Zabúr 77
77
Mír mug̣anní ke liye; Yadútún ke taur par. Ásaf ká Mazmúr.
1Maiṉ baland áwáz se Ḳhudá ke huzúr faryád karúṉgá,
Ḳhudá hí ke huzúr baland áwáz se; aur wuh merí taraf kán lagáegá.
2Apní musíbat ke din maiṉ ne Ḳhudáwand ko ḍhúṉḍhá:
Mere háth rát ko phaile rahe aur ḍhíle na húe;
Merí ján ko taskín na húí.
3Maiṉ Ḳhudá ko yád kartá húṉ, aur bechain húṉ:
Maiṉ wáwailá kartá húṉ, aur merí ján niḍhál hai. (Siláh.)
4Tú merí áṉkheṉ khulí rakhtá hai:
Maiṉ aisá betáb húṉ, ki bol nahíṉ saktá.
5Maiṉ guzashta aiyám par
Ya‘ní qadím zamáne ke barasoṉ par sochtá rahá.
6Mujhe rát ko apná gít yád átá hai:
Maiṉ apne dil hí meṉ sochtá húṉ;
Merí rúh baṛí taftísh meṉ lagí hai.
7Kyá Ḳhudáwand hamesha ke liye chhoṛ degá?
Kyá wuh phir kabhí mihrbán na hogá?
8Kyá us kí shafaqat hamesha ke liye játí rahí?
Kyá us ká wa‘da abad tak bátil ho gayá?
9Kyá Ḳhudá karam karná bhúl gayá?
Kyá us ne qahr se apní rahmat rok lí? (Siláh.)
10Phir maiṉ ne kahá, Yih merí hí kamzorí hai;
Maiṉ to Haqq Ta‘álá kí qudrat ke zamáne ko yád karúṉgá.
11Maiṉ Ḳhudáwand ke kámoṉ ká zikr karúṉgá,
Kyúṉki mujhe tere qadím ‘ajáib yád áeṉge.
12Maiṉ terí sárí san‘at par dhyán karúṉgá;
Aur tere kámoṉ ko sochúṉgá.
13Ai Ḳhudá, terí ráh maqdis meṉ hai:
Kaun sá deotá Ḳhudá kí mánind baṛá hai?
14Tú wuh Ḳhudá hai jo ‘ajíb kám kartá hai:
Tú ne qaumoṉ ke darmiyán apní qudrat záhir kí.
15Tú ne apne hí bázú se apní qaum
Baní Ya‘qúb aur baní Yúsuf ko fidya dekar chhuṛáyá hai. (Siláh.)
16Ai Ḳhudá, samundaroṉ ne tujhe dekhá:
Samundar tujhe dekhkar ḍar gaye;
Gahráo bhí káṉp uṭhe.
17Badliyoṉ ne pání barsáyá;
Aflák se áwáz áí;
Tere tír bhí chároṉ taraf chale.
18Bagole meṉ tere ra‘d kí áwáz thí;
Barq ne jahán ko raushan kar diyá:
Zamín larzí aur káṉpí.
19Terí ráh samundar meṉ hai,
Tere ráste baṛe samundaroṉ meṉ haiṉ,
Aur tere naqsh i qadam náma‘lúm haiṉ.
20Tú ne Músá aur Hárún ke wasíle se
Galle kí tarah apne logoṉ kí rahnumáí kí.
Currently Selected:
Zabúr 77: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)