Zabúr 37
37
Dáúd ká Mazmúr.
1Tú badkirdároṉ ke sabab se bezár na ho,
Aur badí karnewáloṉ par rashk na kar.
2Kyúṉki wuh ghás kí tarah jald káṭ ḍále jáeṉge,
Aur sabze kí tarah murjhá jáeṉge.
3 Ḳhudáwand par tawakkul kar aur nekí kar,
Mulk meṉ ábád rah aur us kí wafádárí se parwarish pá.
4 Ḳhudáwand meṉ masrúr rah,
Aur wuh tere dil kí murádeṉ púrí karegá.
5Apní ráh Ḳhudáwand par chhoṛ de,
Aur us par tawakkul kar, wuhí sab kuchh karegá.
6Wuh terí rástbází ko núr kí tarah
Aur tere haqq ko do pahar kí tarah raushan karegá.
7 Ḳhudáwand meṉ mutma’inn rah, aur sabr se us kí ás rakh:
Us ádmí ke sabab se jo apní ráh meṉ kámyáb hotá
Aur bure mansúboṉ ko anjám detá hai bezár na ho.
8Qahr se báz á aur g̣azab ko chhoṛ de;
Bezár na ho; is se buráí hí nikaltí hai.
9Kyúṉki badkirdár káṭ ḍále jáeṉge,
Lekin jin ko Ḳhudáwand kí ás hai mulk ke wáris hoṉge.
10Kyúṉki thoṛí der meṉ sharír nábúd ho jáegá.
Tú us kí jagah ko g̣aur se dekhegá, par wuh na hogá.
11Lekin halím mulk ke wáris hoṉge,
Aur salámatí kí firáwání se shádmán raheṉge.
12Sharír rástbáz ke ḳhiláf bandisheṉ báṉdhtá hai
Aur us par dáṉt pístá hai.
13 Ḳhudáwand us par haṉsegá,
Kyúṉki wuh dekhtá hai ki us ká din átá hai.
14Sharíroṉ ne talwár nikálí aur kamán kheṉchí hai,
Táki g̣aríb aur muhtáj ko girá deṉ,
Aur rástrau ko qatl kareṉ.
15Un kí talwár un hí ke dil ko chhedegí,
Aur un kí kamáneṉ toṛí jáeṉgí.
16Sádiq ká thoṛá sá mál
Bahut se sharíroṉ kí daulat se bihtar hai.
17Kyúṉki sharíroṉ ke bázú toṛe jáeṉge;
Lekin Ḳhudáwand sádiqoṉ ko sambháltá hai.
18Kámil logoṉ ke aiyám ko Ḳhudáwand jántá hai:
Un kí mírás hamesha ke liye hogí.
19Wuh áfat ke waqt sharminda na hoṉge,
Aur kál ke dinoṉ meṉ ásúda raheṉge.
20Lekin sharír halák hoṉge:
Ḳhudáwand ke dushman charágáhoṉ kí sarsabzí kí mánind hoṉge;
Wuh faná ho jáeṉge, wuh dhuweṉ kí tarah játe raheṉge.
21Sharír qarz letá hai aur adá nahíṉ kartá;
Lekin sádiq rahm kartá hai aur detá hai.
22Kyúṉki jin ko wuh barakat detá hai, wuh zamín ke wáris hoṉge;
Aur jin par wuh la‘nat kartá hai, wuh káṭ ḍále jáeṉge.
23Insán kí rawisheṉ Ḳhudáwand kí taraf se qáim haiṉ,
Aur wuh us kí ráh se ḳhush hai.
24Agar wuh gir bhí jáe to paṛá na rahegá,
Kyúṉki Ḳhudáwand use apne háth se sambháltá hai.
25Maiṉ jawán thá, aur ab búṛhá húṉ,
Taubhí maiṉ ne sádiq ko bekas
Aur us kí aulád ko ṭukṛe máṉgte nahíṉ dekhá.
26Wuh din bhar rahm kartá aur qarz detá hai,
Aur us kí aulád ko barakat miltí hai.
27Badí ko chhoṛ de aur nekí kar,
Aur hamesha tak ábád rah.
28Kyúṉki Ḳhudáwand insáf ko pasand kartá hai,
Aur apne muqaddasoṉ ko tark nahíṉ kartá:
Wuh hamesha ke liye mahfúz haiṉ,
Par sharíroṉ kí nasl káṭ ḍálí jáegí.
29Sádiq zamín ke wáris hoṉge,
Aur us meṉ hamesha base raheṉge.
30Sádiq ke muṉh se dánáí nikaltí hai,
Aur us kí zabán se insáf kí báteṉ.
31Us ke Ḳhudá kí sharí‘at us ke dil meṉ hai,
Wuh a ní rawish meṉ phislegá nahíṉ.
32Sharír sádiq kí ták meṉ rahtá hai,
Aur use qatl karná cháhtá hai.
33 Ḳhudáwand use us ke háth meṉ nahíṉ chhoṛegá,
Aur jab us kí ‘adálat ho to use mujrim na ṭhahráegá.
34 Ḳhudáwand kí ás rakh aur usí kí ráh par chaltá rah,
Aur wuh tujhe sarfaráz karke zamín ká wáris banáegá:
Jab sharír káṭ ḍále jáeṉge to tú dekhegá.
35Maiṉ ne sharír ko baṛe iqtidár meṉ aur aisá phailte dekhá,
Jaise koí hará daraḳht apní aslí zamín meṉ phailtá hai.
36Lekin jab koí udhar se guzrá aur dekhá to wuh thá hí nahíṉ;
Balki maiṉ ne use ḍhúṉḍhá, par wuh na milá.
37Kámil ádmí par nigáh kar, aur rástbáz ko dekh,
Kyúṉki sulhdost ádmí ke liye ajr hai.
38Lekin ḳhatákár ikaṭṭhe mar miṭeṉge;
Sharíroṉ ká anjám halákat hai.
39Lekin sádiqoṉ kí naját Ḳhudáwand kí taraf se hai;
Musíbat ke waqt wuh un ká muhkam qil‘a hai;
40Aur Ḳhudáwand un kí madad kartá aur un ko bachátá hai:
Wuh un ko sharíroṉ se chhuṛátá aur bachá letá hai,
Is liye ki unhoṉ ne us meṉ panáh lí hai.
Currently Selected:
Zabúr 37: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
