Zabúr 78
78
Ásaf ká Mashkíl.
1Ai mere logo, merí sharí‘at ko suno:
Mere muṉh kí bátoṉ par kán lagáo.
2Maiṉ tamsíl meṉ kalám karúṉgá;
Aur qadím mu‘amme kahúṉgá,
3Jin ko ham ne suná aur ján liyá,
Aur hamáre bápdádá ne ham ko batáyá;
4Aur jin ko ham un kí aulád se poshída nahíṉ rakkheṉge,
Balki áyanda pusht ko bhí Ḳhudáwand kí ta‘ríf
Aur us kí qudrat aur ‘ajáib, jo us ne kiye, batáeṉge.
5Kyúṉki us ne Ya‘qúb meṉ ek shahádat qáim kí,
Aur Isráíl meṉ sharí‘at muqarrar kí,
Jin kí bábat us ne hamáre bápdádá ko hukm diyá
Ki wuh apní aulád ko un kí ta‘lím deṉ.
6Táki áyanda pusht ya‘ní wuh farzand jo paidá hoṉge un ko ján leṉ,
Aur wuh baṛe hokar apní aulád ko sikháeṉ:
7Ki wuh Ḳhudá par ás rakkheṉ,
Aur us ke kámoṉ ko bhúl na jáeṉ,
Balki us ke hukmoṉ par ‘amal kareṉ:
8Aur apne bápdádá kí tarah
Sarkash aur bág̣í nasl na baneṉ;
Aisí nasl jis ne apná dil durust na kiyá;
Aur jis kí rúh Ḳhudá ke huzúr wafádár na rahí.
9Baní Ifráím musallah hokar aur kamáneṉ rakhte húe
Laṛáí ke din phir gaye.
10Unhoṉ ne Ḳhudá ke ‘ahd ko qáim na rakkhá,
Aur us kí sharí‘at par chalne se inkár kiyá;
11Aur us ke kámoṉ ko aur us ke ‘ajáib ko
Jo us ne un ko dikháe the bhúl gaye.
12Us ne mulk i Misr meṉ, Zu‘an ke ‘iláqe meṉ
Un ke bápdádá ke sámne ‘ajíb o g̣aríb kám kiye.
13Us ne samundar ke do hisse karke un ko pár utárá;
Aur pání ko túde kí tarah khaṛá kar diyá.
14Us ne din ko bádal se un kí rahbarí kí,
Aur rát bhar ág kí raushní se.
15Us ne biyábán meṉ chaṭánoṉ ko chírá,
Aur un ko goyá bahr se ḳhúb piláyá.
16Us ne chaṭán meṉ se nadiyáṉ járí kíṉ,
Aur daryáoṉ kí tarah pání baháyá.
17Taubhí wuh us ke ḳhiláf gunáh karte hí gaye,
Aur biyábán meṉ Haqq Ta‘álá se sarkashí karte rahe.
18Aur unhoṉ ne apní ḳhwáhish ke mutábiq kháná máṉgkar
Apne dil meṉ Ḳhudá ko ázmáyá.
19Balki wuh Ḳhudá ke ḳhiláf bakne lage,
Aur kahá, Kyá Ḳhudá biyábán meṉ dastarḳhwán bichhá saktá hai?
20Dekho, us ne chaṭán ko márá to pání phúṭ niklá,
Aur nadiyáṉ bahne lagíṉ;
Kyá wuh roṭí bhí de saktá hai?
Kyá wuh apne logoṉ ke liye gosht muhaiyá kar degá?
21Pas Ḳhudáwand sunkar g̣azabnák húá:
Aur Ya‘qúb ke ḳhiláf ág bhaṛak uṭhí,
Aur Isráíl par qahr ṭúṭ paṛá;
22Is liye ki wuh Ḳhudá par ímán na láe,
Aur us kí naját par bharosá na kiyá.
23Taubhí us ne aflák ko hukm diyá,
Aur ásmán ke darwáze khole,
24Aur kháne ke liye un par mann barsáyá,
Aur un ko asmání ḳhurák baḳhshí.
25Insánoṉ ne firishtoṉ kí g̣izá kháí:
Us ne kháná bhejkar un ko ásúda kiyá.
26Us ne ásmán meṉ purwá chaláí:
Aur apní qudrat se dakkhiná baháí.
27Us ne un par gosht ko ḳhák kí mánind barsáyá,
Aur parandoṉ ko samundar kí ret kí mánind:
28Jin ko us ne un kí ḳhaimagáh meṉ
Un ke maskanoṉ ke ás pás giráyá.
29Pas wuh khákar ḳhúb ser húe,
Aur us ne un kí ḳhwáhish púrí kí.
30Wuh apní ḳhwáhish se báz na áe,
Aur un ká kháná un ke muṉh hí meṉ thá
31Ki Ḳhudá ká g̣azab un par ṭúṭ paṛá,
Aur un ke sab se moṭe táza ádmí qatl kíye,
Aur Isráílí jawánoṉ ko már giráyá.
32Báwujúd in sab bátoṉ ke wuh gunáh karte hí rahe,
Aur us ke ‘ajíb o g̣aríb kámoṉ par ímán na láe.
33Is liye us ne un ke diloṉ ko batálat se,
Aur un ke barasoṉ ko dahshat se tamám kar diyá.
34Jab wuh un ko qatl karne lagá, to wuh us ke tálib húe:
Aur rujú‘ hokar dil o ján se Ḳhudá ko ḍhúṉḍhne lage.
35Aur un ko yád áyá ki Ḳhudá un kí chaṭán,
Aur Haqq Ta‘álá un ká fidya denewálá hai.
36Lekin unhoṉ ne apne muṉh se us kí ḳhushámad kí,
Aur apní zabán se us se jhúṭh bolá.
