Zabúr 24
24
Dáúd ká Mazmúr.
1Zamín aur us kí ma‘múrí Ḳhudáwand hí kí hai;
Jahán aur us ke báshinde bhí.
2Kyúṉki us ne samundaroṉ par us kí bunyád rakkhí,
Aur sailáboṉ par use qáim kiyá.
3 Ḳhudáwand ke paháṛ par kaun chaṛhegá?
Aur us ke muqaddas maqám par kaun khaṛá hogá?
4Wuhí jis ke háth sáf haiṉ, aur jis ká dil pák hai;
Jis ne batálat par dil nahíṉ lagáyá,
Aur makr se qasam nahíṉ kháí.
5Wuh Ḳhudáwand kí taraf se barakat páegá,
Háṉ, apne naját denewále Ḳhudá kí taraf se sadáqat.
6Yihí us ke táliboṉ kí pusht hai,
Yihí tere dídár ke ḳhwáháṉ haiṉ, ya‘ní Ya‘qúb. (Siláh.)
7Ai pháṭako, apne sir baland karo
Ai abadí darwázo, úṉche ho jáo:
Aur jalál ká bádsháh dáḳhil hogá.
8Yih jalál ká bádsháh kaun hai?
Ḳhudáwand jo qawí aur qádir hai,
Ḳhudáwand jo jang meṉ zoráwar hai.
9Ai pháṭako, apne sir baland karo;
Ai abadí darwázo, un ko baland karo:
Aur jalál ká bádsháh dáḳhil hogá.
10Yih jalál ká bádsháh kaun hai?
Lashkaroṉ ká Ḳhudáwand,
Wuhí jalál ká bádsháh hai. (Siláh.)
Currently Selected:
Zabúr 24: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
