Zabúr 22
22
Mír mug̣anní ke liye; Aillit hashshahr ke sur par. Dáúd ká Mazmúr.
1Ai mere Ḳhudá, ai mere Ḳhudá, tú ne mujhe kyúṉ chhoṛ diyá?
Tú merí madad aur mere nála o faryád se kyúṉ dúr rahtá hai?
2Ai mere Ḳhudá, maiṉ din ko pukártá húṉ, par tú jawáb nahíṉ detá;
Aur rát ko bhí, aur ḳhámosh nahíṉ hotá.
3Lekin tú quddús hai,
Tú jo Isráíl kí hamd o saná par taḳhtnishín hai.
4Hamáre bápdádá ne tujh par tawakkul kiyá:
Unhoṉ ne tawakkul kiyá aur tú ne un ko chhuṛáyá.
5Unhoṉ ne tujh se faryád kí aur riháí páí:
Unhoṉ ne tujh par tawakkul kiyá, aur sharminda na húe.
6Par maiṉ to kíṛá húṉ, insán nahíṉ;
Ádmíoṉ meṉ angushtnumá húṉ aur logoṉ meṉ haqír.
7Wuh sab jo mujhe dekhte haiṉ merá mazhaka uṛáte haiṉ;
Wuh muṉh chiṛáte, wuh sir hilá hilákar kahte haiṉ,
8Apne ko Ḳhudáwand ke supurd kar de; wuhí use chhuṛáe:
Jab ki wuh us se ḳhush hai, to wuhí use chhuṛáe.
9Par tú hí mujhe peṭ se báhar láyá:
Jab maiṉ shírḳhwár hí thá, tú ne mujhe tawakkul karná sikháyá.
10Maiṉ paidáish hí se tujh par chhoṛá gayá:
Merí máṉ ke peṭ hí se tú merá Ḳhudá hai.
11Mujh se dúr na rah; kyúṉki musíbat qaríb hai;
Is liye ki koí madadgár nahíṉ.
12Bahut se sáṉḍoṉ ne mujhe gher liyá hai:
Basan ke zoráwar sáṉḍ mujhe ghere húe haiṉ.
13Wuh pháṛne aur garajnewále babar kí tarah
Mujh par apná muṉh pasáre húe haiṉ.
14Maiṉ pání kí tarah bah gayá,
Merí sab haḍḍiyáṉ ukhaṛ gayíṉ:
Merá dil mom kí mánind ho gayá;
Wuh mere síne meṉ pighal gayá.
15Merí quwwat ṭhíkre kí mánind ḳhushk ho gayí;
Aur merí zabán mere tálú se chipak gayí;
Aur tú ne mujhe maut kí ḳhák meṉ milá diyá.
16Kyúṉki kuttoṉ ne mujhe gher liyá hai:
Badkároṉ ká guroh mujhe ghere húe hai;
Wuh mere háth aur mere páṉw chhedte haiṉ.
17Maiṉ apní sab haḍḍiyáṉ gin saktá húṉ;
Wuh mujhe tákte aur ghúrte haiṉ:
18Wuh mere kapṛe ápas meṉ báṉṭte haiṉ,
Aur merí poshák par qur‘a ḍálte haiṉ.
19Lekin tú, ai Ḳhudáwand, dúr na rah:
Ai mere chárasáz, merí madad ke liye jaldí kar.
20Merí ján ko talwár se bachá;
Merí ján ko kutte ke qábú se.
21Mujhe babar ke muṉh se bachá;
Balki tú ne sáṉḍoṉ ke síṉgoṉ meṉ se mujhe chhuṛáyá hai.
22Maiṉ apne bháiyoṉ se tere nám ká izhár karúṉgá:
Jamá‘at meṉ terí sitáish karúṉgá.
23Ai Ḳhudáwand se ḍarnewálo, us kí sitáish karo;
Ai Ya‘qúb kí aulád, sab us kí tamjíd karo;
Aur ai Isráíl kí nasl, sab us ká ḍar máno.
24Kyúṉki us ne na to musíbatzada kí musíbat ko haqír jáná, na us se nafrat kí;
Na us se apná muṉh chhipáyá;
Balki jab us ne Ḳhudá se faryád kí to us ne sun lí.
25Baṛe majma‘ meṉ merí sanáḳhwání ká bá‘is tú hí hai:
Maiṉ us se ḍarnewáloṉ ke rúbarú apní nazreṉ adá karúṉgá.
26Halím kháeṉge aur ser hoṉge:
Ḳhudáwand ke tálib us kí sitáish kareṉge:
Tumhárá dil abad tak zinda rahe.
27Sárí dunyá Ḳhudáwand ko yád karegí aur us kí taraf rujú‘ láegí:
Aur qaumoṉ ke sab gharáne tere huzúr sijda kareṉge.
28Kyúṉki saltanat Ḳhudáwand kí hai:
Wuhí qaumoṉ par hákim hai.
29Dunyá ke sab ásúdahál log kháeṉge aur sijda kareṉge:
Wuh sab jo ḳhák meṉ mil játe haiṉ us ke huzúr jhukeṉge,
Balki wuh bhí jo apní ján ko jítá nahíṉ rakh saktá.
30Ek nasl us kí bandagí karegí;
Dusrí pusht ko Ḳhudáwand kí ḳhabar dí jáegí.
31Wuh áeṉge aur us kí sadáqat ko ek qaum par
Jo paidá hogí yih kahkar záhir kareṉge ki Us ne yih kám kiyá hai.
Currently Selected:
Zabúr 22: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
