Zabúr 30
30
Dáúd ká Mazmúr; haikal kí taqdís ke waqt ká gít.
1Ai Ḳhudáwand, maiṉ terí tamjíd karúṉgá, kyúṉki tú ne mujhe sarfaráz kiyá hai,
Aur mere dushmanoṉ ko mujh par ḳhush hone na diyá.
2Ai Ḳhudáwand mere Ḳhudá,
Maiṉ ne tujh se faryád kí, aur tú ne mujhe shifá baḳhshí.
3Ai Ḳhudáwand, tú merí ján ko pátál se nikál láyá hai:
Tú ne mujhe zinda rakkhá hai ki gor meṉ na jáúṉ.
4 Ḳhudáwand kí sitáish karo, ai us ke muqaddaso;
Aur us ke quds ko yád karke shukrguzárí karo.
5Kyúṉki us ká qahr dam bhar ká hai;
Us ká karam ‘umr bhar ká:
Rát ko sháyad roná paṛe.
Par subh ko ḳhushí kí naubat átí hai.
6Maiṉ ne apní iqbálmandí ke waqt yih kahá thá,
Ki Mujhe kabhí jumbish na hogí.
7Ai Ḳhudáwand, tú ne apne karam se mere paháṛ ko qáim rakkhá thá;
Jab tú ne apná chihra chhipáyá to maiṉ ghabrá uṭhá.
8Ai Ḳhudáwand, maiṉ ne tujh se faryád kí;
Maiṉ ne Ḳhudáwand se minnat kí:
9Jab maiṉ gor meṉ jáúṉ to merí maut se kyá fáida?
Kyá ḳhák terí sitáish karegí? kyá wuh terí sachcháí ko bayán karegí?
10Sun le, ai Ḳhudáwand, aur mujh par rahm kar:
Ai Ḳhudáwand, tú merá madadgár ho.
11Tú ne mere mátam ko nách se badal diyá;
Tú ne merá ṭáṭ utár ḍálá aur mujhe ḳhushí se kamarbasta kiyá:
12Táki merí rúh terí madhsaráí kare aur chup na rahe.
Ai Ḳhudáwand mere Ḳhudá, maiṉ hamesha terá shukr kartá rahúṉgá.
Currently Selected:
Zabúr 30: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
