Safaniyáh 2
2
1Ai behayá qaum, jama‘ ho, jama‘ ho. 2Is se pahle ki taqdír iláhí záhir ho, aur wuh din bhus kí mánind játá rahe, aur Ḳhudáwand ká qahr i shadíd tum par názil ho, aur us ke g̣azab ká din tum par á pahuṉche. 3Ai mulk ke sab halím logo, jo Ḳhudáwand ke ahkám par chalte ho, us ke tálib ho; rástbází ko ḍhúṉḍho, firotaní kí talásh karo; sháyad Ḳhudáwand ke g̣azab ke din tum ko panáh mile. 4Kyúṉki G̣azzah matrúk hogá, aur Asqalon wírán kiyá jáegá: aur Ashdúd do pahar ko ḳhárij kar diyá jáegá, aur ‘Aqrún kí beḳhkaní kí jáegí. 5Samundar ke sáhil ke rahnewáloṉ ya‘ní Karetíoṉ kí qaum par afsos! Ai Kan‘án, Filistíoṉ kí sarzamín, Ḳhudáwand ká kalám tere ḳhiláf hai; maiṉ tujhe nest o nábúd karúṉgá, yaháṉ tak ki koí basnewálá na rahe. 6Aur samundar ke sáhil charágáheṉ honge, jin meṉ charwáhoṉ kí jhoṉpṛiyáṉ, aur bheṛḳháne hoṉge. 7Aur wuhí sáhil Yahúdáh ke gharáne ke baqiye ke liye hoṉge; wuh un meṉ charáyá kareṉge; wuh shám ke waqt Asqalon ke makánoṉ meṉ leṭá kareṉge; kyúṉki Ḳhudáwand un ká Ḳhudá un par phir nazar karegá, aur un kí asírí ko mauqúf karegá. 8Maiṉ ne Moáb kí malámat aur baní ‘Ammon kí la‘n ta‘n suní hai, unhoṉ ne merí qaum ko malámat kí, aur un kí hudúd ko dabá liyá hai. 9Is liye Rabb u’l afwáj, Isráíl ká Ḳhudá, farmátá hai, Mujhe apní hayát kí qasam, yaqínan Moáb Sadúm kí mánind hogá, aur baní ‘Ammon ‘Amúrah kí mánind, wuh purḳhár o namakzár, aur abadu’l ábád barbád raheṉge; mere logoṉ ká baqiya un ko g̣árat karegá, aur merí qaum ke báqí log un ke wáris hoṉge. 10Yih sab kuchh un ke takabbur ke sabab se un par áegá; kyúṉki unhoṉ ne Rabb u’l afwáj ke logoṉ ko malámat kí, aur un par ziyádatí kí. 11Ḳhudáwand un ke liye haibatnák hogá, aur zamín ke tamám ma‘búdoṉ ko lág̣ar kar degá; aur bahrí mamálik ke sab báshinde apní apní jagah meṉ us kí parastish kareṉge. 12Ai Kúsh ke báshindo, tum bhí merí talwár se máre jáoge. 13Aur wuh shimál kí taraf apná háth baṛháegá, aur Asúr ko nest karegá, aur Nínawah ko wírán aur biyábán kí mánind ḳhushk kar degá. 14Aur janglí jánwar us meṉ leṭeṉge, aur har qism ke haiwán, hawásil aur ḳhárpusht, us ke sutúnoṉ ke siroṉ par maqám kareṉge; un kí áwáz un ke jharokoṉ meṉ hogí; un kí dahlízoṉ meṉ wírání hogí; kyúṉki deodár ká kám khulá chhoṛá gayá hai. 15Yih wuh shádmán shahr hai jo befikr thá; jis ne dil meṉ kahá, ki Maiṉ húṉ, aur mere siwá koí dúsrá nahíṉ; wuh kaisá wírán húá, haiwánoṉ ke baiṭhne kí jagah! har ek jo udhar se guzregá suskáregá, aur háth hiláegá.
Currently Selected:
Safaniyáh 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
