Zabúr 148
148
1 Ḳhudáwand kí hamd karo.
Ásmán par se us kí hamd karo:
Balandíoṉ par us kí hamd karo.
2Ai us ke firishto, sab us kí hamd karo:
Ai us ke lashkaro, sab us kí hamd karo.
3Ai súraj, ai chánd, us kí hamd karo:
Ai núrání sitáro, sab us kí hamd karo.
4Ai falaku’l aflák, us kí hamd karo,
Aur tú bhí, ai fazá par ke pání.
5Yih sab Ḳhudáwand ke nám kí hamd kareṉ,
Kyúṉki us ne hukm diyá aur yih paidá ho gaye.
6Us ne un ko abadu’l ábád ke liye qáim kiyá hai:
Us ne aṭal qánún muqarrar kar diyá hai.
7Zamín par se Ḳhudáwand kí hamd karo
Ai azhdaho aur gahre samundaro;
8Ai ág aur olo, ai barf aur kuhar;
Ai túfání hawá, jo us ke kalám kí ta‘míl kartí hai;
9Ai paháṛo aur ṭílo;
Ai mewadár daraḳhto aur sab deodáro,
10Ai jánwaro, aur sab chaupáyo;
Ai reṉgnewálo aur parando:
11Ai zamín ke bádsháho aur sab ummato;
Ai umará aur zamín ke sab hákimo:
12Ai naujawáno aur kuṉwáriyo;
Ai buḍḍho aur bachcho:
13Yih sab Ḳhudáwand ke nám kí hamd kareṉ;
Kyúṉki sirf usí ká nám mumtáz hai:
Us ká jalál zamín aur ásmán se baland hai.
14Aur us ne apne sab muqaddasoṉ,
Ya‘ní apní muqarrab qaum baní Isráíl ke faḳhr ke liye,
Apní qaum ká síṉg baland kiyá.
Ḳhudáwand kí hamd karo.
Currently Selected:
Zabúr 148: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
