Zabúr 95
95
1Áo, ham Ḳhudáwand ke huzúr nag̣masaráí kareṉ:
Apní naját kí chaṭán ke sámne ḳhushí se lalkáreṉ.
2Shukrguzárí karte húe us ke huzúr meṉ házir hoṉ;
Mazmúr gáte húe us ke áge ḳhushí se lalkáreṉ.
3Kyúṉki Ḳhudáwand Ḳhudá e ‘azím hai,
Aur sab iláhoṉ par sháh i ‘azím hai.
4Zamín ke gahráo us ke qabze meṉ haiṉ:
Paháṛoṉ kí choṭiyáṉ bhí usí kí haiṉ.
5Samundar us ká hai, usí ne us ko banáyá;
Aur usí ke háthoṉ ne ḳhushkí ko bhí taiyár kiyá.
6Áo, ham jhukeṉ aur sijda kareṉ;
Aur apne ḳháliq Ḳhudáwand ke huzúr ghuṭne ṭekeṉ:
7Kyúṉki wuh hamárá Ḳhudá hai,
Aur ham us kí charágáh ke log aur us ke háth kí bheṛeṉ haiṉ.
Kásh ki áj ke din tum us kí áwáz sunte!
8Tum apne dil ko saḳht na karo, jaisá Maríbah meṉ,
Jaisá Massáh ke din biyábán meṉ kiyá thá.
9Us waqt tumháre bápdádá ne mujhe ázmáyá,
Aur merá imtihán kiyá, aur mere kám ko bhí dekhá.
10Chálís baras tak maiṉ us nasl se bezár rahá;
Aur maiṉ ne kahá, ki Yih wuh log haiṉ jin ke dil áwára haiṉ,
Aur unhoṉ ne merí ráhoṉ ko nahíṉ pahcháná.
11Chunáṉchi maiṉ ne apne g̣azab meṉ qasam kháí,
Ki Yih log mere árám meṉ dáḳhil na hoṉge.
Currently Selected:
Zabúr 95: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)