Zabúr 92
92
Mazmúr, sabt ke din ke liye Gít.
1Kyá hí bhalá hai Ḳhudáwand ká shukr karná,
Aur tere nám kí madhsaráí karná, ai Haqq Ta‘álá.
2Subh ko terí shafaqat ká izhár karná;
Aur rát ko terí wafádárí ká.
3Das tárwále sáz aur barbat par,
Aur sitár par gúṉjtí áwáz ke sáth.
4Kyúṉki, ai Ḳhudáwand, tú ne mujhe apne kám se ḳhush kiyá:
Maiṉ terí san‘atkárí ke sabab se shádiyána bajáúṉgá.
5Ai Ḳhudáwand, terí san‘ateṉ kaisí baṛí haiṉ:
Tere ḳhayál bahut ‘amíq haiṉ.
6Haiwánḳhaslat nahíṉ jántá,
Aur ahmaq is ko nahíṉ samajhtá hai.
7Jab sharír ghás kí tarah ugte haiṉ,
Aur sab badkirdár phúlte phalte haiṉ,
To yih isí liye hai ki wuh hamesha ke liye faná hoṉ.
8Lekin tú, ai Ḳhudáwand, abadu’l ábád baland hai.
9Kyúṉki dekh, ai Ḳhudáwand, tere dushman,
Dekh, tere dushman halák ho jáeṉge:
Sab badkirdár paráganda kar diye jáeṉge.
10Lekin tú ne mere síṉg ko janglí sáṉḍ ke síṉg kí mánind baland kiyá hai:
Mujh par táza tel malá gayá hai.
11Merí áṉkh ne mere dushmanoṉ ko dekh liyá:
Mere kánoṉ ne mere muḳhálif badkároṉ ká hál sun liyá hai.
12Sádiq khajúr ke daraḳht kí mánind sarsabz hogá:
Wuh Lubnán ke deodár kí tarah baṛhegá.
13Jo Ḳhudáwand ke ghar meṉ lagáe gaye haiṉ,
Wuh hamáre Ḳhudá kí bárgáhoṉ meṉ sarsabz hoṉge.
14Wuh buṛhápe meṉ bhí baromand hoṉge:
Wuh tar o táza aur sarsabz raheṉge.
15Táki wázih kareṉ ki Ḳhudáwand rást hai;
Wuhí merí chaṭán hai, aur us meṉ nárástí nahíṉ.
Currently Selected:
Zabúr 92: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)