Zabúr 35
35
Dáúd ká Mazmúr.
1Ai Ḳhudáwand, jo mujh se jhagaṛte haiṉ, tú un se jhagaṛ:
Jo mujh se laṛte haiṉ, tú un se laṛ.
2Ḍhál aur sipar lekar
Merí kumak ke liye khaṛá ho.
3Bhálá bhí nikál, aur merá píchhá karnewáloṉ ká rásta band kar de:
Merí ján se kah, Maiṉ terí naját húṉ.
4Jo merí ján ke ḳhwáháṉ haiṉ, wuh sharminda aur ruswá hoṉ:
Jo mere nuqsán ká mansúba báṉdhte haiṉ, wuh paspá aur pareshán hoṉ.
5Wuh aise ho jáeṉ jaise hawá ke áge bhúsá,
Aur Ḳhudáwand ká firishta un ko háṉktá rahe.
6Un kí ráh andherí aur phisalní ho jáe,
Aur Ḳhudáwand ká firishta un ko ragedtá jáe.
7Kyúṉki unhoṉ ne besabab mere liye gaṛhe meṉ jál bichháyá,
Aur náhaqq merí ján ke liye gaṛhá khodá hai.
8Us par nágahán tabáhí á paṛe;
Aur jis jál ko us ne bichháyá hai, us meṉ áp hí phaṉse:
Aur usí halákat meṉ giriftár ho.
9Lekin merí ján Ḳhudáwand meṉ ḳhush rahegí,
Aur us kí naját se shádmán hogí.
10Merí sárí haḍḍiyáṉ kaheṉgí, Ai Ḳhudáwand, tujh sá kaun hai,
Jo g̣aríb ko us ke háth se jo us se zoráwar hai
Aur miskín o muhtáj ko g̣áratgar se chhuṛátá hai?
11Jhúṭhe gawáh uṭhte haiṉ;
Aur jo báteṉ maiṉ nahíṉ jántá, wuh mujh se púchhte haiṉ.
12Wuh mujh se nekí ke badle badí karte haiṉ,
Yaháṉ tak ki merí ján bekas ho játí hai.
13Lekin maiṉ ne to un kí bímárí meṉ jab wuh bímár the ṭáṭ oṛhá:
Aur roze rakh rakhkar apní ján ko dukh diyá;
Aur merí du‘á mere hí síne meṉ wápas áí.
14Maiṉ ne to aisá kiyá goyá wuh merá dost yá merá bháí thá:
Maiṉ ne sir jhukákar g̣am kiyá jaise koí apní máṉ ke liye mátam kartá ho.
15Par jab maiṉ laṉgṛáne lagá to wuh ḳhush hokar ikaṭṭhe ho gaye.
Kamíne mere ḳhiláf ikaṭṭhe húe aur mujhe ma‘lúm na thá;
Unhoṉ ne mujhe pháṛá aur báz na áe:
16Ziyáfatoṉ ke badtamíz masḳharoṉ kí tarah,
Unhoṉ ne mujh par dáṉt píse.
17Ai Ḳhudáwand, tú kab tak dekhtá rahegá?
Merí ján ko un kí g̣áratgarí se,
Merí ján ko sheroṉ se chhuṛá.
18Maiṉ baṛe majma‘ meṉ terí shukrguzárí karúṉgá;
Maiṉ bahut se logoṉ meṉ terí sitáish karúṉgá.
19Jo náhaqq mere dushman haiṉ mujh par shádiyána na bajáeṉ:
Aur jo mujh se besabab ‘adáwat rakhte haiṉ, chashmakzaní na kareṉ.
20Kyúṉki wuh salámatí kí báteṉ nahíṉ karte:
Balki mulk ke amnpasand logoṉ ke ḳhiláf makr ke mansúbe báṉdhte haiṉ.
21Yaháṉ tak unhoṉ ne ḳhúb muṉh pháṛá;
Aur kahá, Ahá, há, há, ham ne apní áṉkh se dekh liyá hai.
22Ai Ḳhudáwand, tú ne ḳhud yih dekhá hai; ḳhámosh na rah:
Ai Ḳhudáwand, mujh se dúr na rah.
23Uṭh, mere insáf ke liye jág,
Aur mere mu‘ámale ke liye, ai mere Ḳhudá, ai mere Ḳhudáwand.
24Apní sadáqat ke mutábiq merí ‘adálat kar, ai Ḳhudáwand mere Ḳhudá;
Aur un ko mujh par shádiyána bajáne na de.
25Wuh apne dil meṉ yih na kahne páeṉ, Ahá! ham to yihí cháhte the:
Wuh yih na kaheṉ, ki Ham use nigal gaye.
26Jo mere nuqsán se ḳhush hote haiṉ, wuh báham sharminda aur pareshán hoṉ:
Jo mere muqábale meṉ takabbur karte haiṉ, wuh sharmindagí aur ruswáí se mulabbas hoṉ.
27Jo mere sachche mu‘ámale kí táíd karte haiṉ wuh ḳhushí se lalkáreṉ aur shád hoṉ:
Wuh sadá yih kaheṉ, Ḳhudáwand kí tamjíd ho,
Jis kí ḳhushnúdí apne bande kí iqbálmandí meṉ hai.
28Tab merí zabán se terí sadáqat ká zikr hogá,
Aur din bhar terí ta‘ríf hogí.
Currently Selected:
Zabúr 35: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
