Zabúr 32
32
Dáúd ká Mazmúr — Mashkíl.
1Mubárak hai wuh jis kí ḳhatá baḳhshí gayí, aur jis ká gunáh ḍháṉká gayá.
2Mubárak hai wuh ádmí jis kí badkárí ko Ḳhudáwand hisáb meṉ nahíṉ látá,
Aur jis ke dil meṉ makr nahíṉ.
3Jab maiṉ ḳhámosh rahá to din bhar ke karáhne se
Merí haḍḍiyáṉ ghul gayíṉ.
4Kyúṉki terá háth rát din mujh par bhárí thá:
Merí taráwaṭ garmíoṉ kí ḳhushkí se badal gayí. (Siláh.)
5Maiṉ ne tere huzúr apne gunáh ko mán liyá aur apní badkárí ko na chhipáyá:
Maiṉ ne kahá, Maiṉ Ḳhudáwand ke huzúr apní ḳhatáoṉ ká iqrár karúṉgá;
Aur tú ne mere gunáh kí badí ko mu‘áf kiyá. (Siláh.)
6Isí liye har díndár tujh se aise waqt meṉ du‘á kare jab tú mil saktá hai:
Yaqínan jab sailáb áe to us tak nahíṉ pahuṉchegá.
7Tú mere chhipne kí jagah hai; tú mujhe dukh se bacháe rakkhegá;
Tú mujhe riháí ke nag̣moṉ se gher legá. (Siláh.)
8Maiṉ tujhe ta‘lím dúṉgá aur jis ráh par tujhe chalná hogá tujhe batáúṉgá:
Maiṉ tujhe saláh dúṉgá, merí nazar tujh par hogí.
9Tum ghoṛe yá ḳhachchar kí mánind na bano jin meṉ samajh nahíṉ:
Jin ko qábú meṉ rakhne ká sáz dahána aur lagám hai,
Warna wuh tere pás áne ke bhí nahíṉ.
10Sharír par bahut sí musíbateṉ áeṉgí:
Par jis ká tawakkul Ḳhudáwand par hai, rahmat use ghere rahegí.
11Ai sádiqo, Ḳhudáwand meṉ ḳhush o ḳhurram raho:
Aur ai rástdilo, sab ḳhushí se lalkáro.
Currently Selected:
Zabúr 32: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
