Zabúr 79
79
Ásaf ká Mazmúr.
1Ai Ḳhudá, qaumeṉ terí mírás meṉ ghus áí haiṉ;
Unhoṉ ne terí muqaddas haikal ko nápák kiyá hai;
Unhoṉ ne Yarúshalem ko khanḍar baná diyá hai.
2Unhoṉ ne tere bandoṉ kí láshoṉ ko ásmán ke parandoṉ kí,
Aur tere muqaddasoṉ ke gosht ko zamín ke darandoṉ kí ḳhurák baná diyá hai.
3Unhoṉ ne un ká ḳhún Yarúshalem ke gird pání kí tarah baháyá;
Aur koí un ko dafn karnewálá na thá.
4Ham apne paṛausiyoṉ kí malámat ká nishána haiṉ,
Aur apne ás pás ke logoṉ ke tamasḳhur aur mazzáq ká bá‘is.
5Ai Ḳhudáwand, kab tak? kyá tú hamesha ke liye náráz rahegá?
Kyá terí g̣airat ág kí tarah bhaṛaktí rahegí?
6Apná qahr un qaumoṉ par jo tujhe nahíṉ pahchántíṉ,
Aur un mamlukatoṉ par, jo terá nám nahíṉ letíṉ, unḍel de.
7Kyúṉki unhoṉ ne Ya‘qúb ko khá liyá,
Aur us ke maskan ko újáṛ diyá hai.
8Hamáre bápdádá ke gunáhoṉ ko hamáre ḳhiláf yád na kar;
Terí rahmat jald ham tak pahuṉche,
Kyúṉki ham bahut past ho gaye haiṉ.
9Ai hamáre naját denewále Ḳhudá, apne nám ke jalál kí ḳhátir hamárí madad kar:
Apne nám kí ḳhátir ham ko chhuṛá, aur hamáre gunáhoṉ ká kaffára de.
10Qaumeṉ kyúṉ kaheṉ, ki Un ká Ḳhudá kaháṉ hai?
Tere bandoṉ ke baháe húe ḳhún ká badla
Hamárí áṉkhoṉ ke sámne qaumoṉ par wázih ho jáe.
11Qaidí kí áh tere huzúr tak pahuṉche;
Apní baṛí qudrat se marnewáloṉ ko bachá le.
12Ai Ḳhudáwand, hamáre paṛausiyoṉ kí ta‘nazaní jo wuh tujh par karte rahe haiṉ
Ulṭí sát guná un hí ke dáman meṉ ḍál de.
13Tab ham jo tere log aur terí charágáh kí bheṛeṉ haiṉ,
Hamesha terí shukrguzárí kareṉge:
Ham pusht dar pusht terí sitáish kareṉge.
Currently Selected:
Zabúr 79: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)