37Kyúṉki un ká dil us ke huzúr durust na thá,
Aur wuh us ke ‘ahd meṉ wafádár na nikle.
38Lekin wuh rahím hokar badkárí mu‘áf kartá hai aur halák nahíṉ kartá;
Balki bárhá apne qahr ko rok letá hai,
Aur apne púre g̣azab ko bhaṛakne nahíṉ detá.
39Aur use yád rahtá hai ki Yih mahz bashar haiṉ,
Ya‘ní hawá jo chalí játí hai aur phir nahíṉ átí.
40Kitní bár unhoṉ ne biyábán meṉ us se sarkashí kí,
Aur sahrá meṉ use ázurda kiyá.
41Aur wuh phir Ḳhudá ko ázmáne lage,
Aur unhoṉ ne Isráíl ke Quddús ko náráz kiyá.
42Unhoṉ ne us ke háth ko yád na rakkhá,
Na us din ko jab us ne fidya dekar un ko muḳhálif se riháí baḳhshí.
43Us ne Misr meṉ apne nishán dikháe,
Aur Zu‘an ke ‘iláqe meṉ apne ‘ajáib;
44Aur un ke daryáoṉ ko ḳhún baná diyá,
Aur wuh apní nadiyoṉ se pí na sake.
45Us ne un par machchhar bheje jo un ko khá gaye;
Aur meṉḍak jinhoṉ ne un ko tabáh kar diyá.
46Us ne un kí paidáwár kíṛoṉ ko,
Aur un kí mihnat ká phal ṭiḍḍiyoṉ ko de diyá.
47Us ne un kí tákoṉ ko oloṉ se
Aur un ke gúlar ke daraḳhtoṉ ko pále se márá.
48Us ne un ke chaupáyoṉ ko oloṉ ke hawále kiyá,
Aur un kí bheṛ bakriyoṉ ko bijlí ke.
49Us ne ‘azáb ke firishtoṉ kí fauj bhejkar
Apne qahr kí shiddat,
G̣aiz aur g̣azab aur balá ko, un par názil kiyá.
50Us ne apne qahr ke liye rásta banáyá;
Aur un kí ján maut se na bacháí,
Balki un kí zindagí wabá ke hawále kí;
51Us ne Misr ke sab pahlauṭhoṉ ko,
Ya‘ní Hám ke maskanoṉ meṉ un kí quwwat ke pahle phal ko márá:
52Lekin wuh apne logoṉ ko bheṛoṉ kí mánind le chalá,
Aur biyábán meṉ galle kí mánind un kí rahnumáí kí.
53Aur wuh un ko salámat le gayá aur wuh na daṛe:
Lekin un ke dushmanoṉ ko samundar ne chhipá liyá.
54Aur wuh un ko apne maqdis ki sarhadd tak láyá,
Ya‘ní us paháṛ tak jise us ke dahine háth ne hásil kiyá thá.
55Us ne âur qaumoṉ ko un ke sámne se nikál diyá,
Jin kí mírás jaríb ḍálkar un ko báṉṭ dí,
Aur jin ke ḳhaimoṉ meṉ Isráíl ke qabíloṉ ko basáyá.
56Taubhí unhoṉ ne Ḳhudá Ta‘álá ko ázmáyá aur us se sarkashí kí,
Aur us kí shahádatoṉ ko na máná;
57Balki bargashta hokar apne bápdádá kí tarah bewafáí kí,
Aur dhoká denewálí kamán kí tarah ek taraf ko jhuk gaye.
58Kyúṉki unhoṉ ne apne úṉche maqámoṉ ke bá‘is us ká qahr bhaṛkáyá;
Aur apní khodí húí múratoṉ se use g̣airat diláí.
59Ḳhudá yih sunkar g̣azabnák húá,
Aur Isráíl se saḳht nafrat kí.
60So us ne Sailá ke maskan ko tark kar diyá,
Ya‘ní us ḳhaime ko jo baní Ádam ke darmiyán khaṛá kiyá thá.
61Aur us ne apní quwwat ko asírí meṉ
Aur apní hashmat ko muḳhálif ke háth meṉ de diyá.
62Us ne apne logoṉ ko talwár ke hawále kar diyá,
Aur wuh apní mírás se g̣azabnák ho gayá.
63Ág un ke jawánoṉ ko khá gayí;
Aur un kí kuṉwáriyoṉ ke sahág na gáe gaye.
64Un ke káhin talwár se máre gaye,
Aur un kí bewáoṉ ne nauha na kiyá.
65Tab Ḳhudáwand goyá níṉd se jág uṭhá,
Us zabardast ádmí kí tarah jo mai ke sabab se lalkártá ho.
66Aur us ne apne muḳhálifoṉ ko márkar paspá kar diyá;
Us ne un ko hamesha ke liye ruswá kiyá.
67Aur us ne Yúsuf ke ḳhaime ko chhoṛ diyá,
Aur Ifráím ke qabíle ko na chuná;
68Balki Yahúdáh ke qabíle ko chuná,
Usí koh i Siyyún ko jis se us ko mahabbat thí.
69Aur apne maqdis ko paháṛoṉ kí mánind ta‘mír kiyá,
Aur zamín kí mánind jise us ne hamesha ke liye qáim kiyá hai.
70Us ne apne bande Dáúd ko bhí chuná,
Aur bheṛsáloṉ meṉ se use le liyá.
71Wuh use bachchewálí bheṛoṉ kí chaupání se haṭá láyá,
Táki us kí qaum Ya‘qúb aur us kí mírás Isráíl kí gallabání kare.
72So us ne ḳhulús i dil se un kí pásbání kí,
Aur apne máhir háthoṉ se un kí rahnumáí kartá rahá.
Currently Selected:
Zabúr 78: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
