Zabúr 38
38
Yádgár ke liye, Dáúd ká Mazmúr.
1Ai Ḳhudáwand, apne qahr meṉ mujhe jhiṛak na de,
Aur apne g̣azab meṉ mujhe tambíh na kar.
2Kyúṉki tere tír mujh meṉ lage haiṉ,
Aur terá háth mujh par bhárí hai.
3Tere qahr ke sabab se mere jism meṉ sihhat nahíṉ,
Aur mere gunáh ke bá‘is merí haḍḍiyoṉ ko árám nahíṉ.
4Kyúṉki merí badí mere sir se guzar gayí,
Aur wuh baṛe bojh kí mánind mere liye niháyat bhárí hai.
5Merí hamáqat ke sabab se
Mere zaḳhmoṉ se badbú átí hai; wuh saṛ gaye haiṉ.
6Maiṉ purdard aur bahut jhuká húá húṉ;
Maiṉ din bhar mátam kartá phirtá húṉ.
7Kyúṉki merí kamar meṉ sozish hí sozish hai,
Aur mere jism meṉ kuchh sihhat nahíṉ.
8Maiṉ nahíf aur niháyat kuchlá húá húṉ;
Aur dil kí bechainí ke sabab se karáhtá rahá.
9Ai Ḳhudáwand, merí sárí tamanná tere sámne hai,
Aur merá karáhná tujh se chhipá nahíṉ.
10Merá dil dhaṛaktá hai, merí táqat ghaṭí játí hai;
Merí áṉkhoṉ kí raushní bhí mujh se játí rahí.
11Mere ‘azíz aur dost merí balá meṉ alag ho gaye,
Aur mere rishtadár dúr já khaṛe húe.
12Merí ján ke ḳhwáháṉ mere liye jál bichháte haiṉ,
Aur mere nuqsán ke tálib sharárat kí báteṉ bolte,
Aur din bhar makr o fareb ke mansúbe báṉdhte haiṉ.
13Par maiṉ bahre kí mánind suntá hí nahíṉ,
Maiṉ gúṉge kí mánind muṉh nahíṉ kholtá,
14Balki maiṉ us ádmí kí mánind húṉ, jise sunáí nahíṉ detá,
Aur jis ke muṉh meṉ malámat kí báteṉ nahíṉ.
15Kyúṉki ai Ḳhudáwand, mujhe tujh se ummed hai:
Ai Ḳhudáwand mere Ḳhudá, tú jawáb degá.
16Kyúṉki maiṉ ne kahá, ki Kahíṉ wuh mujh par shádiyána na bajáeṉ;
Jab merá páṉw phisaltá hai to wuh mere ḳhiláf takabbur karte haiṉ.
17Kyúṉki maiṉ girne hí ko húṉ,
Aur merá g̣am barábar mere sámne hai.
18Is liye ki maiṉ apní badí ko záhir karúṉgá,
Aur apne gunáh ke bá‘is g̣amgín rahúṉgá.
19Lekin mere dushman chust aur zabardast haiṉ;
Aur mujh se náhaqq ‘adáwat rakhnewále bahut ho gaye haiṉ.
20Jo nekí ke badle badí karte haiṉ
Wuh bhí mere muḳhálif haiṉ, kyúṉki maiṉ nekí kí pairawí kartá húṉ.
21Ai Ḳhudáwand, mujhe chhoṛ na de,
Ai mere Ḳhudá, mujh se dúr na ho.
22Ai Ḳhudáwand, ai merí naját,
Merí madad ke liye jaldí kar.
Currently Selected:
Zabúr 38: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
