Zabúr 26
26
Dáúd ká Mazmúr.
1Ai Ḳhudáwand, merá insáf kar, kyúṉki maiṉ rástí se chaltá rahá húṉ:
Aur maiṉ ne Ḳhudáwand par belag̣zish tawakkul kiyá hai.
2Ai Ḳhudáwand, mujhe jáṉch aur ázmá;
Mere dil o dimág̣ ko parakh.
3Kyúṉki terí shafaqat merí áṉkhoṉ ke sámne hai;
Aur maiṉ terí sachcháí kí ráh par chaltá rahá húṉ.
4Maiṉ behúda logoṉ ke sáth nahíṉ baiṭhá;
Maiṉ riyákároṉ ke sáth kahíṉ nahíṉ jáúṉgá.
5Badkirdároṉ kí jamá‘at se mujhe nafrat hai,
Maiṉ sharíroṉ ke sáth nahíṉ baiṭhúṉgá.
6Maiṉ begunáhí meṉ apne háth dhoúṉgá;
Aur ai Ḳhudáwand, maiṉ tere mazbah ká tawáf karúṉgá:
7Táki shukrguzárí kí áwáz baland karúṉ,
Aur tere sab ‘ajíb kámoṉ ko bayán karúṉ.
8Ai Ḳhudáwand, maiṉ terí sukúnatgáh,
Aur tere jalál ke ḳhaime ko ‘azíz rakhtá húṉ.
9Merí ján ko gunahgároṉ ke sáth,
Aur merí zindagí ko ḳhúní ádmíoṉ ke sáth na milá:
10Jin ke háthoṉ meṉ sharárat hai,
Aur jin ká dahiná háth rishwatoṉ se bhará hai.
11Par maiṉ to rástí se chaltá rahúṉgá:
Mujhe chhuṛá le aur mujh par rahm kar.
12Merá páṉw hamwár jagah par qáim hai:
Maiṉ jamá‘atoṉ meṉ Ḳhudáwand ko mubárak kahúṉgá.
Currently Selected:
Zabúr 26: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
