Zabúr 33
33
1Ai sádiqo, Ḳhudáwand meṉ shádmán raho:
Hamd karná rástbázoṉ ko zebá hai.
2Sitár ke sáth Ḳhudáwand ká shukr karo:
Das tár kí barbat ke sáth us kí sitáish karo:
3Us ke liye nayá gít gáo;
Baland áwáz ke sáth achchhí tarah bajáo.
4Kyúṉki Ḳhudáwand ká kalám rást hai:
Aur us ke sab kám báwafá haiṉ.
5Wuh sadáqat aur insáf ko pasand kartá hai:
Zamín Ḳhudáwand kí shafaqat se ma‘múr hai.
6Ásmán Ḳhudáwand ke kalám se
Aur us ká sárá lashkar us ke muṉh ke dam se baná.
7Wuh samundar ká pání túde kí mánind jama‘ kartá hai:
Wuh gahre samundaroṉ ko maḳhzanoṉ meṉ rakhtá hai.
8Sárí zamín Ḳhudáwand se ḍare:
Jahán ke sab báshinde us ká ḳhauf rakkheṉ.
9Kyúṉki us ne farmáyá aur ho gayá;
Us ne hukm diyá aur wáqi‘ húá.
10 Ḳhudáwand qaumoṉ kí mashwarat ko bátil kar detá hai:
Wuh ummatoṉ ke mansúboṉ ko náchíz baná detá hai.
11 Ḳhudáwand kí maslahat abad tak qáim rahegí,
Aur us ke dil ke ḳhayál nasl dar nasl.
12Mubárak hai wuh qaum jis ká Ḳhudá Ḳhudáwand hai;
Aur wuh ummat jis ko us ne apní hí mírás ke liye barguzída kiyá.
13 Ḳhudáwand ásmán par se dekhtá hai;
Sab baní Ádam par us kí nigáh hai;
14Apní sukúnatgáh se
Wuh zamín ke sab báshindoṉ ko dekhtá hai;
15Wuhí hai jo un sab ke diloṉ ko banátá,
Aur un ke sab kámoṉ ká ḳhayál rakhtá hai.
16Kisí bádsháh ko fauj kí kasrat na bacháegí:
Aur kisí zabardast ádmí ko us kí baṛí táqat riháí na degí.
17Bach nikalne ke liye ghoṛá bekár hai:
Wuh apní shahzorí se kisí ko na bacháegá.
18Dekho, Ḳhudáwand kí nigáh un par hai jo us se ḍarte haiṉ,
Jo us kí shafaqat ke ummedwár haiṉ;
19Táki un kí ján maut se bacháe,
Aur qaht meṉ un ko jítá rakkhe.
20Hamárí ján ko Ḳhudáwand kí ás hai:
Wuhí hamárí kumak aur hamárí sipar hai.
21Hamárá dil us meṉ shádmán rahegá,
Kyúṉki ham ne us ke pák nám par tawakkul kiyá hai.
22Ai Ḳhudáwand, jaisí tujh par hamárí ás hai,
Waisí hí terí rahmat ham par ho.
Currently Selected:
Zabúr 33: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
