Zabúr 96
96
1 Ḳhudáwand ke huzúr nayá gít gáo:
Ai sab ahl i zamín, Ḳhudáwand ke huzúr gáo.
2 Ḳhudáwand ke huzúr gáo, us ke nám ko mubárak kaho:
Roz ba roz us kí naját kí bashárat do.
3Qaumoṉ meṉ us ke jalál ká,
Sab logoṉ meṉ us ke ‘ajáib ká bayán karo.
4Kyúṉki Ḳhudáwand buzurg aur niháyat sitáish ke láiq hai;
Wuh sab ma‘búdoṉ se ziyáda ta‘zím ke láiq hai.
5Is liye ki âur qaumoṉ ke sab ma‘búd mahz but haiṉ,
Lekin Ḳhudáwand ne ásmánoṉ ko banáyá.
6‘Azmat o jalál us ke huzúr meṉ haiṉ:
Qudrat o jamál us ke maqdis meṉ.
7Ai qaumoṉ ke qabílo, Ḳhudáwand kí,
Ḳhudáwand hí kí tamjíd o ta‘zím karo.
8 Ḳhudáwand kí aisí tamjíd karo jo us ke nám ke sháyán hai:
Hadya láo aur us kí bárgáhoṉ meṉ áo.
9Pák áráish ke sáth Ḳhudáwand ko sijda karo:
Ai sab ahl i zamín, us ke huzúr káṉpte raho.
10Qaumoṉ meṉ i‘lán karo ki Ḳhudáwand saltanat kartá hai:
Jahán qáim hai aur use jumbish nahíṉ:
Wuh rástí se qaumoṉ kí ‘adálat karegá.
11Ásmán ḳhushí manáe, aur zamín shádmán ho;
Samundar aur us kí ma‘múrí shor macháe.
12Maidán aur jo kuchh us meṉ hai bág̣ bág̣ hoṉ;
Tab jangal ke sab daraḳht ḳhushí se gáne lageṉge;
13 Ḳhudáwand ke huzúr, kyúṉki wuh á rahá hai:
Wuh zamín kí ‘adálat karne ko á rahá hai:
Wuh sadáqat se jahán kí
Aur apní sachcháí se qaumoṉ kí ‘adálat karegá.
Currently Selected:
Zabúr 96: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)