‘Ngeni kisicfocngina yeneac kpacngina modacma yasu mocgu mocgu mehabisia. Kisicnginaac enarafocngina sasawango mocgu mocgu faigec twelf ambeso!’ Faigec geng yasunginasoc menade imohai kpacngina mendzicbesena. 3Nga kisicfocngina yeneac ngicenarafocngina mocgu mocgu sasawa yeni yasungina mocgu mocgu faibisia. Nga Lewiac kisicfunac yeneac yasu imohai Aharonggac kpara mendzicbesena. 4Mendzicma kemma Kebugoc ewacemeemeac kporucamau heigboringemmekecduaeac wiac tacde, imohai ngenigoc ewacandimbe, imocac hoangau faiyununa febisia. 5Femagec ngic meisinggebade yeac yasungo sera kpeu Isracelngicngac yeni imoc hemma ubakpekpeyoac dengecmema kecdae imoc wadacgecde.”
6Ifi deu Mose ye Isracelngicngac ifi dema edeyunuu kisic sasawaac enarafocngina mocgu mocgu sasawango yasungina mehama migec imoc kpeturanggeu twelf anec. Nga yasu twelf yeneac botucnginau mong imoc Aharonggac anec. 7Anu Mose ye yasu sasawa imoc Kebungo wiac heigboringemmekecduaeac kporucamau Kebuac kicfu faiyunuu fegec.
8 #
Heb 9:4
Femagec ama wereckenu Mose ye Kebungo wiac heigboringemmekecduaeac kporucamau enec. Emma henu Lewiac kisic modacma Aharonggac yasu faiec, imocngo mariagoc anec nga dzuria hanahema ereec nga dzuria kpema feec amma almond fora anec. 9Ifi hemma Mose ye yasu sasawa imoc Kebuachoannunac memama Isracelngicngac sasawa edzacyunuu hemma ngic mocgu mocgu sasawa yeni yasunginasoc medacgec.
10Anu Kebungo Mose yofi edeec, “Ge Aharonggac yasu monggoc meemma imoc Kebungo wiac heigboringemmekecde,#17:10 Kebungo wiac heigboringemmekecde imoc inglesyoacfu “testimony” ifisac nande. wiac imocac hoannu faibesena. Imocngo yoackpekpe kpeboronggac nambaracfora yeneac ma ambeso. Ammanu yasu imocngo kpetariyemmeu modzotitiyoacngina imoc kpac anude nga mi homegecde.” 11Anu Kebungo Mose dederecge ammiec imoc sasawa ifi yombong andarec.
12Ifi anu Isracelngicngac yeni Mose yofi edegec, “Iii, neni yei homema kpac annide, neni sasawango kpac andacnide. 13Ngicngac tembuc tembuc sasawango Kebuac kporucwomonggac wegenac hagecde imoc yeni homegecde. Neni sasawango homecac areng ambinggac.”
Currently Selected:
Bangec kisiu 17: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
