Zabúr 90
90
CHAUTHÍ KITÁB
Mard i Ḳhudá Músá kí Du‘á.
1Yá Rabb, pusht dar pusht
Tú hí hamárí panáhgáh rahá hai.
2Is se peshtar ki paháṛ paidá húe,
Yá zamín aur dunyá ko tú ne banáyá,
Azal se abad tak tú hí Ḳhudá hai.
3Tú insán ko phir ḳhák meṉ milá detá hai,
Aur farmátá hai, Ai baní Ádam, lauṭ áo.
4Kyúṉki terí nazar meṉ hazár baras aise haiṉ
Jaise kal ká din jo guzar gayá,
Aur jaise rát ká ek pahar.
5Tú un ko goyá sailáb se bahá le játá hai:
Wuh níṉd kí ek jhapkí kí mánind haiṉ:
Wuh subh ko ugnewálí ghás kí mánind haiṉ.
6Wuh subh ko lahlahátí aur baṛhtí hai;
Wuh shám ko kaṭtí aur súkh játí hai.
7Kyúṉki ham tere qahr se faná ho gaye,
Aur tere g̣azab se pareshán húe.
8Tú ne hamárí badkárí ko apne sámne rakkhá,
Aur hamáre poshída gunáhoṉ ko apne chihre kí raushní meṉ.
9Kyúṉki hamáre tamám din tere qahr meṉ guzre:
Hamárí ‘umr ḳhayál kí tarah játí rahtí hai.
10Hamárí ‘umr kí mí‘ád sattar baras hai,
Yá quwwat ho to assí baras;
Taubhí un kí raunaq mahz mashaqqat aur g̣am hai,
Kyúṉki wuh jald játí rahtí hai, aur ham uṛ játe haiṉ.
11Tere qahr kí shiddat ko kaun jántá hai,
Aur tere ḳhauf ke mutábiq tere g̣azab ko?
12Ham ko apne din ginná sikhá,
Aisá ki ham dáná dil hásil kareṉ.
13Ai Ḳhudáwand, báz á, kab tak?
Aur apne bandoṉ par rahm farmá.
14Subh ko apní shafaqat se ham ko ásúda kar,
Táki ham ‘umr bhar ḳhush o ḳhurram raheṉ.
15Jitne din tú ne ham ko dukh diyá,
Aur jitne baras ham musíbat meṉ rahe, utní hí ḳhushí ham ko ‘ináyat kar.
16Terá kám tere bandoṉ par,
Aur terá jalál un kí aulád par záhir ho.
17Aur Rabb, hamáre Ḳhudá, ká karam ham par sáya kare:
Hamáre háthoṉ ke kám ko hamáre liye qiyám baḳhsh;
Háṉ, hamáre háthoṉ ke kám ko qiyám baḳhsh de.
Currently Selected:
Zabúr 90: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
