Zabúr 84
84
Mír mug̣anní ke liye; Gattít ke sur par. Baní Qorah ká Mazmúr.
1Ai lashkaroṉ ke Ḳhudáwand,
Tere maskan kyá hí dilkash haiṉ!
2Merí ján Ḳhudáwand kí bárgáhoṉ kí mushtáq hai balki gudáz ho chalí;
Merá dil aur merá jism zinda Ḳhudá ke liye ḳhushí se lalkárte haiṉ.
3Ai lashkaroṉ ke Ḳhudáwand, ai mere bádsháh aur mere Ḳhudá,
Tere mazbahoṉ ke pás gauraiyá ne apná áshiyána,
Aur abábíl ne apne liye ghoṉslá baná liyá,
Jaháṉ wuh apne bachchoṉ ko rakkhe.
4Mubárak haiṉ wuh jo tere ghar meṉ rahte haiṉ:
Wuh sadá terí ta‘ríf kareṉge. (Siláh.)
5Mubárak hai wuh ádmí jis kí quwwat tujh se hai;
Jis ke dil meṉ Siyyún kí sháhráheṉ haiṉ.
6Wuh Wádí e Buká se guzarkar use chashmoṉ kí jagah baná lete haiṉ;
Balki pahlí bárish use barakatoṉ se ma‘múr kar detí hai.
7Wuh táqat par táqat páte haiṉ,
Un meṉ se har ek Siyyún meṉ Ḳhudá ke huzúr házir hotá hai.
8Ai Ḳhudáwand lashkaroṉ ke Ḳhudá, merí du‘á sun:
Ai Ya‘qúb ke Ḳhudá, kán lagá. (Siláh.)
9Ai Ḳhudá, ai hamárí sipar, dekh,
Aur apne mamsúh ke chihre par nazar kar.
10Kyúṉki terí bárgáhoṉ meṉ ek din hazár se bihtar hai.
Maiṉ apne Ḳhudá ke ghar ká darbán honá
Sharárat ke ḳhaimoṉ meṉ basne se ziyáda pasand karúṉgá.
11Kyúṉki Ḳhudáwand Ḳhudá áftáb aur sipar hai:
Ḳhudáwand fazl aur jalál baḳhshegá:
Wuh rástrau se koí ni‘mat báz na rakkhegá.
12Ai lashkaroṉ ke Ḳhudáwand,
Mubárak hai wuh ádmí jis ká tawakkul tujh par hai.
Currently Selected:
Zabúr 84: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
