Zabúr 21
21
Mír mug̣anní ke liye. Dáúd ká Mazmúr.
1Ai Ḳhudáwand, terí quwwat se bádsháh ḳhush hogá,
Aur terí naját se use niháyat shádmání hogí.
2Tú ne us ke dil kí árzú púrí kí hai,
Aur us ke muṉh kí darḳhwást ko námanzúr nahíṉ kiyá. (Siláh.)
3Kyúṉki tú use ‘umda barakateṉ baḳhshne meṉ peshqadamí kartá,
Aur ḳhális sone ká táj us ke sir par rakhtá hai.
4Us ne tujh se zindagí cháhí aur tú ne baḳhshí,
Balki ‘umr kí darází hamesha ke liye.
5Terí naját ke sabab se us kí shaukat ‘azím hai:
Tú use hashmat o jalál se árásta kartá hai.
6Kyúṉki tú hamesha ke liye use barakatoṉ se málámál kartá hai,
Aur apne huzúr use ḳhush o ḳhurram rakhtá hai.
7Kyúṉki bádsháh ká tawakkul Ḳhudáwand par hai;
Aur Haqq Ta‘álá kí shafaqat kí badaulat use hargiz jumbish na hogí.
8Terá háth tere sab dushmanoṉ ko ḍhúṉḍh nikálegá:
Terá dahiná háth tujh se kína rakhnewáloṉ ká patá lagá legá.
9Tú apne qahr ke waqt un ko jalte tanúr kí mánind kar degá.
Ḳhudáwand apne g̣azab meṉ un ko nigal jáegá,
Aur ág un ko khá jáegí.
10Tú un ke phal ko zamín par se nábúd kar degá,
Aur un kí nasl ko baní Ádam meṉ se.
11Kyúṉki unhoṉ ne tujh se badí karní cháhí:
Unhoṉ ne aisá mansúba báṉdhá jise wuh púrá nahíṉ kar sakte.
12Kyúṉki tú un ká muṉh pher degá,
Tú un ke muqábale meṉ apne chille chaṛháegá.
13Ai Ḳhudáwand, tú apní hí quwwat meṉ sarbaland ho:
Aur ham gákar terí qudrat kí sitáish kareṉge.
Currently Selected:
Zabúr 21: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
