Safaniyáh 3
3
1Us sarkash o nápák o zálim shahr par afsos! 2Us ne kalám ko na suná; wuh tarbiyatpazír na húá; us ne Ḳhudáwand par tawakkul na kiyá, aur apne Ḳhudá kí qurbat kí árzú na kí. 3Us ke umará us meṉ garajnewále babar haiṉ; us ke qází bheṛiye haiṉ, jo shám ko nikalte haiṉ aur subh tak kuchh nahíṉ chhoṛte. 4Us ke nabí láfzan aur dag̣ábáz haiṉ; us ke káhinoṉ ne pák ko nápák ṭhahráyá; aur unhoṉ ne sharí‘at ko maroṛá hai. 5Ḳhudáwand jo sádiq hai us ke andar hai; wuh beinsáfí na karegá; wuh har subh bilánág̣a apní ‘adálat záhir kartá hai; magar beinsáf ádmí sharm ko nahíṉ jántá. 6Maiṉ ne qaumoṉ ko káṭ ḍálá: un ke burj barbád kiye gaye; maiṉ ne un ke kúchoṉ ko wírán kiyá, yaháṉ tak ki un meṉ koí nahíṉ chaltá; un ke shahr ujáṛ húe, aur un meṉ koí insán nahíṉ, koí báshinda nahíṉ. 7Maiṉ ne kahá, ki Faqat mujh se ḍar; aur taribyatpazír ho, táki us kí bastí káṭí na jáe, us sab ke mutábiq jo maiṉ ne us ke haqq meṉ ṭhahráyá thá; lekin unhoṉ ne ‘amdan apní rawish ko bigáṛá. 8Pas, Ḳhudáwand farmátá hai, mere muntazir raho, jab tak ki maiṉ lúṭ ke liye na uṭhúṉ; kyúṉki maiṉ ne ṭhán liyá hai, ki qaumoṉ ko jama‘ karúṉ, aur mamlukatoṉ ko ikaṭṭhá karúṉ, táki apne g̣azab ya‘ní tamám qahr i shadíd ko un par názil karúṉ; kyúṉki merí g̣airat kí ág sárí zamín ko khá jáegí. 9Aur maiṉ us waqt logoṉ ke hoṉṭh pák kar dúṉgá, táki wuh sab Ḳhudáwand se du‘á kareṉ, aur ek dil hokar us kí ‘ibádat kareṉ. 10Kúsh kí nahroṉ ke pár se mere ‘ábid, ya‘ní merí paráganda qaum mere liye hadya láegí. 11Usí roz tú apne sab a‘mál ke sabab se jin se tú merí gunahgár húí sharminda na hogí: kyúṉki maiṉ us waqt tere darmiyán se tere mutakabbir logoṉ ko nikál dúṉgá, aur phir tú mere koh i muqaddas par takabbur na karegí. 12Aur maiṉ tujh meṉ ek mazlúm aur miskín baqiya chhoṛ dúṉgá, aur wuh Ḳhudáwand ke nám par tawakkul kareṉge. 13Isráíl ke báqí log na badí kareṉge, na jhúṭh boleṉge, aur na un ke muṉh meṉ dag̣á kí báteṉ páí jáeṉgí; balki wuh kháeṉge, aur leṭ raheṉge, aur koí un ko na ḍaráegá. 14Ai bint i Siyyún, nag̣masaráí kar; ai Isráíl, lalkár; ai duḳhtar i Yarúshalem, púre dil se ḳhushí maná, aur shádmán ho. 15Ḳhudáwand ne terí sazá ko dúr kar diyá; us ne tere dushmanoṉ ko nikál diyá; Ḳhudáwand Isráíl ká bádsháh tere andar hai; tú phir musíbat ko na dekhegí. 16Us roz Yarúshalem se kahá jáegá, Hirásán na ho: ai Siyyún, tere háth ḍhíle na hoṉ. 17Ḳhudáwand terá Ḳhudá jo tujh meṉ hai qádir hai; wuhí bachá legá, wuh tere sabab se shádmán hokar ḳhushí karegá; apní mahabbat meṉ masrúr rahegá; wuh gáte húe tere liye shádmání karegá. 18Maiṉ tere un logoṉ ko, jo ‘ídoṉ se mahrúm hone ke sabab se g̣amgín aur malámat se zerbár haiṉ, jama‘ karúṉgá. 19Dekh, maiṉ us waqt tere sab satánewáloṉ ko sazá dúṉgá, aur laṉgṛoṉ ko riháí dúṉgá, aur jo háṉk diye gaye, un ko ikaṭṭhá karúṉgá; aur jo tamám jahán meṉ ruswá húe, un ko sitúda aur námwar karúṉgá. 20Us waqt maiṉ tum ko jama‘ karke mulk meṉ láúṉgá; kyúṉki jab tumhárí hínhayát hí meṉ tumhárí asírí ko mauqúf karúṉgá, to tum ko zamín kí sab qaumoṉ ke darmiyán námwar aur sitúda karúṉgá, Ḳhudáwand farmátá hai.
Currently Selected:
Safaniyáh 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
