Zabúr 94
94
1Ai Ḳhudáwand, ai intiqám lenewále Ḳhudá,
Ai intiqám lenewále Ḳhudá, jalwagar ho.
2Ai jahán ká insáf karnewále, uṭh;
Mag̣rúroṉ ko badla de.
3Ai Ḳhudáwand, sharír kab tak,
Sharír kab tak shádiyána bajáyá kareṉge?
4Wuh bakwás karte aur baṛá bol bolte haiṉ:
Sab badkirdár láfzaní karte haiṉ.
5Ai Ḳhudáwand, wuh tere logoṉ ko píse ḍálte haiṉ,
Aur terí mírás ko dukh dete haiṉ.
6Wuh bewa aur pardesí ko qatl karte,
Aur yatím ko már ḍálte haiṉ.
7Aur kahte haiṉ ki Ḳhudáwand nahíṉ dekhegá,
Aur Ya‘qúb ká Ḳhudá ḳhayál nahíṉ karegá.
8Ai qaum ke haiwáno, zará ḳhayál karo;
Ai ahmaqo, tumheṉ kab ‘aql áegí?
9Jis ne kán diyá, kyá wuh nahíṉ suntá?
Jis ne áṉkh banáí, kyá wuh dekh nahíṉ saktá?
10Kyá wuh jo qaumoṉ ko tambíh kartá hai
Aur insán ko dánish sikhátá hai sazá na degá?
11 Ḳhudáwand insán ke ḳhayáloṉ ko jántá hai
Ki wuh bátil haiṉ.
12Ai Ḳhudáwand, mubárak hai wuh ádmí jise tú tambíh kartá,
Aur apní sharí‘at kí ta‘lím detá hai;
13Táki us ko musíbat ke dinoṉ meṉ árám baḳhshe,
Jab tak sharír ke liye gaṛhá na khodá jáe.
14Kyúṉki Ḳhudáwand apne logoṉ ko tark nahíṉ karegá;
Aur wuh apní mírás ko nahíṉ chhoṛegá.
15Kyúṉki ‘adl sadáqat kí taraf rujú‘ karegá:
Aur sab rástdil us kí pairawí kareṉge.
16Sharíroṉ ke muqábale meṉ kaun mere liye uṭhegá?
Badkirdároṉ ke ḳhiláf kaun mere liye khaṛá hogá?
17Agar Ḳhudáwand merá madadgár na hotá
To merí ján kab kí ‘álam i ḳhámoshí meṉ já basí hotí.
18Jab maiṉ ne kahá, Merá páṉw phisal chalá,
To ai Ḳhudáwand, terí shafaqat ne mujhe sambhál liyá.
19Jab mere dil meṉ fikroṉ kí kasrat hotí hai,
To terí tasallí merí ján ko shád kartí hai.
20Kyá sharárat ke taḳht se tujhe kuchh wásta hogá,
Jo qánún kí áṛ meṉ badí ghaṛtá hai?
21Wuh sádiq kí ján lene ko ikaṭṭhe hote haiṉ;
Aur begunáh par qatl ká fatwá dete haiṉ.
22Lekin Ḳhudáwand merá úṉchá burj,
Aur merá Ḳhudá merí panáh kí chaṭán rahá hai.
23Wuh un kí badkárí un hí par láegá,
Aur un hí kí sharárat meṉ un ko káṭ ḍálegá;
Ḳhudáwand hamárá Ḳhudá un ko káṭ ḍálegá.
Currently Selected:
Zabúr 94: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)