Zabúr 25
25
Dáúd ká Mazmúr.
1Ai Ḳhudáwand, maiṉ apní ján terí taraf uṭhátá húṉ.
2Ai mere Ḳhudá, maiṉ ne tujh par tawakkul kiyá hai,
Mujhe sharminda na hone de;
Mere dushman mujh par shádiyána na bajáeṉ.
3Balki jo tere muntazir haiṉ un meṉ se koí sharminda na hogá:
Par jo náhaqq bewafáí karte haiṉ wuhí sharminda hoṉge.
4Ai Ḳhudáwand, apní ráheṉ mujhe dikhá;
Apne ráste mujhe batá de.
5Mujhe apní sachcháí par chalá aur ta‘lím de;
Kyúṉki tú merá naját denewálá Ḳhudá hai;
Maiṉ din bhar terá hí muntazir rahtá húṉ.
6Ai Ḳhudáwand, apní rahmatoṉ aur shafaqatoṉ ko yád farmá:
Kyúṉki wuh azal se haiṉ.
7Merí jawání kí ḳhatáoṉ aur mere gunáhoṉ ko yád na kar;
Ai Ḳhudáwand, apní nekí kí ḳhátir
Apní shafaqat ke mutábiq mujhe yád farmá.
8 Ḳhudáwand nek aur rást hai:
Is liye wuh gunahgároṉ ko ráh i haqq kí ta‘lím degá.
9Wuh halímoṉ ko insáf kí hidáyat karegá:
Háṉ, wuh halímoṉ ko apní ráh batáegá.
10Jo Ḳhudáwand ke ‘ahd aur us kí shahádatoṉ ko mánte haiṉ,
Un ke liye us kí sab ráheṉ shafaqat aur sachcháí haiṉ.
11Ai Ḳhudáwand, apne nám kí ḳhátir
Merí badkárí mu‘áf kar de, kyúṉki wuh baṛí hai.
12Wuh kaun hai jo Ḳhudáwand se ḍartá hai?
Ḳhudáwand us ko usí ráh kí ta‘lím degá jo use pasand hai.
13Us kí ján ráhat meṉ rahegí;
Aur us kí nasl zamín kí wáris hogí.
14 Ḳhudáwand ke ráz ko wuhí jánte haiṉ jo us se ḍarte haiṉ;
Aur wuh apná ‘ahd un ko batáegá.
15Merí áṉkheṉ hamesha Ḳhudáwand kí taraf lagí rahtí haiṉ;
Kyúṉki wuhí mere páṉw dám se chhuṛáegá.
16Merí taraf mutawajjih ho, aur mujh par rahm kar;
Kyúṉki maiṉ bekas aur musíbatzada húṉ.
17Mere dil ke dukh baṛh gaye:
Tú mujhe merí taklífoṉ se riháí de.
18Tú merí musíbat aur jánfishání ko dekh:
Aur mere sab gunáh mu‘áf farmá.
19Mere dushmanoṉ ko dekh, kyúṉki wuh bahut haiṉ;
Aur un ko mujh se saḳht ‘adáwat hai.
20Merí ján kí hifázat kar, aur mujhe chhuṛá:
Mujhe sharminda na hone de, kyúṉki merá tawakkul tujh hí par hai.
21Diyánatdárí aur rástbází mujhe salámat rakkheṉ,
Kyúṉki mujhe terí hí ás hai.
22Ai Ḳhudá, Isráíl ko
Us ke sab dukhoṉ se chhuṛá le.
Currently Selected:
Zabúr 25: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)