Zabúr 34
34
Dáúd ká Mazmúr, us waqt ká jab us ne Abímalik ke sámne apní waza‘ badlí, jis ne use nikál diyá aur wuh chalá gayá.
1Maiṉ har waqt Ḳhudáwand ko mubárak kahúṉgá:
Us kí sitáish hamesha merí zabán par rahegí.
2Merí rúh Ḳhudáwand par faḳhr karegí:
Halím yih sunkar ḳhush hoṉge.
3Mere sáth Ḳhudáwand kí baṛáí karo,
Ham milkar us ke nám kí tamjíd kareṉ.
4Maiṉ Ḳhudáwand ká tálib húá, us ne mujhe jawáb diyá,
Aur merí sárí dahshat se mujhe riháí baḳhshí.
5Unhoṉ ne us kí taraf nazar kí aur munawwar ho gaye:
Aur un ke muṉh par kabhí sharmindagí na áegí.
6Is g̣aríb ne duháí dí, Ḳhudáwand ne is kí suní,
Aur ise is ke sab dukhoṉ se bachá liyá.
7 Ḳhudáwand se daṛnewáloṉ kí chároṉ taraf us ká firishta ḳhaimazan hotá hai,
Aur un ko bachátá hai.
8Ázmákar dekho ki Ḳhudáwand kaisá mihrbán hai:
Mubárak hai wuh ádmí jo us par tawakkul kartá hai.
9 Ḳhudáwand se ḍaro, ai us ke muqaddaso:
Kyúṉki jo us se ḍarte haiṉ, un ko kuchh kamí nahíṉ.
10Babar ke bachche to hájatmand aur bhúke hote haiṉ:
Par Ḳhudáwand ke tálib kisí ni‘mat ke muhtáj na hoṉge.
11Ai bachcho, áo, merí suno:
Maiṉ tum ko Ḳhudátarsí sikháúṉgá.
12Wuh kaun ádmí hai jo zindagí ká mushtáq hai,
Aur baṛí ‘umr cháhtá hai táki bhaláí dekhe?
13Apní zabán ko badí se báz rakh,
Aur apne hoṉṭhoṉ ko dag̣á kí bát se.
14Badí ko chhoṛ aur nekí kar;
Sulh ká tálib ho, aur usí kí pairawí kar.
15 Ḳhudáwand kí nigáh sádiqoṉ par hai,
Aur us ke kán un kí faryád par lage rahte haiṉ.
16 Ḳhudáwand ká chihra badkároṉ ke ḳhiláf hai,
Táki un kí yád zamín par se miṭá de.
17Sádiq chilláe aur Ḳhudáwand ne suná,
Aur un ko un ke sab dukhoṉ se chhuṛáyá.
18 Ḳhudáwand shikastadiloṉ ke nazdík hai,
Aur ḳhastajánoṉ ko bachátá hai.
19Sádiq kí musíbateṉ bahut haiṉ:
Lekin Ḳhudáwand us ko un sab se riháí baḳhshtá hai.
20Wuh us kí sab haḍḍiyoṉ ko mahfúz rakhtá hai:
Un meṉ se ek bhí toṛí nahíṉ játí.
21Badí sharír ko halák kar degí:
Aur sádiq se ‘adáwat rakhnewále mujrim ṭhahreṉge.
22 Ḳhudáwand apne bandoṉ kí ján ká fidya detá hai:
Aur jo us par tawakkul karte haiṉ un meṉ se koí mujrim na ṭhahregá.
Currently Selected:
Zabúr 34: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
