Zabúr 83
83
Gít, Ásaf ká Mazmúr.
1Ai Ḳhudá, ḳhámosh na rah;
Ai Ḳhudá, chup cháp na ho, aur ḳhámoshí iḳhtiyár na kar.
2Kyúṉki dekh, tere dushman údham macháte haiṉ:
Aur tujh se ‘adáwat rakhnewáloṉ ne sir uṭháyá hai.
3Kyúṉki wuh tere logoṉ ke ḳhiláf makkárí se mansúba báṉdhte haiṉ,
Aur un ke ḳhiláf jo terí panáh meṉ haiṉ mashwara karte haiṉ.
4Unhoṉ ne kahá, Áo, ham in ko káṭ ḍáleṉ ki in kí qaum hí na rahe;
Aur Isráíl ke nám ká phir zikr na ho.
5Kyúṉki unhoṉ ne eká karke ápas meṉ mashwara kiyá hai;
Wuh tere ḳhiláf ‘ahd báṉdhte haiṉ:
6Ya‘ní Adom ke ahl i ḳhaima aur Ismá‘ílí;
Moáb aur Hájirí;
7Jabal aur ‘Ammon aur ‘Amálíq;
Filistín aur Súr ke báshinde haiṉ:
8Asúr bhí in se milá húá hai;
Unhoṉ ne baní Lút kí kumak kí hai. (Siláh.)
9Tú un se aisá kar jaisá Midyán se
Aur jaisá wádí e Qaison meṉ Sísará aur Yábín se kiyá thá.
10Jo ‘Ain Dor meṉ halák húe,
Wuh goyá zamín kí khád ho gaye.
11Un ke sardároṉ ko ‘Oreb aur Zaeb kí mánind,
Balki un ke sháhzádoṉ ko Zibah aur Zilmana‘ kí mánind baná de;
12Jinhoṉ ne kahá hai, Áo
Ham Ḳhudá kí bastiyoṉ par qabza kar leṉ.
13Ai mere Ḳhudá, un ko bagole kí gard kí mánind baná de;
Aur jaise hawá ke áge ḍanṭhal.
14Us ág kí tarah jo jangal ko jalá detí hai,
Us shu‘le kí tarah jo paháṛoṉ meṉ ág lagá detá hai;
15Tú isí tarah apní áṉdhí se un ká píchhá kar,
Aur apne túfán se un ko pareshán kar de.
16Ai Ḳhudáwand, un ke chihroṉ par ruswáí tárí kar;
Táki wuh tere nám ke tálib hoṉ.
17Wuh hamesha sharminda aur pareshán raheṉ;
Balki wuh ruswá hokar halák ho jáeṉ:
18Táki wuh ján leṉ ki tú hí, jis ká nám Yahowáh hai,
Tamám zamín par baland o bálá hai.
Currently Selected:
Zabúr 83: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)