Zabúr 88
88
Gít, baní Qorah ká Mazmúr; mír mug̣anní ke liye; Mahalat Li‘niwwat ke sur par, Haimán Izráḳhí ká Mashkíl.
1Ai Ḳhudáwand, mere naját denewále Ḳhudá,
Maiṉ ne rát din tere huzúr faryád kí hai.
2Merí du‘á tere huzúr pahuṉche:
Merí faryád par kán lagá.
3Kyúṉki merá dil dukhoṉ se bhará hai,
Aur merí ján pátál ke nazdík pahuṉch gayí hai.
4Maiṉ gor meṉ utarnewáloṉ ke sáth giná játá húṉ:
Maiṉ us shaḳhs kí mánind húṉ jo bi’lkull bekas ho:
5Goyá maqtúloṉ kí mánind jo qabr meṉ paṛe haiṉ
Murdoṉ ke darmiyán ḍál diyá gayá húṉ,
Jin ko tú phir kabhí yád nahíṉ kartá;
Aur wuh tere háth se káṭ ḍále gaye.
6Tú ne mujhe gahráo meṉ, andherí jagah meṉ,
Pátál kí tah meṉ rakkhá hai.
7Mujh par terá qahr bhárí hai,
Tú ne apní maujoṉ se mujhe dukh diyá hai. (Siláh.)
8Tú ne mere jánpahchánoṉ ko mujh se dúr kar diyá;
Tú ne mujhe un ke nazdík ghinauná baná diyá:
Maiṉ band húṉ aur nikal nahíṉ saktá.
9Merí áṉkh dukh se dhundlá chalí:
Ai Ḳhudáwand, maiṉ ne har roz tujh se du‘á kí hai,
Maiṉ ne apne háth terí taraf phailáe haiṉ.
10Kyá tú murdoṉ ko ‘ajáib dikháegá?
Kyá wuh jo mar gaye haiṉ, uṭhkar terí ta‘ríf kareṉge? (Siláh.)
11Kyá terí shafaqat ká charchá gor meṉ hogá,
Yá terí wafádárí ká jahannam meṉ?
12Kyá tere ‘ajáib ko andhere meṉ pahcháneṉge,
Aur terí sadáqat ko farámoshí kí sarzamín meṉ?
13Par ai Ḳhudáwand, maiṉ ne to terí duháí dí hai,
Aur subh ko merí du‘á tere huzúr pahuṉchegí.
14Ai Ḳhudáwand, tú kyúṉ merí ján ko tark kartá hai?
Tú apná chihra mujh se kyúṉ chhipátá hai?
15Maiṉ laṛakpan hí se musíbatzada aur qaríbu’l maut húṉ;
Maiṉ tere ḍar ke máre hawásbáḳhta ho gayá.
16Terá qahr i shadíd mujh par á paṛá;
Terí dahshat ne merá kám tamám kar diyá.
17Us ne din bhar sailáb kí tarah merá iháta kiyá,
Us ne mujhe bi’lkull gher liyá.
18Tú ne dost o ahbáb ko mujh se dúr kiyá;
Aur mere jánpahchánoṉ ko andhere meṉ ḍál diyá hai.
Currently Selected:
Zabúr 88: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)