Zabúr 86
86
Dáúd kí Du‘á.
1Ai Ḳhudáwand, apná kán jhuká aur mujhe jawáb de,
Kyúṉki maiṉ miskín aur muhtáj húṉ.
2Merí ján kí hifázat kar, kyúṉki maiṉ díndár húṉ:
Ai mere Ḳhudá, apne bande ko, jis ká tawakkul tujh par hai, bachá le.
3Yá Rabb, mujh par rahm kar;
Kyúṉki maiṉ din bhar tujh se faryád kartá húṉ.
4Yá Rabb, apne bande kí ján ko shád kar de;
Kyúṉki maiṉ apní ján terí taraf uṭhátá húṉ.
5Is liye ki tú, yá Rabb, nek aur mu‘áf karne ko taiyár hai,
Aur apne sab du‘á karnewáloṉ par shafaqat meṉ g̣aní hai.
6Ai Ḳhudáwand, merí du‘á par kán lagá;
Aur merí minnat kí áwáz par tawajjuh farmá.
7Maiṉ apní musíbat ke din tujh se du‘á karúṉgá,
Kyúṉki tú mujhe jawáb degá.
8Yá Rabb, ma‘búdoṉ meṉ tujh sá koí nahíṉ,
Aur terí san‘ateṉ bemisál haiṉ.
9Yá Rabb, sab qaumeṉ jin ko tú ne banáyá ákar tere huzúr sijda kareṉgí,
Aur tere nám kí tamjíd kareṉgí.
10Kyúṉki tú buzurg hai aur ‘ajíb o g̣aríb kám kartá hai:
Tú hí wáhid Ḳhudá hai.
11Ai Ḳhudáwand, mujh ko apní ráh kí ta‘lím de, maiṉ terí rástí meṉ chalúṉgá:
Mere dil ko yaksúí baḳhsh, táki tere nám ká ḳhauf mánúṉ.
12Yá Rabb, mere Ḳhudá, maiṉ púre dil se terí ta‘ríf karúṉgá:
Maiṉ abad tak tere nám kí tamjíd karúṉgá.
13Kyúṉki mujh par terí baṛí shafaqat hai;
Aur tú ne merí ján ko pátál kí tah se nikálá hai.
14Ai Ḳhudá, mag̣rúr mere ḳhiláf uṭhe haiṉ,
Aur tundḳhú jamá‘at merí ján ke píchhe paṛí hai,
Aur unhoṉ ne tujhe apne sámne nahíṉ rakkhá.
15Lekin tú, yá Rabb, rahím o karím Ḳhudá hai,
Qahr karne meṉ dhímá, aur shafaqat o rástí meṉ g̣aní.
16Merí taraf mutawajjih ho, aur mujh par rahm kar:
Apne bande ko apní quwwat baḳhsh,
Aur apní lauṉḍí ke beṭe ko bachá le.
17Mujhe bhaláí ká koí nishán dikhá,
Táki mujh se ‘adáwat rakhnewále ise dekhkar sharminda hoṉ;
Kyúṉki tú ne, ai Ḳhudáwand, merí madad kí aur mujhe tasallí dí hai.
Currently Selected:
Zabúr 86: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
