Zabúr 81
81
Mír mug̣anní ke liye; Gittít ke sur par. Ásaf ká Mazmúr.
1Ḳhudá ke huzúr jo hamárí quwwat hai baland áwáz se gáo:
Ya‘qúb ke Ḳhudá ke huzúr ḳhushí ká na‘ra máro.
2Nag̣ma chheṛo aur daf láo,
Aur dilnawáz sitár aur barbat.
3Naye chánd aur púre chánd ke waqt
Hamárí ‘íd ke din narsingá phúṉko.
4Kyúṉki yih Isráíl ke liye áíṉ,
Aur Ya‘qúb ke Ḳhudá ká hukm hai.
5Is ko us ne Yúsuf meṉ shahádat ṭhahráyá
Jab wuh mulk i Misr ke ḳhiláf niklá:
Maiṉ ne us ká kalám suná jis ko maiṉ jántá na thá.
6Maiṉ ne us ke kandhe par se bojh utár diyá:
Us ke háth ṭokrí ḍhone se chhúṭ gaye.
7Tú ne musíbat meṉ pukárá, aur maiṉ ne tujhe chhuṛáyá:
Maiṉ ne ra‘d ke parde meṉ se tujhe jawáb diyá:
Maiṉ ne tujhe Maríbah ke chashme par ázmáyá. (Siláh.)
8Ai mere logo, suno, maiṉ tum ko ágáh kartá húṉ:
Ai Isráíl, kásh ki tú merí suntá.
9Tere darmiyán koí g̣airma‘búd na ho;
Aur tú kisí g̣airma‘búd ko sijda na karná.
10 Ḳhudáwand terá Ḳhudá maiṉ húṉ,
Jo tujhe mulk i Misr se nikál láyá:
Tú apná muṉh ḳhúb khol, aur maiṉ use bhar dúṉgá.
11Par mere logoṉ ne merí bát na suní,
Aur Isráíl mujh se razámand na húá.
12Pas maiṉ ne un ko un ke dil kí haṭ par chhoṛ diyá,
Táki wuh apne hí mashwaroṉ par chaleṉ.
13Kásh ki mere log merí sunte,
Aur Isráíl merí ráhoṉ par chaltá!
14Maiṉ jald un ke dushmanoṉ ko mag̣lúb kar detá,
Aur un ke muḳhálifoṉ par apná háth chalátá.
15 Ḳhudáwand se ‘adáwat rakhnewále us ke tábi‘ ho játe,
Aur in ká zamána hamesha tak baná rahtá.
16Wuh in ko achchhe se achchhá gehúṉ khilátá:
Aur maiṉ tujhe chaṭán meṉ ke shahd se ser kartá.
Currently Selected:
Zabúr 81: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)