Zabúr 80
80
Mír mug̣anní ke liye; Shoshaním ‘Edot ke sur par. Ásaf ká Mazmúr.
1Ai Isráíl ke chaupán,
Tú jo galle kí mánind Yúsuf ko le chaltá hai, kán lagá;
Tú jo karúbíoṉ par baiṭhá hai, jalwagar ho.
2Ifráím o Binyamín aur Munassí ke sámne apní quwwat ko bedár kar,
Aur hameṉ bacháne ko á.
3Ai Ḳhudá, ham ko bahál kar;
Aur apná chihra chamká, to ham bach jáeṉge.
4Ai Ḳhudáwand lashkaroṉ ke Ḳhudá,
Tú kab tak apne logoṉ kí du‘á se náráz rahegá?
5Tú ne un ko áṉsúoṉ kí roṭí khiláí,
Aur píne ko kasrat se áṉsú hí diye.
6Tú ham ko hamáre paṛausiyoṉ ke liye jhagṛe ká bá‘is banátá hai:
Aur hamáre dushman ápas meṉ haṉste haiṉ.
7Ai lashkaroṉ ke Ḳhudá, ham ko bahál kar;
Aur apná chihra chamká, to ham bach jáeṉge.
8Tú Misr se ek ták láyá:
Tú ne qaumoṉ ko ḳhárij karke use lagáyá.
9Tú ne us ke liye jagah taiyár kí,
Us ne gahrí jaṛ pakṛí aur zamín ko bhar diyá.
10Paháṛ us ke sáye meṉ chhip gaye,
Aur us kí ḍáliyáṉ Ḳhudá ke deodároṉ kí mánind thíṉ.
11Us ne apní sháḳheṉ samundar tak phailáíṉ,
Aur apní ṭahniyáṉ daryá e Furát tak.
12Phir tú ne us kí báṛoṉ ko kyúṉ toṛ ḍálá,
Ki sab áne jánewále us ká phal toṛte haiṉ?
13Janglí súar use barbád kartá hai,
Aur janglí jánwar use khá játe haiṉ.
14Ai lashkaroṉ ke Ḳhudá, ham terí minnat karte haiṉ, phir mutawajjih ho:
Ásmán par se nigáh kar aur dekh, aur is ták kí nigahbání farmá;
15Aur us paude kí bhí jise tere dahine háth ne lagáyá hai,
Aur us sháḳh kí jise tú ne apne liye mazbút kiyá hai.
16Yih ág se jalí húí hai, yih kaṭí paṛí hai:
Wuh tere muṉh kí jhiṛkí se halák ho játe haiṉ.
17Terá háth terí dahiní taraf ke insán par ho,
Us Ibn i Ádam par jise tú ne apne liye mazbút kiyá hai.
18Phir ham tujh se bargashta na hoṉge:
Tú ham ko phir zinda kar, aur ham terá nám liyá kareṉge.
19Ai Ḳhudáwand lashkaroṉ ke Ḳhudá, ham ko bahál kar;
Apná chihra chamká, to ham bach jáeṉge.
Currently Selected:
Zabúr 80: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)