Zabúr 31
31
Mír mug̣anní ke liye. Dáúd ká Mazmúr.
1Ai Ḳhudáwand, merá tawakkul tujh par hai; mujhe kabhí sharminda na hone de:
Apní sadáqat kí ḳhátir mujhe riháí de.
2Apná kán merí taraf jhuká; jald mujhe chhuṛá:
Tú mere liye mazbút chaṭán, mere bacháne ko panáhgáh ho.
3Kyúṉki tú hí merí chaṭán aur merá qil‘a hai;
Is liye apne nám kí ḳhátir merí rahbarí aur rahnumáí kar.
4Mujhe us jál se nikál le jo unhoṉ ne chhipkar mere liye bichháya hai;
Kyúṉki tú hí merá muhkam qil‘a hai.
5Maiṉ apní rúh tere háth meṉ sauṉptá húṉ;
Ai Ḳhudáwand, sachcháí ke Ḳhudá, tú ne merá fidya diyá hai.
6Mujhe un se nafrat hai jo jhúṭhe ma‘búdoṉ ko mánte haiṉ:
Merá tawakkul to Ḳhudáwand hí par hai.
7Maiṉ terí rahmat se ḳhush o ḳhurram rahúṉgá:
Kyúṉki tú ne merá dukh dekh liyá hai;
Tú merí ján kí musíbatoṉ se wáqif hai:
8Tú ne mujhe dushman ke háth meṉ asír nahíṉ chhoṛá;
Tú ne mere páṉw kusháda jagah meṉ rakkhe haiṉ.
9Ai Ḳhudáwand, mujh par rahm kar, kyúṉki maiṉ musíbat meṉ húṉ:
Merí áṉkh balki merí ján aur merá jism sab ranj ke máre ghule játe haiṉ.
10Kyúṉki merí ján g̣am meṉ aur merí ‘umr karáhne meṉ faná húí:
Merá zor merí badkárí ke bá‘is se játá rahá, aur merí haḍḍiyáṉ ghul gayíṉ.
11Maiṉ apne sab muḳhálifoṉ ke sabab se apne hamsáyoṉ ke liye
Azbas angushtnumá, aur apne jánpahchánoṉ ke liye ḳhauf ká bá‘is húṉ:
Jinhoṉ ne mujh ko báhar dekhá mujh se dúr bháge.
12Maiṉ murde kí mánind dil se bhulá diyá gayá húṉ:
Main ṭúṭe bartan kí mánind húṉ.
13Kyúṉki maiṉ ne bahutoṉ se apní badnámí suní hai,
Har taraf ḳhauf hí ḳhauf hai:
Jab unhoṉ ne milkar mere ḳhiláf mashwara kiyá
To merí ján lene ká mansúba báṉdhá.
14Lekin ai Ḳhudáwand, merá tawakkul tujh par hai:
Maiṉ ne kahá, Tú merá Ḳhudá hai
15Mere aiyám tere háth meṉ haiṉ:
Mujhe mere dushmanoṉ aur satánewáloṉ ke háth se chhuṛá.
16Apne chihre ko apne bande par jalwagar farmá:
Apní shafaqat se mujhe bachá le.
17Ai Ḳhudáwand, mujhe sharminda na hone de; kyúṉki maiṉ ne tujh se du‘á kí hai:
Sharír sharminda ho jáeṉ, aur pátál meṉ ḳhámosh hoṉ.
18Jhúṭhe hoṉṭh band ho jáeṉ;
Jo sádiqoṉ ke ḳhiláf g̣urúr aur hiqárat se
Takabbur kí báteṉ bolte haiṉ.
19Áh, tú ne apne ḍarnewáloṉ ke liye kaisí baṛí ni‘mat rakh chhoṛí hai,
Jise tú ne baní Ádam ke sámne apne tawakkul karnewáloṉ ke liye taiyár kiyá!
20Tú un ko insán kí bandishoṉ se apní huzúrí ke parde meṉ chhipá legá:
Tú un ko zabán ke jhagṛoṉ se shámiyáne meṉ poshída rakkhegá.
21 Ḳhudáwand mubárak ho:
Kyúṉki us ne mujh ko muhkam shahr meṉ apní ‘ajíb shafaqat dikháí.
22Maiṉ ne to jaldbází se kahá thá, ki Maiṉ tere sámne se káṭ ḍálá gaya:
Taubhí jab maiṉ ne tujh se faryád kí to tú ne merí minnat kí áwáz sun lí.
23 Ḳhudáwand se mahabbat rakkho, ai us ke sab muqaddaso:
Ḳhudáwand ímándároṉ ko salámat rakhtá hai,
Aur mag̣rúroṉ ko ḳhúb hí badla detá hai.
24Ai Ḳhudáwand par ás rakhnewálo,
Sab mazbút ho, aur tumhárá dil qawí rahe.
Currently Selected:
Zabúr 31: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
